Share:
ಪಾಯಿಂಟಿಂಗ್ ಎಂದರೆ ಶಕ್ತಿ ಮತ್ತು ಅಂದವನ್ನು ಹೆಚ್ಚಿಸಲು ಇಟ್ಟಿಗೆ ಅಥವಾ ಕಲ್ಲುಗಳ ನಡುವಿನ ಸಂದಿಗಳನ್ನು ಗಾರೆಯಿಂದ ತುಂಬಿಸುವ ಪ್ರಕ್ರಿಯೆ. ಸರಿಯಾದ ಪಾಯಿಂಟಿಂಗ್ ನಿಮ್ಮ ಮನೆಯ ಅಂದವನ್ನು ಹೆಚ್ಚಿಸುತ್ತದೆ ಮತ್ತು ಹವಾಮಾನದ ಪ್ರಭಾವದಿಂದ ಹಾಳಾಗದಂತೆ ಕಾಪಾಡುತ್ತದೆ.
ಈ ಬ್ಲಾಗ್ನಲ್ಲಿ, ಪಾಯಿಂಟಿಂಗ್ ಎಂದರೇನು, ಅದರ ವಿಧಗಳು, ಪ್ರಯೋಜನಗಳು ಮತ್ತು ಉದ್ದೇಶಗಳ ಬಗ್ಗೆ ತಿಳಿಯೋಣ. ನೀವು ಬಿಲ್ಡರ್ ಆಗಿರಲಿ, ಮನೆ ಮಾಲೀಕರಾಗಿರಲಿ ಅಥವಾ ಕಲಿಯುವ ಆಸಕ್ತಿ ಉಳ್ಳವರಾಗಿರಲಿ, ಪಾಯಿಂಟಿಂಗ್ ಕೆಲಸದ ಬಗ್ಗೆ ನಿಮಗೆ ಇಲ್ಲಿ ಸ್ಪಷ್ಟ ಮಾಹಿತಿ ಸಿಗುತ್ತದೆ.
ಕಟ್ಟಡ ಕೆಲಸದಲ್ಲಿ ಪಾಯಿಂಟಿಂಗ್ ಗಟ್ಟಿಯಾಗಿ ಬರಲು ಮೇಲ್ಮೈ ಸಿದ್ಧತೆ ತುಂಬಾ ಮುಖ್ಯ. ಇದು ಹೊಸ ಗಾರೆಯು ಗೋಡೆಯ ಮೇಲ್ಮೈಗೆ ಸರಿಯಾಗಿ ಅಂಟಿಕೊಳ್ಳುವಂತೆ ನೋಡಿಕೊಳ್ಳುತ್ತದೆ ಹಾಗೂ ರಕ್ಷಣೆ ಮತ್ತು ಫಿನಿಶ್ ನೀಡುತ್ತದೆ. ಮೇಲ್ಮೈ ಸಿದ್ಧಪಡಿಸುವ ಹಂತಗಳು ಇಲ್ಲಿವೆ:
ಹಳೆಯ ಗಾರೆಯನ್ನು ಪಾಯಿಂಟಿಂಗ್ ಟೂಲ್ ಅಥವಾ ಉಳಿ ಬಳಸಿ 10 ರಿಂದ 20 mm ಆಳದವರೆಗೆ ಕೆರೆದು ತೆಗೆಯಬೇಕು. ಇದು ಸಡಿಲವಾದ ಗಾರೆಯನ್ನು ತೆಗೆದು ಹೊಸ ಗಾರೆ ಹಾಕಲು ಜಾಗ ಮಾಡಿಕೊಡುತ್ತದೆ.
ಸಂದಿಗಳನ್ನು ಕೆರೆದ ಮೇಲೆ ವೈರ್ ಬ್ರಷ್ ಬಳಸಿ ಧೂಳನ್ನು ಸ್ವಚ್ಛ ಮಾಡಬೇಕು. ಇನ್ನೂ ಚೆನ್ನಾಗಿ ಸ್ವಚ್ಛಗೊಳಿಸಲು ಕಂಪ್ರೆಸ್ಡ್ ಏರ್ ಅಥವಾ ನೀರನ್ನು ಬಳಸಬಹುದು.
