Share:
ಮಾಲೀಕತ್ವ ಪರಿಶೀಲನೆಯಿಂದ ಅದು ಖರೀದಿಗೆ ಯೋಗ್ಯವೆಂದು ತಿಳಿದುಕೊಳ್ಳಬಹುದು.
ಮಾಲೀಕತ್ವದ ದೃಢೀಕರಣಕ್ಕೆ ಸೇಲ್ ಡೀಡ್, ಋಣಭಾರ ರಾಹಿತ್ಯಪತ್ರ (ಇ.ಸಿ.) ಸೇರಿದಂತೆ ಹಲವು ದಾಖಲೆಗಳ ಅಗತ್ಯ ಇರುತ್ತದೆ.
ಸರ್ಕಾರಿ ಕಚೇರಿಗಳು ಮತ್ತು ಆನ್ ಲೈನ್ ಪೋರ್ಟಲ್ ಗಳ ಮೂಲಕ ಜಮೀನಿನ ಮಾಲೀಕತ್ವ ಸರಿಯಾಗಿ ಖಾತರಿಪಡಿಸಲು ಸಾಧ್ಯ.
ವಕೀಲರ ನೆರವಿನಿಂದಲೂ ಜಮೀನಿನ ಮಾಲೀಕತ್ವ ದಾಖಲೆಗಳನ್ನು ಪರಿಶೀಲಿಸಿ, ಕೆಲಸ ಸುಲಭಗೊಳಿಸಬಹುದು.
ವಂಚನೆಯಿಂದ ಪಾರಾಗುವ ನಿಟ್ಟಿನಲ್ಲಿ ಲಭ್ಯವಾಗದೇ ಇರುವ ಅಗತ್ಯ ದಾಖಲೆಗಳನ್ನು ಅಥವಾ ಸರಿಯಾದ ರೀತಿಯಲ್ಲಿ ದಾಖಲೆಗಳಿಲ್ಲದಿರುವ ಬಗ್ಗೆ ಮಾಹಿತಿ ಪಡೆಯಿರಿ.
ಜಮೀನು ಖರೀದಿಸುವ ಮುನ್ನ ಅದರ ಹಕ್ಕುಪತ್ರ ಮತ್ತು ಮಾಲೀಕರ ವಿವರಗಳು ಕಾನೂನುಬದ್ಧವಾಗಿವೆಯೇ ಎಂಬುದನ್ನು ಪ್ರಮುಖವಾಗಿ ಪರಿಶೀಲಿಸಬೇಕು. ಹಕ್ಕುಪತ್ರ ಎನ್ನುವುದು ಯಾವುದೇ ರೀತಿಯ ವಿವಾದ, ಕಾನೂನಿನ ಸಮಸ್ಯೆಯಿಂದ ಮುಕ್ತವಾಗಿರಬೇಕು ಅಥವಾ ಅದರ ಮೇಲೆ ಸಾಲ ಇರಬಾರದು.ಈ ಅಂಶಗಳನ್ನು ಖಚಿತಪಡಿಸಿಕೊಳ್ಳದೇ ಇದ್ದರೆ, ನೀವು ಅನಿರೀಕ್ಷಿತ ಕಾನೂನು ಸಮಸ್ಯೆ ಎದುರಿಸುವ ಸಾಧ್ಯತೆ ಇರುತ್ತದೆ. ಜತೆಗೆ ನಿಮ್ಮ ಜಮೀನು ಖರೀದಿಸಲು ಮಾಡಿದ ವೆಚ್ಚವೂ ನಷ್ಟವಾಗುವ ಸಾಧ್ಯತೆಯೂ ಇದೆ.
ನಿಮ್ಮ ಉದ್ದೇಶಿತ ಮನೆಯೇ ನಿಮ್ಮ ಗುರುತು ಮತ್ತು ಅದರ ನಿರ್ಮಾಣಕ್ಕಾಗಿ ಖರೀದಿಸಲು ಉದ್ದೇಶಿಸಿರುವ ಜಮೀನು ಅದಕ್ಕೆ ಆಧಾರವಾಗಿರುತ್ತದೆ. ಕ್ರಮಬದ್ಧವಾಗಿರುವ ಹಕ್ಕುಪತ್ರದಿಂದ ನೀವು ನಿರ್ಮಿಸಲು ಉದ್ದೇಶಿಸಿರುವ ಮನೆ ಕಾನೂನುಬದ್ಧವಾಗಿ ನಿಮಗೆ ಸೇರಿದ್ದು ಎನ್ನುವುದನ್ನು ಖಾತರಿಪಡಿಸುತ್ತದೆ. ಸರಿಯಾದ ರೀತಿಯಲ್ಲಿ ಜಮೀನಿನ ದಾಖಲೆಪತ್ರಗಳನ್ನು ಪರಿಶೀಲಿಸಿದರೆ ನಿಮ್ಮ ಕನಸಿನ ಮನೆ ನಿರ್ಮಾಣ ಸೂಕ್ತ ರೀತಿಯಲ್ಲಿ ಶುರುವಾಗಿ ಮುಕ್ತಾಯವಾಗುತ್ತದೆ. ಹೀಗಾಗಿ, ದಾಖಲೆಪತ್ರಗಳು ಕಾನೂನಿಗೆ ಅನ್ವಯವಾಗಿ ಇರಬೇಕಾದದ್ದು ಅಗತ್ಯ.
