Share:
ನಿರ್ಮಾಣ ಜಾಗದ ನಿರ್ವಹಣೆ ಎಂದರೆ ನಿರ್ಮಾಣ ಕಾಮಗಾರಿಯ ಪ್ರತಿಯೊಂದು ಅಂಶವನ್ನೂ ಗಮನಿಸುವ ಮೂಲಕ ಎಲ್ಲವೂ ನಿಮ್ಮ ಯೋಜನೆಗೆ ಅನುಗುಣವಾಗಿ ಸಮರ್ಥವಾಗಿ ನಡೆಯುತ್ತಿದೆ ಎಂಬುದನ್ನು ಖಾತ್ರಿಗೊಳಿಸಿಕೊಳ್ಳುವುದು. ಇದು ಕಾರ್ಮಿಕರೊಂದಿಗಿನ ಸಮನ್ವಯ, ಸಾಮಗ್ರಿಗಳ ನಿರ್ವಹಣೆ, ಕೆಲಸದ ವೇಳಾಪಟ್ಟಿಯ ನಿರ್ವಹಣೆ ಮತ್ತು ಸುರಕ್ಷತಾ ಕ್ರಮಗಳ ಪಾಲನೆ ಇವೆಲ್ಲವನ್ನೂ ಒಳಗೊಂಡಿದೆ.
ನಿರ್ಮಾಣ ಸ್ಥಳದ ಸರಿಯಾದ ನಿರ್ವಹಣೆಯು ಕೆಲಸದಲ್ಲಿನ ವಿಳಂಬ, ಅಧಿಕ ವೆಚ್ಚ, ಸಂವಹನದ ಕೊರತೆ ಮೊದಲಾದ ಕಟ್ಟಡ ನಿರ್ಮಾಣದಲ್ಲಿ ಸಾಮಾನ್ಯವಾಗಿ ಎದುರಾಗುವ ಸವಾಲುಗಳಿಂದ ಉಂಟಾಗಬಹುದಾದ ಅಪಾಯಗಳನ್ನು ಮಿತಗೊಳಿಸುತ್ತದೆ. ವ್ಯವಸ್ಥಿತವಾದ ವಿಧಾನದ ಮೂಲಕ ನಿರ್ಮಾಣ ಸ್ಥಳ ನಿರ್ವಹಣಕಾರರು ಕಾಮಗಾರಿಯು ಸರಿಯಾದ ಪಥದಲ್ಲಿ ಸಾಗುವುದರ ಜೊತೆಗೆ ಕೆಲಸವು ನಿರಾಳವಾಗಿ ನಡೆಯುವುದನ್ನು ಖಾತ್ರಿಗೊಳಿಸಬಹುದು.
ನಿರ್ಮಾಣ ಸ್ಥಳದ ನಿರ್ವಹಣಾ ಯೋಜನೆ ಎಂಬುದು ಕಟ್ಟಡ ನಿರ್ಮಾಣ ಪ್ರಕ್ರಿಯೆಯ ವಿವಿಧ ಅಂಶಗಳನ್ನು ಹೇಗೆ ವ್ಯವಸ್ಥಿತವಾಗಿ ಕಾರ್ಯಗತಗೊಳಿಸಬೇಕೆಂಬ ರೂಪುರೇಷೆಗಳನ್ನು ಹೊಂದಿದ ಒಂದು ಸಮಗ್ರ ನೀಲನಕ್ಷೆ. ಈ ಯೋಜನೆಯು ಕಾಮಗಾರಿಯ ಬೆನ್ನುಲಬಾಗಿದ್ದು, ಹೇಗೆ ಸಂಪನ್ಮೂಲಗಳನ್ನು ವಿತರಿಸಬೇಕು, ಕಾರ್ಮಿಕರನ್ನು ಸಂಭಾಳಿಸಬೇಕು ಮತ್ತು ಸುರಕ್ಷೆ ಮತ್ತು ಗುಣಮಟ್ಟದ ಪ್ರಮಾಣವನ್ನು ಕಾಯ್ದುಕೊಳ್ಳಬೇಕೆಂಬ ಬಗ್ಗೆ ಸ್ಪಷ್ಟ ನಿರ್ದೇಶನಗಳನ್ನು ನೀಡುತ್ತದೆ.