ಧೂಳು ಅಥವಾ ಉಪ್ಪಿನಂಶವನ್ನು ತೆಗೆಯಲು ಗೋಡೆಯ ಮೇಲ್ಮೈಯನ್ನು ಶುದ್ಧ ನೀರಿನಿಂದ ತೊಳೆಯಬೇಕು. ಇದರಿಂದ ಒಣಗಿದ ಮೇಲ್ಮೈ ಹೊಸ ಗಾರೆಯಲ್ಲಿರುವ ನೀರನ್ನು ಹೀರಿಕೊಳ್ಳದಂತೆ ತಡೆಯಬಹುದು.
ಹೊಸ ಗಾರೆ ಹಾಕುವ ಮುನ್ನ ಶುಚಿಗೊಳಿಸಿದ ಸಂದಿಗಳನ್ನು ಸ್ವಲ್ಪ ತೇವ ಮಾಡಬೇಕು. ಈ ಹಂತವು ಗಾರೆ ಸರಿಯಾಗಿ ಅಂಟಿಕೊಳ್ಳಲು ಸಹಾಯ ಮಾಡುತ್ತದೆ ಮತ್ತು ಅದು ಬೇಗ ಒಣಗಿ ಬಿರುಕು ಬಿಡುವುದನ್ನು ತಪ್ಪಿಸುತ್ತದೆ.
ಮೇಲ್ಮೈ ಸ್ವಚ್ಛವಾಗಿದೆಯೇ, ಹದವಾಗಿ ತೇವವಾಗಿದೆಯೇ (ಹೆಚ್ಚು ನೀರಿರಬಾರದು) ಮತ್ತು ಗಾರೆಗೆ ತೊಂದರೆ ಕೊಡುವ ಎಣ್ಣೆ, ಗ್ರೀಸ್ ಅಥವಾ ರಾಸಾಯನಿಕಗಳಿಲ್ಲವೇ ಎಂದು ಪರೀಕ್ಷಿಸಬೇಕು.
ಸಲಹೆ: ಗಾರೆ ಬೇಗ ಒಣಗಿ ಬಿರುಕು ಬಿಡುವುದನ್ನು ತಪ್ಪಿಸಲು ಪಾಯಿಂಟಿಂಗ್ ಮಾಡುವ ಮೊದಲು ಮತ್ತು ನಂತರ ಸಂದಿಗಳನ್ನು ತೇವವಾಗಿಡಿ.
ಕಟ್ಟಡ ಕೆಲಸದಲ್ಲಿ ಪಾಯಿಂಟಿಂಗ್ ಮಾಡಲು ಬೇರೆ ಬೇರೆ ತಂತ್ರಗಳಿವೆ. ಪ್ರತಿಯೊಂದೂ ತನ್ನದೇ ಆದ ಅಂದ ಮತ್ತು ಲಾಭಗಳನ್ನು ಹೊಂದಿದೆ. ಸಾಮಾನ್ಯವಾಗಿ ಬಳಸುವ ಕೆಲವು ಪಾಯಿಂಟಿಂಗ್ ವಿಧಗಳನ್ನು ನೋಡೋಣ.
ಫ್ಲಶ್ ಪಾಯಿಂಟಿಂಗ್ನಲ್ಲಿ, ಕೆರೆದ ಸಂದಿಗಳನ್ನು ಗಾರೆಯಿಂದ ತುಂಬಿಸಿ ಹೆಚ್ಚಿನ ಗಾರೆಯನ್ನು ತೆಗೆಯಲಾಗುತ್ತದೆ, ಇದರಿಂದ ನಯವಾದ ಫಿನಿಶ್ ಸಿಗುತ್ತದೆ. ಗಾರೆಯನ್ನು ಇಟ್ಟಿಗೆ ಅಥವಾ ಕಲ್ಲಿನ ಮೇಲ್ಮೈಗೆ ಸಮನಾಗಿ ಒತ್ತಲಾಗುತ್ತದೆ. ಧೂಳು ಅಥವಾ ನೀರು ಸೇರುವ ಜಾಗವನ್ನು ಇದು ಇಲ್ಲವಾಗಿಸುವುದರಿಂದ, ಕಟ್ಟಡದ ಬಾಳಿಕೆ ಮತ್ತು ಸ್ವಚ್ಛತೆ ಹೆಚ್ಚಾಗುತ್ತದೆ.
