Share:
ವಿದ್ಯುತ್ ವೈರಿಂಗ್ ಸಮಯದಲ್ಲಿ ಔಟ್‌ಲೆಟ್‌ಗಳನ್ನು(ಪವರ್‌ ಪಾಯಿಂಟ್‌ಗಳನ್ನು) ಜೋಡಿಸುವಾಗ ಸೌಕರ್ಯ ಮತ್ತು ಸುರಕ್ಷತೆಯನ್ನು ಗಮನದಲ್ಲಿಟ್ಟುಕೊಳ್ಳುವುದು ಅತ್ಯಂತ ಅವಶ್ಯವಾಗಿದೆ. ಮನೆಯ ವಿದ್ಯುತ್ ವೈರ್‌ ಯೋಜನೆ ಮಾಡುವಾಗ ಹೆಚ್ಚು ವಿದ್ಯುತ್ ಅಗತ್ಯವಿರುವ ಸ್ಥಳಗಳನ್ನು ಗಮನದಲ್ಲಿಟ್ಟುಕೊಳ್ಳಿ. ಅಡುಗೆಮನೆ, ಹಾಲ್‌ ಮತ್ತು ಬೆಡ್‌ರೂಂನಲ್ಲಿ ಹೆಚ್ಚು ವಿದ್ಯುತ್ ಪಾಯಿಂಟ್‌ಗಳ ಅಗತ್ಯವಿರುತ್ತದೆ. ವಿಶೇಷವಾಗಿ ಕೌಂಟರ್‌ಟಾಪ್‌ಗಳು, ಮನರಂಜನಾ ಪ್ರದೇಶಗಳು ಮತ್ತು ಬೆಡ್‌ ಪಕ್ಕದ ಟೇಬಲ್‌ಗಳಲ್ಲಿ ಹೆಚ್ಚು ವಿದ್ಯುತ್ ಔಟ್‌ಲೆಟ್‌ಗಳ ಅಗತ್ಯವಿರುತ್ತದೆ.
ಮನೆಯ ಹೊರಗಡೆ ಗಾರ್ಡನ್‌ ಟೂಲ್‌ಗಳಿಗೆ ಅಥವಾ ಹಾಲಿಡೇ ಲೈಟ್‌ಗಳಿಗೆ ಬಳಸಲು ಸೂಕ್ತವಾಗುವಂತೆ ಅವಶ್ಯವಿರುವಷ್ಟು ವಿದ್ಯುತ್ ಪಾಯಿಂಟ್‌ಗಳನ್ನು ಇಡಲು ಮರೆಯಬೇಡಿ. ಕಿಟಕಿ ಅಥವಾ ಬಾಗಿಲುಗಳ ಹತ್ತಿರ ಸ್ವಿಚ್‌ ಬೋರ್ಡ್‌ ಇತ್ಯಾದಿ ಔಟ್‌ಲೆಟ್‌ಗಳನ್ನು ಅಳವಡಿಸಿದರೆ ವಾಕ್ಯೂಮಿಂಗ್‌ ಮತ್ತು ಇತರೆ ಕೆಲಸಗಳಿಗೆ ಹೆಚ್ಚು ಅನುಕೂಲವಾಗುತ್ತದೆ.