ನೀವು ನಿಮ್ಮ ಮನೆಯನ್ನು ಒಂದೇ ಬಾರಿ ಕಟ್ಟುವುದರಿಂದ, ನಿಮ್ಮ ನಿರೀಕ್ಷೆ ಮತ್ತು ದೃಷ್ಟಿಕೋನಕ್ಕೆ ಎಲ್ಲಾ ಅಂಶಗಳು ಸರಿಹೊಂದುವಂತಹ ಸೂಕ್ತ ಯೋಜನೆಯನ್ನು ಹೊಂದುವುದು ಅತ್ಯವಶ್ಯ. ನಿರ್ಮಾಣ ಸ್ಥಳದ ನಿರ್ವಹಣೆಗೆ ಒಂದು ಘನವಾದ ಯೋಜನೆಯನ್ನು ರೂಪಿಸುವುದರಿಂದ ಕಾಮಗಾರಿಯು ನಿರಾಳವಾಗಿ ನಡೆಯುವುದಲ್ಲದೆ, ದೋಷಗಳು ಸಂಭವಿಸುವ ಸಾಧ್ಯತೆ ಕಡಿಮೆಯಾಗಿ, ವಿಳಂಬ ಮತ್ತು ಅಧಿಕ ವೆಚ್ಚವನ್ನು ತಡೆಯಬಹುದು.
ಸುರಕ್ಷತಾ ಕ್ರಮಗಳು: ನಿರ್ಮಾಣ ಸ್ಥಳದಲ್ಲಿ ಅವಗಢಗಳನ್ನು ತಡೆಯಲು ರಕ್ಷಣಾ ಕವಚಗಳು, ಯಂತ್ರಗಳ ಬಳಕೆ ಮತ್ತು ತುರ್ತು ಸ್ಥಿತಿಯ ಕ್ರಮಗಳ ಕುರಿತಾದ ಮಾರ್ಗದರ್ಶಿ ಸೇರಿದಂತೆ ಸುರಕ್ಷಾ ಪ್ರೊಟೊಕಾಲ್ಗಳ ರೂಪುರೇಷೆಯನ್ನು ಸಿದ್ದಪಡಿಸುವುದು.
ವೇಳಾಪಟ್ಟಿ: ನಿರ್ಮಾಣ ಸ್ಥಳವನ್ನು ಸಿದ್ದಪಡಿಸುವುದರಿಂದ ಹಿಡಿದು ಅಂತಿಮ ಮೇಲ್ವಿಚಾರಣೆಯ ತನಕ ಮಾಡಬೇಕಾದ ಕೆಲಸಗಳ ವಿಸ್ಕೃತ ವೇಳಾಪಟ್ಟಿಯನ್ನು ಸಿದ್ದಪಡಿಸುವುದು, ಆ ಮೂಲಕ ಕಾಮಗಾರಿಯ ಪ್ರತೀ ಹಂತವು ಸರಿಯಾದ ಸಮಯಕ್ಕೆ ಮುಗಿಯುವುದನ್ನು ಖಾತ್ರಿಗೊಳಿಸಿಕೊಳ್ಳುವುದು.
ಸಂಪನ್ಮೂಲಗಳ ವಿತರಣೆ: ನಿರ್ಮಾಣದ ಪ್ರತೀ ಹಂತದಲ್ಲಿ ಅವಶ್ಯವಿರುವ ಸಾಮಗ್ರಿಗಳು, ಉಪಕರಣಗಳು ಮತ್ತು ಕಾರ್ಮಿಕರನ್ನು ಗುರುತಿಸುವುದು. ಇದರಲ್ಲಿ ವಿಳಂಬವನ್ನು ತಡೆಯಲು ಸಂಗ್ರಹಣೆಯ ನಿರ್ವಹಣೆ ಮತ್ತು ವಿತರಣೆಯನ್ನು ನಿಗದಿಪಡಿಸುವುದೂ ಸೇರಿದೆ.