ಜಮೀನಿನ ಮಾಲೀಕತ್ವ ಖಚಿತಪಡಿಸಿಕೊಳ್ಳಲು:
ಕಂದಾಯ ಇಲಾಖೆ ಅಥವಾ ಉಪ-ನೋಂದಣಾಧಿಕಾರಿ ಕಚೇರಿಗೆ ಸೇರಿ ಸ್ಥಳೀಯ ಸರ್ಕಾರಿ ಕಚೇರಿಗಳಿಗೆ ಭೇಟಿ ನೀಡಿ.
ಜಮೀನು ಇರುವ ಸರ್ವೇ ನಂಬರ್ ಅಥವಾ ವಿಳಾಸ ನೀಡುವ ಮೂಲಕ ಮಾಲೀಕತ್ವದ ದಾಖಲೆಗಳು ಇರುವ ಬಗ್ಗೆ ಖಚಿತಪಡಿಸಬಹುದು.
ಜಮೀನಿಗೆ ಸಂಬಂಧಿಸಿದಂತೆ ಇದ್ದ ವ್ಯಾಜ್ಯಗಳನ್ನು ತಿಳಿಯಲು ಹಕ್ಕುಪತ್ರದ ಬಗ್ಗೆ ಮಾಹಿತಿ ತಿಳಿದುಕೊಳ್ಳಬೇಕು.
ಇದಲ್ಲದೆ ಎಲ್ಲ ದಾಖಲೆಗಳನ್ನು ಕೂಲಂಕಷವಾಗಿ ಪರಿಶೀಲಿಸಿ.
ಜಮೀನು ಖರೀದಿಗೆ ಮುನ್ನ ಈ ಕೆಳಗಿನ ದಾಖಲೆಗಳ ಕಾನೂನಿನ ಸಿಂಧುತ್ವವನ್ನು ಪರಿಶೀಲಿಸಿ, ದೃಢಪಡಿಸಿಕೊಳ್ಳಬೇಕು:
ಮದರ್ ಡೀಡ್: ಜಮೀನಿನ ಮೂಲ ಮಾಲೀಕನಿಂದ ಆರಂಭವಾಗಿ ಅದಕ್ಕೆ ಸಂಬಂಧಿಸಿದ ಎಲ್ಲ ರೀತಿಯ ಹಕ್ಕುಗಳ ವರ್ಗಾವಣೆಯ ವಿವರ ಈ ದಾಖಲೆಯಲ್ಲಿರುತ್ತದೆ. ಆರಂಭದಿಂದಲೇ ಜಮೀನು ಯಾರ ಮಾಲೀಕತ್ವದಲ್ಲಿತ್ತು ಎಂಬ ವಿವರಗಳು ಅದರಲ್ಲಿರುತ್ತದೆ.
ಸೇಲ್ ಡೀಡ್: ಜಮೀನಿನ ಮಾಲೀಕತ್ವ ಮತ್ತೊಬ್ಬರಿಗೆ ವರ್ಗಾವಣೆ ಆಗಿದೆ ಎಂಬುದರ ಬಗ್ಗೆ ತೋರಿಸುವ ದಾಖಲೆ. ಜತೆಗೆ ಸದರಿ ಜಮೀನು ಹಾಲಿ ಮಾಲೀಕರಲ್ಲಿ ಇದೆ ಎಂದು ಖಚಿತಪಡಿಸುವ ದಾಖಲೆಯೂ ಹೌದು.