ರಿಸೆಸ್ಡ್ ಪಾಯಿಂಟಿಂಗ್ ಎಂದರೆ ಗಾರೆಯನ್ನು ಸಂದಿಗಳಲ್ಲಿ ತುಂಬಿ ಒಂದು ಟೂಲ್ನಿಂದ ಗೋಡೆಯ ಒಳಭಾಗಕ್ಕೆ ಒತ್ತುವುದು. ಈ ತಂತ್ರದಲ್ಲಿ ಪಾಯಿಂಟಿಂಗ್ ಮುಖಭಾಗವನ್ನು ನೇರವಾಗಿ ಇಡುತ್ತಾ ಸುಮಾರು 5 mm ಅಥವಾ ಅದಕ್ಕಿಂತ ಹೆಚ್ಚಿನ ಆಳವನ್ನು ನೀಡಲಾಗುತ್ತದೆ.
ಬೀಡೆಡ್ ಪಾಯಿಂಟಿಂಗ್ ಎಂದರೆ ಗಾರೆಯನ್ನು ಸಂದಿಗಳಲ್ಲಿ ತುಂಬಿ ಒಂದು ಸ್ಟೀಲ್ ಟೂಲ್ ಬಳಸಿ ಗುಳಿಗಳನ್ನು ಮಾಡುವುದು. ಇದು ಮಣಿಗಳ ಸಾಲಿನಂತೆ ಕಾಣಿಸುತ್ತದೆ. ಆದರೆ, ಈ ವಿಧದ ಪಾಯಿಂಟಿಂಗ್ ಬೇರೆ ವಿಧಗಳಿಗಿಂತ ಬೇಗ ಹಾಳಾಗುವ ಸಾಧ್ಯತೆ ಇರುತ್ತದೆ.
ಸ್ಟ್ರಕ್ ಪಾಯಿಂಟಿಂಗ್ ಎರಡು ಹಂತಗಳಲ್ಲಿ ನಡೆಯುತ್ತದೆ. ಮೊದಲಿಗೆ, ಗಾರೆಯನ್ನು ತುಂಬಿ ಇಟ್ಟಿಗೆಯ ಮೇಲ್ಮೈಗೆ ಸಮನಾಗಿ ಒತ್ತಲಾಗುತ್ತದೆ. ನಂತರ, ಸಂದಿಯ ಮೇಲ್ಭಾಗವನ್ನು ಒಳಕ್ಕೆ ಒತ್ತಿ ಸುಮಾರು 10 mm ನಷ್ಟು ಇಳಿಜಾರನ್ನು ಮಾಡಲಾಗುತ್ತದೆ. ಈ ಇಳಿಜಾರಿನಿಂದ ಮಳೆ ನೀರು ಸುಲಭವಾಗಿ ಹರಿದು ಹೋಗುತ್ತದೆ ಮತ್ತು ಗೋಡೆಯ ಮೇಲೆ ನೀರು ನಿಲ್ಲದಂತೆ ನೋಡಿಕೊಳ್ಳುತ್ತದೆ.
ರಬ್ಬಡ್, ಕೀಡ್ ಅಥವಾ ಗ್ರೂವ್ಡ್ ಪಾಯಿಂಟಿಂಗ್ ಎಂದರೆ ಗಾರೆಯನ್ನು ಸಂದಿಗಳಲ್ಲಿ ತುಂಬಿಸಿ ಇಟ್ಟಿಗೆಯ ಮುಖಕ್ಕೆ ಸಮನಾಗಿ ಮಾಡುವುದು. ಆದರೆ, ಇದರ ವಿಶೇಷವೆಂದರೆ ಪಾಯಿಂಟರ್ ಎಂಬ ಟೂಲ್ ಬಳಸಿ ಮಧ್ಯದಲ್ಲಿ ಒಂದು ಗೆರೆಯನ್ನು ಮಾಡಲಾಗುತ್ತದೆ.
ಟಕ್ ಪಾಯಿಂಟಿಂಗ್ನಲ್ಲಿ ಗಾರೆಯನ್ನು ಸಂದಿಯಲ್ಲಿ ತುಂಬಿಸಿ ಮಧ್ಯದಲ್ಲಿ 5 mm ಅಗಲ ಮತ್ತು 3 mm ಆಳದ ಗೆರೆಯನ್ನು ಮಾಡಲಾಗುತ್ತದೆ. ನಂತರ ಆ ಗೆರೆಯಲ್ಲಿ ಬಿಳಿ ಸಿಮೆಂಟ್ ಪುಟ್ಟಿಯನ್ನು ತುಂಬಿ ಸುಮಾರು 3 mm ನಷ್ಟು ಹೊರಬರುವಂತೆ ಮಾಡುವುದೇ ಇದರ ವಿಶೇಷ.