ಆಧುನಿಕ ಎಲೆಕ್ಟ್ರಿಕಲ್‌ ವ್ಯವಸ್ಥೆಗಳಲ್ಲಿ ವಿದ್ಯುತ್ ದಕ್ಷತೆ ಅಥವಾ ವಿದ್ಯುತ್ ಉಳಿತಾಯ ಮಾಡಲು ಹೆಚ್ಚು ಆದ್ಯತೆ ನೀಡಬೇಕು. ವಿದ್ಯುತ್ ಉಳಿತಾಯ ಮಾಡುವ ವೈರಿಂಗ್ ಮತ್ತು ಉಪಕರಣಗಳನ್ನು ಬಳಸುವ ಮೂಲಕ ನಿಮ್ಮ ವಿದ್ಯುತ್ ಬಿಲ್‌ಗಳನ್ನು ಕಡಿಮೆ ಮಾಡಬಹುದು. ಜತೆಗೆ, ಪರಿಸರದ ಮೇಲೆ ಉಂಟಾಗುವ ಹಾನಿಯನ್ನು ಕಡಿಮೆ ಮಾಡಬಹುದು. ಕಡಿಮೆ ವೋಲ್ಟೇಜ್‌ ವೈರ್‌ಗಳು, ಎನರ್ಜಿ-ಸೆವಿಂಗ್‌ ಪವರ್‌ ಪಾಯಿಂಟ್‌ಗಳು ಮತ್ತು ಸ್ಮಾರ್ಟ್‌ ಹೋಮ್‌ ಸಿಸ್ಟಮ್‌ಗಳನ್ನು ಇದಕ್ಕಾಗಿ ಪರಿಗಣಿಸಬಹುದು. ಇದರೊಂದಿಗೆ ಪ್ರೋಗ್ರಾಮೇಬಲ್‌ ಥರ್ಮೋಸ್ಟಾಟ್‌ ಮತ್ತು ಎನರ್ಜಿ-ಎಫಿಶಿಯಂಟ್‌ ಲೈಟಿಂಗ್‌ ಕಡೆಗೂ ಗಮನ ನೀಡಿ. ಇವು ನಿಮ್ಮ ಮನೆಯ ವಿದ್ಯುತ್ ಬಳಕೆಯನ್ನು ಸಾಕಷ್ಟು ಕಡಿಮೆ ಮಾಡುತ್ತದೆ.
ನಿಮ್ಮ ಮನೆಯ ಅವಶ್ಯಕತೆಗೆ ತಕ್ಕಂತೆ ಕಸ್ಟಮ್‌ ಆಗಿ ವಿನ್ಯಾಸ ಮಾಡಿಕೊಂಡಿರುವ ಲೈಟ್‌ ಸ್ವಿಚ್‌ಗಳಿಂದ ಮನೆಯ ಅಂದ ಹೆಚ್ಚುತ್ತದೆ. ಡಿಮ್ಮರ್‌ ಸ್ವಿಚ್‌ಗಳು, ಚಲನೆಗೆ ಪ್ರತಿಕ್ರಿಯಿಸುವ (ಮೋಶನ್‌ ಆಕ್ಟಿವೇಟೆಡ್‌) ಲೈಟ್‌ಗಳು ಮತ್ತು ಮಲ್ಟಿ-ವೇ ಸ್ವಿಚ್‌ಗಳ ಮೂಲಕವೂ ಆರಾಮವಾಗಿ ಬೆಳಕನ್ನು ನಿಯಂತ್ರಿಸಬಹುದು.
ಮನೆಗೆ ಯಾವ ಬಗೆಯ ವೈರಿಂಗ್ ವ್ಯವಸ್ಥೆ ಆಯ್ಕೆ ಮಾಡಿಕೊಳ್ಳುವಿರೋ ಅದು ನಿಮ್ಮ ಮನೆಯ ಸುರಕ್ಷತೆ ಮತ್ತು ಕಾರ್ಯದ ಮೇಲೆ ಗಮನಾರ್ಹ ಪರಿಣಾಮ ಬೀರುತ್ತದೆ. ಅತ್ಯುತ್ತಮವಾಗಿ ವಿದ್ಯುತ್ ಹರಿವಿನ ಸಾಮರ್ಥ್ಯ ಹೊಂದಿರುವುದರಿಂದ ಮತ್ತು ದೀರ್ಘಾವಧಿ ಬಾಳಿಕೆ ಬರುವ ಕಾರಣ ಹೆಚ್ಚಾಗಿ ತಾಮ್ರದ ವೈರ್‌ ಬಳಸಲಾಗುತ್ತದೆ. ಕೆಲವೊಂದು ಸಂದರ್ಭಗಳಲ್ಲಿ ವಿಶೇಷವಾಗಿ ದೊಡ್ಡ ಕೇಬಲ್‌ಗಳಿಗೆ ಅಲ್ಯೂಮಿನಿಯಂ ವೈರ್‌ಗಳನ್ನು ಸಹ ಬಳಸಲಾಗುತ್ತದೆ. ನಿಮ್ಮ ವಿಶೇಷ ಅವಶ್ಯಕತೆಗಳನ್ನು ಗಮನದಲ್ಲಿಟ್ಟುಕೊಂಡು ಸೂಕ್ತವಾದ ವೈರ್‌ ವ್ಯವಸ್ಥೆ ಆಯ್ಕೆ ಮಾಡಿಕೊಳ್ಳಲು ತಜ್ಞ ಎಲೆಕ್ಟ್ರಿಷಿಯನ್‌ಗಳ ಸಲಹೆ ಪಡೆಯುವುದು ಅಗತ್ಯವಾಗಿದೆ.