ಋಣಭಾರ ರಾಹಿತ್ಯ ಪತ್ರ (ಇ.ಸಿ.): ಜಮೀನಿನ ಮೇಲೆ ಸಾಲ ಪಡೆಯಲಾಗಿದೆಯೇ, ಪಡೆದಿರುವ ಸಾಲ ಪಾವತಿ ಆಗದೆ ಉಳಿದಿದೆಯೇ, ಅದರ ಆಧಾರದಲ್ಲಿ ಅಡಮಾನ ಸಾಲ ಪಡೆಯಲಾಗಿದೆಯೇ ಸೇರಿದಂತೆ ಇನ್ನಿತರ ವಿತ್ತೀಯ ಮಾಹಿತಿ ಈ ದಾಖಲೆಯಿಂದ ಲಭ್ಯವಾಗುತ್ತದೆ. ಈ ಅಂಶಗಳು ಇಲ್ಲದೇ ಇದ್ದರೆ ನೀವು ತೊಂದರೆಗೆ ಸಿಲುಕುವ ಅಪಾಯಗಳಿವೆ.
ಖಾತೆ ಪ್ರಮಾಣ ಪತ್ರ ಮತ್ತು ಖಾತೆ: ಸ್ಥಳೀಯ ಆಡಳಿತ ಸಂಸ್ಥೆಗಳಲ್ಲಿ ಜಮೀನು ಇರುವ ಸ್ಥಳ ಮತ್ತು ಇತರ ಅಂಶಗಳ ಬಗ್ಗೆ ಅಧಿಕೃತವಾಗಿ ದಾಖಲಾಗಿರುವ ಬಗ್ಗೆ ಈ ದಾಖಲೆಯಲ್ಲಿ ನಮೂದಾಗಿರುತ್ತದೆ. ಅದರಲ್ಲಿ ವಿಶೇಷವಾಗಿ ತೆರಿಗೆ ಪಾವತಿ ಮಾಡಿರುವ ಅಂಶ ಇರುತ್ತದೆ. ಕಾನೂನುಬದ್ಧವಾಗಿ ಮಾಲೀಕತ್ವ ಹೊಂದಿರುವ ಬಗ್ಗೆ ಮತ್ತು ಸ್ಥಳೀಯ ಕಾನೂನು ಪಾಲನೆಗಾಗಿ ಇದು ಅಗತ್ಯ.
ಭೂದಾಖಲೆಗಳು (ಪಟ್ಟಾ/ಹಕ್ಕುಗಳ ದಾಖಲೆಗಳು): ಈ ದಾಖಲೆ ಮೂಲಕ ಜಮೀನಿನ ಮಾಲೀಕತ್ವದ ಬಗ್ಗೆ ದೃಢೀಕರಣ ಲಭಿಸುತ್ತದೆ. ಇದರ ಜತೆಗೆ ಅದರ ವರ್ಗೀಕರಣವನ್ನೂ ಅದರಲ್ಲಿ ಮುದ್ರಿಸಿರುತ್ತಾರೆ (ಉದಾಹರಣೆ: ಕೃಷಿ, ಗೃಹ ನಿರ್ಮಾಣ). ಜತೆಗೆ ಅದರ ಮೇಲೆ ಸಾಲ ಪಡೆದಿದ್ದರೆ ಅದರ ವಿವರಗಳು ಇರುತ್ತವೆ. ಜಮೀನಿನ ಮಾಲೀಕತ್ವದ ವಿವರಗಳನ್ನು ಶೋಧಿಸುವ ವೇಳೆ ಅದು ಪ್ರಮುಖವಾಗಿ ಬೇಕು.
ಭೂಪರಿವರ್ತನೆ ಆದೇಶ (ಅಗತ್ಯ ಬಿದ್ದರೆ): ಮೂಲದಲ್ಲಿ ಜಮೀನು ಕೃಷಿಗೆ ಬಳಕೆಯಾಗುತ್ತಿದ್ದು, ನಂತರದಲ್ಲಿ ಅದು ಕೃಷಿಯೇತರ ಉಪಯೋಗಕ್ಕೆ ಬಳಕೆಗೆ ಉದ್ದೇಶ ಇದ್ದರೆ ಅದಕ್ಕೆ ಸ್ಥಳೀಯ ಆಡಳಿತದ ನೀಡಿದ ಆದೇಶ ಬೇಕಾಗುತ್ತದೆ. ಜತೆಗೆ ಆ ಆದೇಶವನ್ನೂ ನೀಡಿದ್ದು ಖಚಿತವೇ ಎಂಬುದನ್ನೂ ದೃಢಪಡಿಸಿಕೊಳ್ಳಬೇಕು. ಅದು ದೃಢಪಟ್ಟರೆ ಜಮೀನನ್ನು ಗೃಹ ನಿರ್ಮಾಣಕ್ಕೋ ಅಥವಾ ವಾಣಿಜ್ಯ ಬಳಕೆಗೋ ಉಪಯೋಗಿಸಬಹುದು.