ಸಲಹೆ: ಇಲ್ಲಿ ಅಚ್ಚುಕಟ್ಟುತನವೇ ಮುಖ್ಯ; ಆ ಸಣ್ಣ “ಟಕ್” ಗೆರೆಗಳು ನೇರವಾಗಿ ಮತ್ತು ಸ್ವಚ್ಛವಾಗಿರಬೇಕು.
ಇದು ಗಾರೆಯನ್ನು ಸಂದಿಯಲ್ಲಿ ತುಂಬುವ ಪ್ರಕ್ರಿಯೆಯಿಂದ ಶುರುವಾಗುತ್ತದೆ. ನಂತರ ಸಂದಿಯ ಮಧ್ಯದಲ್ಲಿ ವಿ ಆಕಾರದ ಗೆರೆಯನ್ನು ಮಾಡಲಾಗುತ್ತದೆ. ಇದಕ್ಕೆ ವಿ ಆಕಾರದ ವಿಶೇಷ ಟೂಲ್ ಬಳಸುವುದರಿಂದ ಇದಕ್ಕೆ ಈ ಹೆಸರು ಬಂದಿದೆ.
ವೆದರ್ಡ್ ಪಾಯಿಂಟಿಂಗ್ನಲ್ಲಿ ಗಾರೆ ಹಸಿಯಾಗಿರುವಾಗಲೇ ಅಡ್ಡ ಸಂದಿಗಳ ಮೇಲ್ಭಾಗವನ್ನು ಪಾಯಿಂಟಿಂಗ್ ಟೂಲ್ನಿಂದ 3-6 mm ನಷ್ಟು ಒಳಕ್ಕೆ ಒತ್ತಲಾಗುತ್ತದೆ. ಇದು ಮೇಲಿನಿಂದ ಕೆಳಕ್ಕೆ ಇಳಿಜಾರಿನಂತೆ ಕಾಣಿಸುತ್ತದೆ ಮತ್ತು ಅಂಚುಗಳು ಸವೆದು ಹೋದಂತೆ ಅಂದವಾಗಿ ಕಾಣುತ್ತವೆ.
ಕಟ್ಟಡ ನಿರ್ಮಾಣದಲ್ಲಿ ಬೇರೆ ಬೇರೆ ವಿಧದ ಪಾಯಿಂಟಿಂಗ್ನ ಮುಖ್ಯ ಲಾಭಗಳು ಇಲ್ಲಿವೆ:
1. ಕಟ್ಟಡದ ರಚನೆಯನ್ನು ಗಟ್ಟಿಗೊಳಿಸಿ, ಮನೆಗೆ ಬಲ ನೀಡುತ್ತದೆ.
2. ಹೊರಗಿನ ಗೋಡೆಗಳನ್ನು ತೇವಾಂಶ ಮತ್ತು ಹವಾಮಾನದಿಂದ ರಕ್ಷಿಸುತ್ತದೆ.
3. ಕಟ್ಟಡಕ್ಕೆ ಹೊಸ ಕಳೆಯನ್ನು ನೀಡಿ ಅಂದವನ್ನು ಹೆಚ್ಚಿಸುತ್ತದೆ.
4. ನಿಮ್ಮ ಆಸ್ತಿಯ ಮೌಲ್ಯವನ್ನು ಹೆಚ್ಚಿಸಿ ಬೇಡಿಕೆ ತರುತ್ತದೆ.
5. ಪದೇ ಪದೇ ರಿಪೇರಿ ಮಾಡುವ ಅಗತ್ಯವಿರುವುದಿಲ್ಲ, ಇದರಿಂದ ಸಮಯ ಮತ್ತು ಹಣ ಎರಡೂ ಉಳಿಯುತ್ತದೆ.
ಪಾಯಿಂಟಿಂಗ್ ಮಾಡುವ ಮುಖ್ಯ ಉದ್ದೇಶಗಳು ಇಲ್ಲಿವೆ:
ಪಾಯಿಂಟಿಂಗ್ ವಾತಾವರಣದ ಪರಿಣಾಮಗಳಿಂದ ಗಾರೆಯ ಸಂದಿಗಳು ಹಾಳಾಗದಂತೆ ಕಾಪಾಡುತ್ತದೆ.