ಆಧುನಿಕ ಮನೆ ವಿನ್ಯಾಸದಲ್ಲಿ ಸೌಂದರ್ಯಕ್ಕೆ ಪ್ರಮುಖ ಆದ್ಯತೆ ಇರುತ್ತದೆ. ಮನೆಯ ವೈರಿಂಗ್ ವ್ಯವಸ್ಥೆಗಳು ಕಣ್ಣು ಕುಕ್ಕುವಂತೆ ಇರಬಾರದು. ಹೊರಗೆ ಕಾಣಿಸದಂತೆ ಮರೆಮಾಚಲು ಗೋಡೆಯೊಳಗೆ, ನೆಲದೊಳಗೆ ಅಥವಾ ಕ್ಯೂಡೊಂಟ್‌ನೊಳಗೆ ವೈರಿಂಗ್ ಮಾಡಬೇಕು. ಇದರಿಂದ ಮನೆಯ ಗೋಡೆಗಳು ಸುಂದರವಾಗಿ ಉಳಿಯುತ್ತವೆ. ಇದರೊಂದಿಗೆ ರಿಸೆಸ್ಡ್‌ ಔಟ್‌ಲೆಟ್‌ಗಳು ಮತ್ತು ಮೇಲ್ನೋಟಕ್ಕೆ ಕಾಣಿಸದ ಸ್ವಿಚ್‌ಗಳನ್ನು ಬಳಸಬಹುದು. ಈ ರೀತಿ ಸಮರ್ಪಕವಾಗಿ ವೈರಿಂಗ್ ಅನ್ನು ಮರೆಮಾಚಿದರೆ ಮನೆಯ ಸೌಂದರ್ಯದೊಂದಿಗೆ ವೈರುಗಳಿಗೆ ಹಾನಿಯಾಗುವುದೂ ತಪ್ಪುತ್ತದೆ.
ವಿದ್ಯುತ್ ವೈರಿಂಗ್ ಮಾಡುವ ವಿಷಯಕ್ಕೆ ಬಂದಾಗ ಸುರಕ್ಷತೆಯು ಅತ್ಯಂತ ಮುಖ್ಯವಾದ ವಿಚಾರವಾಗಿದೆ. ಎಲ್ಲಾ ವೈರಿಂಗ್‌ಗಳು ಸ್ಥಳೀಯ ಕಟ್ಟಡ ಕೋಡ್‌ಗಳು ಮತ್ತು ನಿಯಮಗಳಿಗೆ ಅನುಗುಣವಾಗಿ ಇರುವುದನ್ನು ಖಚಿತಪಡಿಸಿಕೊಳ್ಳುವುದು ಬಹಳ ಮುಖ್ಯ. ಇದು ಅಗ್ನಿ ಆಕಸ್ಮಿಕದಂತಹ ಸಂಭಾವ್ಯ ಅಪಾಯಗಳನ್ನು ತಡೆಯುತ್ತದೆ. ಮನೆ ತಪಾಸಣೆ ಅಥವಾ ಮಾರಾಟದ ಸಮಯದಲ್ಲಿ ಕಾನೂನು ಸಮಸ್ಯೆಗಳನ್ನು ತಪ್ಪಿಸುತ್ತದೆ.
ಮನೆಗೆ ಎಲೆಕ್ಟ್ರಿಕಲ್‌ ವೈರಿಂಗ್ ಮಾಡಲು ಮತ್ತು ಈಗಾಗಲೇ ಇರುವ ವೈರಿಂಗ್ ಅನ್ನು ಮೇಲ್ದರ್ಜೆಗೆ ಏರಿಸಲು ಪರವಾನಗಿ ಪಡೆದಿರುವ ಎಲೆಕ್ಟ್ರಿಷಿಯನ್‌ನನ್ನು ನೇಮಕ ಮಾಡಿಕೊಳ್ಳುವುದು ಅಗತ್ಯವಾಗಿದೆ. ಇವರು ಸಮರ್ಪಕವಾಗಿ ವೈರಿಂಗ್ ಗ್ರೌಂಡಿಂಗ್‌ ಮಾಡುತ್ತಾರೆ, ಸರ್ಕ್ಯೂಟ್‌ ಬ್ರೇಕರ್‌ಗಳಿಂದ ರಕ್ಷಿಸುತ್ತಾರೆ ಮತ್ತು ಇತ್ತೀಚಿನ ಸುರಕ್ಷತಾ ಮಾನದಂಡಗಳ ಪ್ರಕಾರ ವೈರಿಂಗ್ ಅಳವಡಿಸುತ್ತಾರೆ.