ಅಧಿಕಾರ ಪತ್ರ: ಒಬ್ಬನ ಸ್ವಾಧೀನ ಇರುವ ಜಮೀನನ್ನು ಮತ್ತೊಬ್ಬ ಮಾರಾಟ ಮಾಡಲು ನೀಡುವ ಅನುಮತಿ. ಈ ರೀತಿ ಅಧಿಕಾರ ಪತ್ರ ನೀಡಲಾಗಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಬೇಕು.
ನೀವು ಒಂದು ಬಾರಿ ಮಾತ್ರ ಮನೆ ನಿರ್ಮಿಸುತ್ತೀರಿ. ಹೀಗಾಗಿ, ಸೂಕ್ತ ಸಮಯ ತೆಗೆದುಕೊಂಡು ಜಮೀನಿನ ದಾಖಲೆಗಳನ್ನು ಸರಿಯಾಗಿ ಪರಿಶೀಲಿಸಿ, ಅವು ಕಾನೂನುಬದ್ಧವಾಗಿವೇ ಎಂದು ದೃಢೀಕರಿಸಿ. ಈ ಮೂಲಕ ಮನೆ ನಿರ್ಮಾಣ ಆಗುವ ಜಮೀನು ಕಾನೂನುಬದ್ಧವಾಗಿರುವುದರಿಂದ ನಿಮಗೆ ನೆಮ್ಮದಿ ಸಿಗುತ್ತದೆ.
ಸರಿಯಾದ ಜಮೀನು ಮಾಲೀಕನ ಜತೆಗೆ ಮಾತುಕತೆ ನಡೆಸುತ್ತಿದ್ದೀರಿ ಎಂದಾದರೆ ಈ ಕೆಳಗಿನ ಅಂಶಗಳನ್ನು ಗಮನಿಸಿ:
ಜಮೀನು ಇರುವ ಸರ್ವೇ ನಂಬರ್ ಅಥವಾ ವಿಳಾಸ ಸಂಗ್ರಹಿಸಿ.
ಈ ಮಾಹಿತಿ ಜಮೀನಿನ ದಾಖಲೆಗಳನ್ನು ಸಂಬಂಧಿತ ಸ್ಥಳೀಯ ಆಡಳಿತ ವ್ಯವಸ್ಥೆಯಿಂದ ಪಡೆಯಲು ಸಹಾಯಕವಾಗುತ್ತದೆ.
ಸ್ಥಳೀಯ ಉಪ-ನೋಂದಣಾಧಿಕಾರಿ ಕಚೇರಿ ಅಥವಾ ಕಂದಾಯ ಇಲಾಖೆಯಲ್ಲಿ ದಾಖಲೆಗಳ ಬಗ್ಗೆ ಮಾಹಿತಿ ಪಡೆಯಿರಿ.
ಈ ಕಚೇರಿಗಳಲ್ಲಿ ಭೂದಾಖಲೆಗಳ ಮಾಹಿತಿ ಇರುತ್ತದೆ. ಅಲ್ಲಿ ಅವುಗಳನ್ನು ಪರಿಶೀಲಿಸಿ.
ಹಲವು ರಾಜ್ಯಗಳಲ್ಲಿ ಆನ್ ಲೈನ್ ಮೂಲಕ ಭೂದಾಖಲೆಗಳ ಮಾಹಿತಿ ಲಭ್ಯವಿದೆ.
ಈ ಪೋರ್ಟಲ್ ಗಳ ಮೂಲಕ ಜಮೀನಿನ ಮಾಲೀಕತ್ವದ ವಿವರಗಳನ್ನು ಪರಿಶೀಲಿಸಲು ನೆರವಾಗುತ್ತವೆ ಮತ್ತು ಇತರ ದಾಖಲೆಗಳನ್ನೂ ವೀಕ್ಷಿಸಲು ಸಹಾಯಮಾಡುತ್ತವೆ.
ಮೇಲ್ಕಂಡ ಎಲ್ಲ ದಾಖಲೆಗಳನ್ನು ಪಡೆದುಕೊಂಡು ಅವುಗಳನ್ನು ಪರಿಶೀಲಿಸಿ, ನೀವು ಖರೀದಿಸಲಿರುವ ಜಮೀನು ಕಾನೂನುಬದ್ಧವಾಗಿದೆಯೇ ಎಂದು ಖಚಿತಪಡಿಸಿಕೊಳ್ಳಿ
ಮನೆ ನಿರ್ಮಾಣ ಕಾಮಗಾರಿ ಆರಂಭಕ್ಕೆ ಮೊದಲು ಎಲ್ಲ ಇಲಾಖೆಗಳಿಂದ ಪರವಾನಗಿ ಪಡೆದುಕೊಳ್ಳಬೇಕು.