ಪಾಯಿಂಟಿಂಗ್ ಗೋಡೆಯ ವಿನ್ಯಾಸ, ದಪ್ಪ, ಬಣ್ಣಗಳು ಮತ್ತು ಸಂದಿಗಳ ರಚನೆಯನ್ನು ಎದ್ದು ಕಾಣುವಂತೆ ಮಾಡುವ ಮೂಲಕ ಗೋಡೆಗೆ ಮೆರುಗು ನೀಡುತ್ತದೆ.
ಪಾಯಿಂಟಿಂಗ್ ಸಂದಿಗಳನ್ನ ಮುಚ್ಚುವ ಮೂಲಕ ಮಳೆ ನೀರು ಅಥವಾ ತೇವಾಂಶ ಕಟ್ಟಡದ ಒಳಗೆ ಹೋಗದಂತೆ ತಡೆಯುತ್ತದೆ.
ಗಾರೆಯ ಸಂದಿಗಳನ್ನು ತುಂಬಿ ಗಟ್ಟಿಗೊಳಿಸುವುದರಿಂದ, ಇದು ಕಟ್ಟಡಕ್ಕೆ ಹೆಚ್ಚಿನ ಶಕ್ತಿ ಮತ್ತು ಸ್ಥಿರತೆಯನ್ನು ನೀಡುತ್ತದೆ.
ಗಾರೆಯು ಇಟ್ಟಿಗೆ ಅಥವಾ ಕಲ್ಲುಗಳನ್ನ ಜೋಡಿಸಲು ಬಳಸುವ ಮಿಶ್ರಣವಾಗಿದೆ. ಸಾಮಾನ್ಯವಾಗಿ ಬಳಸುವ ಬಂಧಕಗಳ ವಿಧಗಳು ಇಲ್ಲಿವೆ:
ಸುಣ್ಣದ ಗಾರೆಯನ್ನು ಶುದ್ಧ ಸುಣ್ಣ, ಮರಳು ಮತ್ತು ನೀರನ್ನು ಸಾಮಾನ್ಯವಾಗಿ 1:2 ಅಥವಾ 1:3 ಅನುಪಾತದಲ್ಲಿ ಬೆರೆಸಿ ತಯಾರಿಸಲಾಗುತ್ತದೆ. ಈ ಗಾರೆ ನಿಧಾನವಾಗಿ ಸೆಟ್ ಆಗುವುದರಿಂದ ಕೆಲಸಗಾರರಿಗೆ ಕೆಲಸ ಮಾಡಲು ಹೆಚ್ಚಿನ ಸಮಯ ಸಿಗುತ್ತದೆ ಮತ್ತು ಕಟ್ಟಡಕ್ಕೆ ಬಿರುಕು ಬಿಡದಂತೆ ಹೊಂದಿಕೊಳ್ಳುವ ಶಕ್ತಿ ನೀಡುತ್ತದೆ. ಇದು ಗೋಡೆಗಳಲ್ಲಿ ತೇವಾಂಶ ಉಳಿಯದಂತೆ ನೋಡಿಕೊಳ್ಳುತ್ತದೆ.
ಸಿಮೆಂಟ್ ಗಾರೆಯನ್ನ ಸಿಮೆಂಟ್, ಮರಳು ಮತ್ತು ನೀರನ್ನು ಸಾಮಾನ್ಯವಾಗಿ 1:3 ಅನುಪಾತದಲ್ಲಿ ಬೆರೆಸಿ ತಯಾರಿಸಲಾಗುತ್ತದೆ. ಇದು ಬೇಗ ಗಟ್ಟಿಯಾಗುತ್ತದೆ ಮತ್ತು ಹೆಚ್ಚಿನ ಶಕ್ತಿಯನ್ನು ನೀಡುತ್ತದೆ, ಆದ್ದರಿಂದ ಭಾರ ಹೊರುವ ಗೋಡೆಗಳು ಮತ್ತು ಬಹುಮಹಡಿ ಕಟ್ಟಡಗಳಿಗೆ ಇದು ಸೂಕ್ತ. ಇದು ದೀರ್ಘಕಾಲ ಬಾಳಿಕೆ ಬರುತ್ತದೆ ಮತ್ತು ನೀರಿನಿಂದ ಹಾಳಾಗುವುದಿಲ್ಲ. ಆದರೆ ಇದು ಸುಣ್ಣದ ಗಾರೆಯಷ್ಟು ಸುಲಭವಾಗಿ ಹೊಂದಿಕೊಳ್ಳುವ ಗುಣವಿರುವುದಿಲ್ಲ, ಹಾಗಾಗಿ ಸ್ವಲ್ಪ ಬದಲಾವಣೆಯಾದರೂ ಬಿರುಕು ಬಿಡುವ ಸಾಧ್ಯತೆ ಇರುತ್ತದೆ.