ಯಾವುದೇ ಸಂಭಾವ್ಯ ಸಮಸ್ಯೆಗಳು ಗಂಭೀರ ಸಮಸ್ಯೆಗಳಾಗುವುದನ್ನು ತಪ್ಪಿಸಲು ಅವುಗಳನ್ನು ಮೊದಲೇ ಗುರುತಿಸಿ ಪರಿಹರಿಸಲು ನಿಮ್ಮ ಮನೆಯ ವೈರಿಂಗ್ ವ್ಯವಸ್ಥೆಯನ್ನು ನಿಯಮಿತವಾಗಿ ಪರಿಶೀಲಿಸಲು ಮತ್ತು ನಿರ್ವಹಿಸುವುದಕ್ಕೆ ಶಿಫಾರಸು ಮಾಡಲಾಗುತ್ತದೆ.
ಮನೆಗೆ ವಿದ್ಯುತ್ ವೈರಿಂಗ್ ಮಾಡಲು ಯೋಜನೆ ರೂಪಿಸುವಾಗ ಮತ್ತು ವೈರಿಂಗ್ ಮಾಡುವಾಗ ಪರಿಗಣಿಸಬೇಕಾದ ಅಗತ್ಯ ಅಂಶಗಳನ್ನು ಈ ಮಾರ್ಗದರ್ಶಿಯಲ್ಲಿ ತಿಳಿಸಲಾಗಿದೆ. ಪವರ್‌ ಪಾಯಿಂಟ್‌ ಅಥವಾ ಔಟ್‌ಲೆಟ್‌ಗಳನ್ನು ಸರಿಯಾದ ಸ್ಥಳಗಳಲ್ಲಿ ಅಳವಡಿಸುವುದು, ವಿದ್ಯುತ್ ಉಳಿತಾಯ ಮಾಡಲು ಪ್ರಯತ್ನಿಸುವುದು, ಕಸ್ಟಮ್‌ ಬೆಳಕಿನ ಆಯ್ಕೆಗಳ ಮೂಲಕ ಕಾರ್ಯಕ್ಷಮತೆ ಮತ್ತು ಮನೆಯ ಸೌಂದರ್ಯ ಹೆಚ್ಚಿಸಬಹುದು. ಸರಿಯಾದ ರೀತಿಯ ವೈರಿಂಗ್ ವ್ಯವಸ್ಥೆ ಆಯ್ಕೆ ಮಾಡುವುದು, ಗೋಡೆಯಲ್ಲಿ ಎಲ್ಲರಿಗೂ ಕಾಣದಂತೆ ಮರೆಮಾಚುವಿಕೆ ಮಾಡುವುದು ಸುರಕ್ಷಿತವಾಗಿದೆ. ಇದರಿಂದ ಮನೆಯ ಅಂದವೂ ಹಾಳಾಗುವುದಿಲ್ಲ. ಎಲ್ಲಕ್ಕಿಂತ ಮುಖ್ಯವಾಗಿ ಅಪಾಯಗಳನ್ನು ತಡೆಗಟ್ಟಲು ಮತ್ತು ದೀರ್ಘಕಾಲ ಯಾವುದೇ ತೊಂದರೆ ಇಲ್ಲದಂತೆ ನೋಡಿಕೊಳ್ಳಲು ಸುರಕ್ಷತಾ ಮಾನದಂಡಗಳು ಮತ್ತು ಸ್ಥಳೀಯ ನಿಯಮಗಳನ್ನು ಅನುಸರಿಸುವುದು ಅತ್ಯಂತ ಅಗತ್ಯವಾಗಿದೆ.