ನಿಮ್ಮ ಮನೆ ನಿರ್ಮಾಣದ ಖರ್ಚಿನಲ್ಲಿ ಪರವಾನಗಿ ಪಡೆಯಲು ನೀಡಿದ ಶುಲ್ಕ, ಪರವಾನಗಿ ಪಡೆಯಲು ತಪಾಸಣೆ ನಡೆಸಿದ್ದಕ್ಕೆ ಶುಲ್ಕವನ್ನೂ ಸೇರಿಸಿ. ಈ ಮೂಲಕ ಅನಪೇಕ್ಷಿತ ವೆಚ್ಚ ತಡೆಯಿರಿ.
ಜಮೀನು ಖರೀದಿಸುವ ವೇಳೆ ಮಾಲೀಕತ್ವದ ದಾಖಲೆಗಳು ಸರಿಯಾಗಿ ಇವೆಯೇ ಎಂದು ಪರೀಕ್ಷಿಸದಿದ್ದರೆ ಹಲವು ಗಂಭೀರ ಸಮಸ್ಯೆಗಳಿಗೆ ಕಾರಣವಾಗುವ ಸಾಧ್ಯತೆ ಇದೆ. ಕಾನೂನು ಶುಲ್ಕ, ಅನಗತ್ಯ ವಿವಾದಗಳುಸೇರಿದಂತೆ ಹಲವು ಸಮಸ್ಯೆಗಳು ಎದುರಾಗುವ ಆತಂಕ ಇದೆ. ಉದಾಹರಣೆಗೆ ಜಮೀನಿನ ಮಾಲೀಕ ನಾನೇ ಎಂದು ಹಲವರು ವಾದಿಸಬಹುದು, ಅದಕ್ಕೆ ಸಾಲ ಪಡೆಯಲು, ಅಡಮಾನ ಸಾಲ ಪಡೆಯಲು, ಕೋರ್ಟ್ ನಲ್ಲಿ ಜಮೀನು ನಿಮಗೆ ಸೇರಿದ್ದು ಅಲ್ಲ ಎಂಬ ತೀರ್ಪೂ ಬರಬಹುದು. ಖರೀದಿಗೆ ಮುನ್ನವೇ ಜಮೀನಿನ ಮಾಲೀಕತ್ವದ ಬಗೆಗಿನ ದಾಖಲೆಗಳನ್ನು ಪರೀಕ್ಷಿಸಿ ದೃಢಪಡಿಸಿದರೆ ನೀವು ಮಾಡಿದ ಹೂಡಿಕೆಯೂ ಮತ್ತು ನಿರ್ಮಾಣಗೊಂಡ ಮನೆಯೂ ಸುರಕ್ಷಿತವಾಗಿರುತ್ತದೆ.
ಕೆಲವೊಂದು ಸಂದರ್ಭಗಳಲ್ಲಿ ಜಮೀನಿನ ದಾಖಲೆಗಳನ್ನು ನಮಗೇ ಪರೀಕ್ಷಿಸಲು ಕಷ್ಟವಾಗಬಹುದು. ಆ ಜಮೀನಿಗೆ ಸಂಬಂಧಿಸಿದಂತೆ ಪ್ರಕರಣಗಳು ದಾಖಲಾಗಿದ್ದಲ್ಲಿ, ವಂಚನೆ ನಡೆದಿದ್ದಲ್ಲಿಅದನ್ನು ಖಚಿತಪಡಿಸಲು ಸಾಧ್ಯವಾಗದೇ ಇರಬಹುದು. ಹೀಗಾಗಿ, ಜಮೀನು ಖರೀದಿ ವಿಚಾರದಲ್ಲಿ ತಜ್ಞರ ವಕೀಲರ ನೆರವು ಪಡೆಯಬೇಕಾಗುತ್ತದೆ. ವಕೀಲರು ಈ ಕೆಳಗಿನ ವಿಚಾರಗಳಿಗೆ ಸಂಬಂಧಿಸಿ ನೆರವು ನೀಡಬಹುದು:
ದಾಖಲೆಗಳ ಸಮಗ್ರ ಪರಿಶೀಲನೆ: ಜಮೀನಿಗೆ ಸಂಬಂಧಿಸಿದಂತೆ ಇರುವ ಎಲ್ಲ ದಾಖಲೆಗಳನ್ನು ಅವರು ಪರಿಶೀಲಿಸಿ, ಅದನ್ನು ಖರೀದಿಸಬಹುದೇ ಅಥವಾ ಬೇಡ ಎಂಬ ಅಭಿಪ್ರಾಯ ತಿಳಿಸಬಹುದು.