ಸಲಹೆ: ಬಿರುಕು ಅಥವಾ ತೇವಾಂಶದ ಸಮಸ್ಯೆಗಳನ್ನ ತಪ್ಪಿಸಲು, ಮೂಲ ಕಟ್ಟಡಕ್ಕೆ ಹೊಂದಿಕೆಯಾಗುವ ಸೂಕ್ತವಾದ ಗಾರೆಯನ್ನೇ ಬಳಸಿ.
ಸರಿಯಾದ ಗಾರೆಯನ್ನ ಬಳಸಿ ಇಟ್ಟಿಗೆಗಳ ನಡುವಿನ ಸಂದಿಗಳನ್ನ ತುಂಬುವ ಮೂಲಕ ಪಾಯಿಂಟಿಂಗ್ ಗೋಡೆಯನ್ನ ರಕ್ಷಿಸುತ್ತದೆ ಮತ್ತು ಅಂದವನ್ನ ಹೆಚ್ಚಿಸುತ್ತದೆ. ಸರಿಯಾದ ಪಾಯಿಂಟಿಂಗ್ ಮತ್ತು ಗಾರೆಯನ್ನ ಆರಿಸುವುದರಿಂದ ಗೋಡೆಗಳು ಗಟ್ಟಿಯಾಗಿ ಮತ್ತು ದೀರ್ಘಕಾಲ ಬಾಳಿಕೆ ಬರುವಂತೆ ಮಾಡಬಹುದು.
ನಿಮ್ಮ ಮನೆಯೇ ನಿಮ್ಮ ಗುರುತಾಗಿರುವುದರಿಂದ, ಗುಣಮಟ್ಟದ ಪಾಯಿಂಟಿಂಗ್ ಮಾಡಿಸುವುದು ನಿಮ್ಮ ಮನೆಯ ರಚನೆಯನ್ನು ಭದ್ರಪಡಿಸುತ್ತದೆ ಮತ್ತು ನಿಮ್ಮ ಕಾಳಜಿ ಹಾಗೂ ಹೆಮ್ಮೆಯನ್ನು ಪ್ರತಿಬಿಂಬಿಸುತ್ತದೆ.
ಕೊನೆಯದಾಗಿ ಹೇಳಬೇಕೆಂದರೆ, ಪಾಯಿಂಟಿಂಗ್ ಕೆಲಸವು ಕಟ್ಟಡಕ್ಕೆ ಬಲ ತುಂಬಲು, ಮಳೆಯಿಂದ ರಕ್ಷಿಸಲು, ಅಂದವನ್ನ ಹೆಚ್ಚಿಸಲು ಮತ್ತು ನಿರ್ವಹಣೆಯನ್ನು ಕಡಿಮೆ ಮಾಡಲು ಬಹಳ ಮುಖ್ಯ. ದೀರ್ಘಕಾಲದ ಬಾಳಿಕೆ ಮತ್ತು ಅಂದಕ್ಕಾಗಿ ಸರಿಯಾದ ಪಾಯಿಂಟಿಂಗ್ ತಂತ್ರ ಮತ್ತು ಗಾರೆಯನ್ನ ಆಯ್ಕೆ ಮಾಡುವುದು ಅವಶ್ಯಕ.