ಮನೆಯ ಎಲೆಕ್ಟ್ರಿಕಲ್‌ ಕೆಲಸದ ಈ ಸಲಹೆಗಳನ್ನು ಪಾಲಿಸುವ ಮೂಲಕ ಮನೆಯ ಮಾಲೀಕರು ದಕ್ಷ, ಸುರಕ್ಷಿತ ಮತ್ತು ಅತ್ಯುತ್ತಮ ವಿನ್ಯಾಸ ಹೊಂದಿರುವ ಎಲೆಕ್ಟ್ರಿಕಲ್‌ ವ್ಯವಸ್ಥೆಯನ್ನು ತಮ್ಮದಾಗಿಸಿಕೊಳ್ಳಬಹುದು.
ಪರವಾನಗಿ ಪಡೆದಿರುವ ಎಲೆಕ್ಟ್ರಿಷಿಯನ್‌ ಮೂಲಕ ಮನೆಗೆ ಎಲೆಕ್ಟ್ರಿಕಲ್‌ ವೈರಿಂಗ್ ಮಾಡಲು ಯಾವಾಗಲೂ ಆದ್ಯತೆ ನೀಡಬೇಕು. ವೈರಿಂಗ್ ವಿನ್ಯಾಸವನ್ನು ಯೋಜಿಸುವುದು, ಸಮರ್ಪಕ ಮೆಟೀರಿಯಲ್‌ಗಳನ್ನು ಆಯ್ಕೆ ಮಾಡಿಕೊಳ್ಳುವುದು ಮತ್ತು ಸ್ಥಳೀಯ ಕೋಡ್‌ಗಳು ಹಾಗೂ ಸುರಕ್ಷತಾ ಮಾನದಂಡಗಳಿಗೆ ತಕ್ಕಂತೆ ಅಳವಡಿಸುವುದು ಅತ್ಯಂತ ಅಗತ್ಯವಾಗಿದೆ. ಮುಖ್ಯ ಎಲೆಕ್ಟ್ರಿಕಲ್‌ ಪ್ಯಾನೆಲ್‌ನಿಂದ ಪ್ರತಿಯೊಂದು ವಿದ್ಯುತ್ ಪಾಯಿಂಟ್‌ಗಳು, ಸ್ವಿಚ್‌ಗಳ ತನಕ ವ್ಯವಸ್ಥಿತ ವಿಧಾನ ಅನುಸರಿಸಿ ವೈರಿಂಗ್ ಮಾಡಬೇಕು.
ಗುಣಮಟ್ಟದ ಗೃಹ ಎಲೆಕ್ಟ್ರಿಕ್‌ ವೈರಿಂಗ್‌ನಲ್ಲಿ ಸಾಮಾನ್ಯವಾಗಿ ದೀರ್ಘ ಬಾಳಿಕೆ ಮತ್ತು ವಿದ್ಯುತ್ ಹರಿವು ಉತ್ತಮವಿರುವ ತಾಮ್ರದ ವೈರ್‌ಗಳನ್ನು ಬಳಸಲಾಗುತ್ತದೆ. ಲೈಟಿಂಗ್‌ ಸರ್ಕ್ಯೂಟ್‌ಗಳು, ಔಟ್‌ಲೆಟ್‌ಗಳು ಮತ್ತು ಪ್ರಮುಖ ಅಪ್ಲಿಕೇಷನ್‌ಗಳನ್ನು ವೈರಿಂಗ್ ವ್ಯವಸ್ಥೆಯು ಒಳಗೊಂಡಿರುತ್ತದೆ. ಮನೆಯ ಎಲೆಕ್ಟ್ರಿಕ್‌ ವೈರಿಂಗ್ ವ್ಯವಸ್ಥೆಗೆ ಸರ್ಕ್ಯೂಟ್‌ ಬ್ರೇಕರ್‌ಗಳು ರಕ್ಷಣೆ ನೀಡುತ್ತವೆ. ಗೋಡೆಗಳು, ಮೇಲ್ಚಾವಣಿ ಮತ್ತು ನೆಲದ ಮೇಲೆ ಸುರಕ್ಷತಾ ಮಾನದಂಡಕ್ಕೆ ತಕ್ಕಂತೆ ಅಳವಡಿಸಲಾಗುತ್ತದೆ.