ಹಕ್ಕುಪತ್ರದ ಶೋಧ: ಗೊತ್ತಿಲ್ಲದೇ ಇರುವ ಕಾನೂನು ಅಂಶಗಳು, ಮಾಲೀಕತ್ವದ ದಾಖಲೆಗಳನ್ನು ಪಡೆಯುವ ಬಗ್ಗೆ ಸಲಹೆ.
ವಿವಾದ ಪರಿಹಾರಕ್ಕೆ ನೆರವು: ಹಕ್ಕುಪತ್ರದ ಬಗ್ಗೆ ವಿಚಾರ ಇತ್ಯರ್ಥವಾಗದೇ ಇದ್ದಲ್ಲಿ ಅಥವಾ ಮಾಲೀಕತ್ವದ ಬಗ್ಗೆ ಸಮಸ್ಯೆ ಇದ್ದಲ್ಲಿ ಅದರ ಪರಿಹಾರದ ಬಗ್ಗೆ ನೆರವು.
ವಕೀಲರ ಮೂಲಕ ದಾಖಲೆಗಳನ್ನು ಪರಿಶೀಲಿಸುವುದರಿಂದ ಜಮೀನು ಖರೀದಿ ಬಗ್ಗೆ ಕಾನೂನಿನ ಯಾವುದೇ ಹಂತವನ್ನು ತಪ್ಪಿಸುವುದಿಲ್ಲ ಎಂಬ ನಂಬಿಕೆ ಉಂಟಾಗುತ್ತದೆ. ಇದಲ್ಲದೆ ಖರೀದಿಯ ಹಂತಗಳಲ್ಲಿ ಉಂಟಾಗುವ ಕಾನೂನಾತ್ಮಕ ಸಮಸ್ಯೆಗಳಿಗೆ ಪರಿಹಾರ ಪಡೆಯಲೂ ಸಾಧ್ಯ.
ಜಮೀನು ಮಾಲೀಕತ್ವದ ಬಗ್ಗೆ ಎಲ್ಲ ಅಂಶಗಳನ್ನು ಪರಿಶೀಲಿದ್ದರೂ ಕೆಲವೊಂದು ಅಂಶಗಳ ಬಗ್ಗೆ ಮುನ್ನೆಚ್ಚರಿಕೆ ವಹಿಸಬೇಕಾಗುತ್ತದೆ:
ಜಮೀನಿನ ಬಗ್ಗೆ ಅಪೂರ್ಣ ಅಥವಾ ಇಲ್ಲದ ದಾಖಲೆಗಳು: ಸೇಲ್ ಡೀಡ್, ಋಣಭಾರ ರಾಹಿತ್ಯಪತ್ರ (ಇ.ಸಿ.) ಖಾತೆ ಸೇರಿದಂತೆ ಪ್ರಮುಖ ದಾಖಲೆಗಳು ಇಲ್ಲದೇ ಇದ್ದರೆ ಅಥವಾ ಪೂರ್ಣ ಪ್ರಮಾಣದಲ್ಲಿ ಅವುಗಳು ಇಲ್ಲದೇ ಇದ್ದರೆ ಅಂಥ ಜಮೀನಿನ ಮಾಲೀಕತ್ವದ ಬಗ್ಗೆ ಸಂಶಯ ಉಂಟಾಗುತ್ತದೆ.
ಮಾಲೀಕತ್ವದ ದಾಖಲೆಗಳ ಬಗ್ಗೆ ಸ್ಪಷ್ಟತೆಯ ಕೊರತೆ: ಜಮೀನಿನ ಮಾಲೀಕತ್ವದ ಬಗ್ಗೆ ಹಲವು ಮಂದಿ ಹಕ್ಕು ಸ್ಥಾಪಿಸಿದರೆ ಅಥವಾ ದಾಖಲೆಗಳಲ್ಲಿ ಸ್ಪಷ್ಟತೆ ಇಲ್ಲದಿದ್ದರೆ ಮುಂದಿನ ದಿನಗಳಲ್ಲಿ ಸಮಸ್ಯೆಗೆ ಕಾರಣವಾಗಬಹುದು.