ಬ್ರಿಕ್ ಪಾಯಿಂಟಿಂಗ್ ಅಂದ್ರೆ ಇಟ್ಟಿಗೆಗಳ ನಡುವಿನ ಸಂದಿಗಳನ್ನ ಗಾರೆಯಿಂದ ತುಂಬಿ ಅಂದಗೊಳಿಸುವ ಪ್ರಕ್ರಿಯೆ. ಇದು ಗೋಡೆಯನ್ನ ಗಟ್ಟಿಗೊಳಿಸುತ್ತದೆ, ನೀರು ಒಳಹೋಗದಂತೆ ತಡೆಯುತ್ತದೆ ಮತ್ತು ಕಟ್ಟಡದ ಅಂದವನ್ನ ಹೆಚ್ಚಿಸುತ್ತದೆ.
ಸಾಮಾನ್ಯವಾಗಿ ಪಾಯಿಂಟಿಂಗ್ ಟೂಲ್ ಬಳಸಲಾಗುತ್ತದೆ. ಇದನ್ನು ಇಟ್ಟಿಗೆ ಸಂದಿಗಳಲ್ಲಿ ಗಾರೆಯನ್ನ ಒತ್ತಿ ತುಂಬಲು ಮತ್ತು ಸರಿಯಾದ ಆಕಾರ ನೀಡಲು ಬಳಸಲಾಗುತ್ತದೆ.
ಅತ್ಯುತ್ತಮ ಪಾಯಿಂಟಿಂಗ್ ಯಾವುದು ಅನ್ನೋದು ಕಟ್ಟಡ ಮತ್ತು ಉದ್ದೇಶದ ಮೇಲೆ ನಿರ್ಧಾರವಾಗುತ್ತೆ, ಆದರೆ ಫ್ಲಶ್ ಪಾಯಿಂಟಿಂಗ್ ಅದರ ಬಾಳಿಕೆ ಮತ್ತು ಅಚ್ಚುಕಟ್ಟಾದ ನೋಟಕ್ಕಾಗಿ ಹೆಚ್ಚು ಬಳಕೆಯಲ್ಲಿದೆ.
ಪಾಯಿಂಟಿಂಗ್ ಕೆಲಸಕ್ಕೆ ಸಾಮಾನ್ಯವಾಗಿ ಆರ್ಡಿನರಿ ಪೋರ್ಟ್ಲ್ಯಾಂಡ್ ಸಿಮೆಂಟ್ ಅನ್ನು ಮರಳಿನ ಜೊತೆ ಇದರ ಶಕ್ತಿ ಮತ್ತು ಬೇಗ ಸೆಟ್ ಆಗುವ ಗುಣದಿಂದಾಗಿ ಬೆರೆಸಿ ಬಳಸಲಾಗುತ್ತದೆ. ಹಳೆಯ ಕಾಲದ ಅಥವಾ ಸುಣ್ಣ ಆಧಾರಿತ ಕಟ್ಟಡಗಳ ರಿಪೇರಿ ಕೆಲಸಕ್ಕೆ ಹೆಚ್ಚಿನ ಸುಣ್ಣವಿರುವ ಗಾರೆ ಒಳ್ಳೆಯದು, ಯಾಕಂದ್ರೆ ಅದು ಹೆಚ್ಚು ಹೊಂದಿಕೊಳ್ಳುವ ಗುಣ ಹೊಂದಿರುತ್ತದೆ ಮತ್ತು ಗಾಳಿಯಾಡುವಿಕೆಗೆ ಸಹಾಯ ಮಾಡುತ್ತದೆ.
ಸುಣ್ಣದ ಪಾಯಿಂಟಿಂಗ್ ಮೆತ್ತಗಿರುತ್ತೆ ಮತ್ತು ಸುಣ್ಣದ ಪುಡಿಯಂತೆ ಅನಿಸಬಹುದು, ಆದರೆ ಸಿಮೆಂಟ್ ಪಾಯಿಂಟಿಂಗ್ ತುಂಬಾ ಗಟ್ಟಿಯಾಗಿರುತ್ತೆ ಮತ್ತು ಕಠಿಣವಾಗಿರುತ್ತದೆ. ಬಣ್ಣದಲ್ಲೂ ವ್ಯತ್ಯಾಸವಿರುತ್ತೆ; ಸುಣ್ಣದ ಗಾರೆ ತಿಳಿ ಬಿಳಿ ಬಣ್ಣದಲ್ಲಿರುತ್ತದೆ, ಸಿಮೆಂಟ್ ಗಾರೆ ಸಾಮಾನ್ಯವಾಗಿ ಬೂದು ಬಣ್ಣದಲ್ಲಿರುತ್ತದೆ.