ಮನೆಗೆ ವೈರಿಂಗ್ ಮಾಡುವಾಗ ತಾಮ್ರದ ವೈರ್‌ಗಳನ್ನು ಸಾಮಾನ್ಯವಾಗಿ ಉತ್ತಮ ಎಂದು ಪರಿಗಣಿಸಲಾಗುತ್ತದೆ. ಈ ವೈರ್‌ಗಳು ಅತ್ಯುತ್ತಮ ವಾಹಕ ಗುಣಗಳನ್ನು ಮತ್ತು ವಿಶ್ವಸಾರ್ಹತೆಯನ್ನು ಹೊಂದಿವೆ. ಹೀಗಿದ್ದರೂ ನಿರ್ದಿಷ್ಟ ಅಗತ್ಯಗಳು ಮತ್ತು ಸ್ಥಳೀಯ ನಿಯಮಗಳಿಗೆ ತಕ್ಕಂತೆ ಅಲ್ಯುಮಿನಿಯಂ ಅಥವಾ ಫ್ಲೆಕ್ಸಿಬಲ್‌ ಕಂಡಕ್ಟ್‌ ಸಿಸ್ಟಮ್ಸ್‌ ಇತ್ಯಾದಿ ಇತರೆ ವೈರ್‌ಗಳನ್ನೂ ಬಳಸಬಹುದು. ನಿಮ್ಮ ಮನೆಗೆ ಯಾವ ವೈರಿಂಗ್ ಉತ್ತಮ ಎಂದು ತಿಳಿಯಲು ಎಲೆಕ್ಟ್ರಿಷಿಯನ್‌ ಜತೆ ಸಮಲೋಚನೆ ಮಾಡುವುದು ಉತ್ತಮವಾಗಿದೆ.
ಮನೆಗಳಲ್ಲಿ ಸಾಮಾನ್ಯವಾಗಿ ಲೋಹವಲ್ಲದ (ಎನ್‌ಎಂ) ಕೇಬಲ್ ಅಥವಾ ರೋಮೆಕ್ಸ್ ವಿದ್ಯುತ್ ವೈರ್‌ ಬಳಸಲಾಗುತ್ತದೆ. ಇದು ಎರಡು ಅಥವಾ ಹೆಚ್ಚಿನ ಇನ್ಸುಲೇಟೆಡ್ ವೈರ್‌ಗಳು ಮತ್ತು ಬೇರ್‌ ಗ್ರೌಂಡ್‌ ವೈರ್‌ ಅನ್ನು ಒಳಗೊಂಡಿರುತ್ತದೆ. ಇವುಗಳಿಗೆ ಪ್ಲಾಸ್ಟಿಕ್‌ ಕವಚ ಹಾಕಲಾಗಿರುತ್ತದೆ. ಭಾರವಾದ ಉಪಕರಣಗಳಂತಹ ನಿರ್ದಿಷ್ಟ ಅವಶ್ಯಕತೆಗೆ ದಪ್ಪವಾದ ಗೇಜ್ ವೈರ್‌ ಅನ್ನು ಬಳಸಬಹುದು.
ಮನೆಯ ಗಾತ್ರ, ವೈರಿಂಗ್ ವ್ಯವಸ್ಥೆಯ ಸಂಕೀರ್ಣತೆಗೆ ತಕ್ಕಂತೆ ಮನೆಗೆ ಎಲೆಕ್ಟ್ರಿಕಲ್‌ ವೈರಿಂಗ್ ಮಾಡಲು ಖರ್ಚಾಗುತ್ತದೆ. ಭಾರತದಲ್ಲಿ ಸಾಮಾನ್ಯವಾಗಿ ಸಂಪೂರ್ಣವಾಗಿ ಎಲೆಕ್ಟ್ರಿಕ್‌ ವೈರಿಂಗ್ ಮಾಡಲು ಅಥವಾ ಅಪ್‌ಗ್ರೇಡ್‌ ಮಾಡಲು 1,60,000 ರೂ.ನಿಂದ 8,00,000 ರೂ.ವರೆಗೆ ಖರ್ಚಾಗಬಹುದು. ನಿಮ್ಮ ಪ್ರಾಜೆಕ್ಟ್‌ಗೆ ಒಟ್ಟು ಎಷ್ಟು ಖರ್ಚಾಗಬಹುದು ಎಂದು ತಿಳಿಯಲು ಪರವಾನಿಗೆ ಪಡೆದ ಎಲೆಕ್ಟ್ರಿಷಿಯನ್‌ನಿಂದ ಅಂದಾಜು ವೆಚ್ಚದ ಕ್ವೊಟೇಷನ್‌ ಪಡೆಯಿರಿ.