ಅಪೂರ್ಣ ಪಾವತಿ ವಿಚಾರ: ಜಮೀನಿನ ಆಧಾರದಲ್ಲಿ ಪಡೆಯಲಾಗಿರುವ ಸಾಲ ಮರು ಪಾವತಿ ಮಾಡದಿರುವುದು, ತೆರಿಗೆ ಪಾವತಿ ಬಾಕಿ ಇದ್ದರೆ ಸಮಸ್ಯೆಗಳಿಗೆ ಕಾರಣವಾಗಬಹುದು. ಈ ಅಂಶಗಳನ್ನು ಪರಿಶೀಲಿಸದೆ ಜಮೀನು ಖರೀದಿಸಿದರೆ ಬಾಕಿ ಪಾವತಿಯನ್ನು ನೀವೇ ಮಾಡಬೇಕಾದೀತು.
ಖಚಿತವಲ್ಲದ ಮಾರಾಟಗಾರ: ಜಮೀನು ಮಾರಾಟ ಮಾಡುವಾತನ ಬಗ್ಗೆ ಮಾಹಿತಿ ಇಲ್ಲದಿದ್ದರೆ ಅಥವಾ ಅದರ ಮಾಲೀಕತ್ವದ ಬಗ್ಗೆ ಸ್ಪಷ್ಟ ದಾಖಲೆ ಕೊಡದಿದ್ದರೆ ಅದೊಂದು ಸಮಸ್ಯೆಯಾದೀತು.
ಮೇಲ್ಕಂಡ ಎಲ್ಲ ಅಂಶಗಳನ್ನು ನೋಡಿ ಜಮೀನು ಖರೀದಿಸಿ ಸಂಭಾವ್ಯ ಅಪಾಯಗಳಿಂದ ಪಾರಾಗಿ. ಜತೆಗೆ ಜಮೀನು ಖರೀದಿಗೆ ಮಾಡಿರುವ ಹೂಡಿಕೆ ಸುರಕ್ಷಿತವಾಗಿರುವಂತೆ ನೋಡಿಕೊಳ್ಳಬೇಕು. ಅದಕ್ಕಾಗಿ ವಕೀಲರೊಬ್ಬರು ಜಮೀನಿನ ದಾಖಲೆಗಳನ್ನು ನೋಡಿ ಅದರಿಂದ ಉಂಟಾಗಬಹುದಾಗಿರುವ ಸಮಸ್ಯೆಯನ್ನು ಪರಿಹರಿಸಿ, ಜಮೀನು ಖರೀದಿಯಲ್ಲಿ ನೆರವಾಗುತ್ತಾರೆ.
ನೀವು ಖರೀದಿಸಲು ಉದ್ದೇಶಿರುವ ಜಮೀನಿನ ಮಾಲೀಕತ್ವ ಮತ್ತು ಅದರ ಹಕ್ಕುಪತ್ರಗಳ ಬಗೆಗಿನ ಮಾಹಿತಿಯನ್ನು ಸಮಗ್ರವಾಗಿ ಪರಿಶೀಲಿಸಬೇಕು. ಹೀಗೆ ಮಾಡುವುದರ ಮೂಲಕ ನಿಮ್ಮ ಹೂಡಿಕೆಯನ್ನು ಸುರಕ್ಷಿತವಾಗಿ ಇರಿಸಬಹುದು. ಜೀವನದಲ್ಲಿ ಒಂದು ಬಾರಿ ಮನೆ ನಿರ್ಮಿಸಲಿರುವ ನೀವು ಯಾವುದೇ ವಿಚಾರದಲ್ಲಿ ರಾಜಿ ಮಾಡಿಕೊಳ್ಳಬೇಡಿ. ಖರೀದಿಸಲು ಉದ್ದೇಶಿಸಿರುವ ಜಮೀನು ಕಾನೂನು ಬದ್ಧವಾಗಿದೆಯೇ ಎನ್ನುವುದು ಪ್ರಮುಖ ಅಂಶ. ಹೀಗಿದ್ದರೆ ಮಾತ್ರ ನಿಮ್ಮ ಮನೆಯೂ ಭದ್ರವಾಗಿರುತ್ತದೆ ಮತ್ತು ಯಾವ ಸಮಸ್ಯೆಯೂ ಇರುವುದಿಲ್ಲ. ಜಮೀನು ಖರೀದಿಗೆ ಸಂಬಂಧಿಸಿದಂತೆ ಪ್ರತಿ ಹಂತವನ್ನು ಪಾಲಿಸಿದರೆ ನಿಮ್ಮ ಖರೀದಿ ಸುರಕ್ಷಿತವಾಗಿರುತ್ತದೆ. ಮುಂದಿನ ದಿನಗಳಲ್ಲಿ ನೆಮ್ಮದಿಯಾಗಿರಬಹುದು.
ಸುಲಭವಾಗಿ ಜಮೀನಿನ ಮಾಲೀಕತ್ವ ಸಾಬೀತುಮಾಡಲು ಇರುವ ದಾಖಲೆ ಎಂದರೆ ಸೇಲ್ ಡೀಡ್. ಒಬ್ಬರಿಂದ ಮತ್ತೊಬ್ಬರಿಗೆ ಮಾಲೀಕತ್ವ ಹಸ್ತಾಂತರ ಮಾಡಲಾಗಿರುವ ಬಗ್ಗೆ ಅದರಲ್ಲಿ ಉಲ್ಲೇಖಿಸಲಾಗಿರುತ್ತದೆ. ಹೀಗಾಗಿ, ಅದಕ್ಕೆ ಕಾನೂನಿನ ಮಾನ್ಯತೆ ಇದೆ.
ಸೇಲ್ ಡೀಡ್, ಜಮೀನಿನ ತೆರಿಗೆ ಪಾವತಿ ರಶೀದಿ ಮತ್ತು ಋಣಭಾರ ರಾಹಿತ್ಯ ಪತ್ರ (ಇ.ಸಿ.)ಗಳನ್ನು ಪರಿಶೀಲಿಸುವ ಮೂಲಕ ಜಮೀನಿನ ಮಾಲೀಕತ್ವ ಅಧಿಕೃತವಾಗಿದೆಯೋ ಅಲ್ಲವೋ ಎಂಬ ಅಂಶಗಳನ್ನು ಪರಿಶೀಲಿಸಬಹುದು. ಅವುಗಳ ಮೂಲಕ ಜಮೀನು ವ್ಯಾಜ್ಯದಿಂದ ಮುಕ್ತವಾಗಿದೆ ಎಂದು ತಿಳಿದುಕೊಳ್ಳಬಹುದು.
ಉಪ-ನೋಂದಣಾಧಿಕಾರಿ ಅಥವಾ ಭೂದಾಖಲೆಗಳ ಕಚೇರಿಗೆ ತೆರಳಿ ಹಕ್ಕುಪತ್ರದ ಬಗೆಗಿನ ಮಾಹಿತಿ ಪರಿಶೀಲಿಸಿ ದೃಢೀಕರಿಸಬಹುದು. ದೇಶದ ಹೆಚ್ಚಿನ ರಾಜ್ಯಗಳು ಹಕ್ಕುಪತ್ರದ ಮಾಹಿತಿಯನ್ನು ಆನ್ ಲೈನ್ ನಲ್ಲಿ ಪರಿಶೀಲಿಸಲು ಅವಕಾಶ ಕಲ್ಪಿಸಿವೆ.
ಹಕ್ಕುಪತ್ರದ ಬಗ್ಗೆ ಮಾಹಿತಿ ಶೋಧಿಸುವುದರಿಂದ ಜಮೀನಿನನ್ನು ಯಾರು ಹೊಂದಿದ್ದರು ಎಂಬ ಬಗ್ಗೆ ಮಾಹಿತಿ ತಿಳಿಯುತ್ತದೆ. ಜತೆಗೆ ಅದಕ್ಕೆ ಸಂಬಂಧಿಸಿದಂತೆ ಕಾನೂನು ಹೋರಾಟವೂ ಇಲ್ಲವೆಂದೂ ಗೊತ್ತಾಗುತ್ತದೆ. ಹೀಗಾಗಿ, ನೀವು ಜಮೀನು ಖರೀದಿಗಾಗಿ ಮಾಡಿದ ಹೂಡಿಕೆಯೂ ಸುರಕ್ಷಿತವಾಗಿರುತ್ತದೆ.
ಸೇಲ್ ಡೀಡ್, ಋಣಭಾರ ರಾಹಿತ್ಯಪತ್ರ (ಇ.ಸಿ.) ಸೇರಿದಂತೆ ಪ್ರಮುಖ ದಾಖಲೆಗಳನ್ನು ಪರಿಶೀಲಿಸುವ ಮೂಲಕ ಜಮೀನಿನ ಕಾನೂನುಬದ್ಧ ಪರಿಶೀಲನೆ ಸಾಧ್ಯ. ಈ ಕೆಲಸಕ್ಕಾಗಿ ವಕೀಲರ ನೆರವು ಪಡೆಯಲೂ ಅವಕಾಶ ಇದೆ.