ಸಂವಹನಾ ತಂತ್ರಗಳು: ಕಾಂಟ್ರ್ಯಾಕ್ಟರ್ಗಳು, ಕಾರ್ಮಿಕರು ಮತ್ತು ಸರಬರಾಜುದಾರರೊಂದಿಗೆ ಸ್ಪಷ್ಟ ಸಂವಹನ ಮಾಧ್ಯಮವನ್ನು ರೂಪಿಸಿಕೊಳ್ಳುವುದು. ನಿಯಮಿತ ಮಾಹಿತಿ ಸಂಗ್ರಹ ಮತ್ತು ಪರಿಶೀಲನೆಯು ಪ್ರತಿಯೊಬ್ಬರೂ ಕಾಮಗಾರಿಯನ್ನು ಗುರಿಮುಟ್ಟಿಸುವ ನಿಟ್ಟಿನಲ್ಲಿ ಸಾಗುತ್ತಿದ್ದಾರೆಂಬುದನ್ನು ಖಾತ್ರಿಪಡಿಸುತ್ತದೆ.
ಸ್ಪಷ್ಟ ಮತ್ತು ವಿಸ್ಕೃತವಾದ ನಿರ್ಮಾಣ ಸ್ಥಳ ನಿರ್ವಹಣಾ ಯೋಜನೆಯು ಅತಿಮುಖ್ಯ ಏಕೆಂದರೆ ಇದು ಯೋಜನೆಗೆ ಸಂಬಂಧಿಸಿದ ಎಲ್ಲರಿಂದಲೂ ನಿಮ್ಮ ನಿರೀಕ್ಷೆ ಏನೆಂಬುದನ್ನು ಗೊತ್ತು ಮಾಡುತ್ತದೆ. ಮುಂಚಿತವಾಗಿಯೇ ಅವರವರ ಪಾತ್ರ ಮತ್ತು ಜವಾಬ್ಧಾರಿಗಳನ್ನು ತಿಳಿಸಿಕೊಡುವುದರಿಂದ ಯಾವುದೇ ಗೊಂದಲಕ್ಕೆ ಆಸ್ಪದ ನೀಡದೆ ನಿರ್ಮಾಣ ಕಾರ್ಯದಲ್ಲಿ ಯಾವುದೇ ದೋಷಗಳು ಅಥವಾ ವಿಳಂಬಗಳು ಉಂಟಾಗುವ ಸಾಧ್ಯತೆ ಕಡಿಮೆಯಾಗುತ್ತದೆ. ಅಂತಿಮವಾಗಿ ನಿಮ್ಮ ಮನೆಯನ್ನು ಸರಿಯಾಗಿ ನಿರ್ಮಿಸಲು ನಿಮಗಿರುವುದು ಒಂದೇ ಅವಕಾಶ.
ನೀವು ಮೊದಲ ಬಾರಿಗೆ ಮನೆ ಕಟ್ಟುತ್ತಿರುವುರಾದರೆ ನಿರ್ಮಾಣ ಸ್ಥಳದ ನಿರ್ವಹಣಾ ಯೋಜನೆಯನ್ನು ತಯಾರಿಸುವುದು ಸಂಕೀರ್ಣವೆಂದು ಅನಿಸಬಹುದು. ಆದರೆ ನಿಮ್ಮ ಗುತ್ತಿಗೆದಾರರಿಂದ ಸರಿಯಾದ ಮಾರ್ಗದರ್ಶನ ಸಿಕ್ಕಿದರೆ ಇದೊಂದು ವ್ಯವಸ್ಥಿತವಾದ ಮತ್ತು ನಿರ್ವಹಿಸಬಹುದಾದ ಕ್ರಿಯೆಯಾಗಿದೆ. ಅದಕ್ಕೆ ಬೇಕಾದ ಹಂತ ಹಂತದ ಮಾರ್ಗದರ್ಶನ ಇಲ್ಲಿದೆ:
ನಿಮ್ಮ ಕಾಂಟ್ರ್ಯಾಕ್ಟರ್ ಜೊತೆಗೆ ಸ್ಪಷ್ಟ ಗುರಿಗಳನ್ನು ಗೊತ್ತುಪಡಿಸಿಕೊಳ್ಳುವುದರೊಂದಿಗೆ ಆರಂಭಿಸಿ. ಅವುಗಳಿಂದ ನಿಮ್ಮ ಗೃಹ ನಿರ್ಮಾಣ ಕಾಮಗಾರಿಯಲ್ಲಿ ನೀವು ಏನೆಲ್ಲಾ ಮಾಡಬೇಕೆಂದಿದ್ದೀರಿ ಎಂಬ ರೂಪುರೇಷೆಯನ್ನು ಸಿದ್ದಪಡಿಸಬಹುದು. ಪರಿಗಣಿಸಬೇಕಾದ ಅಂಶಗಳೆಂದರೆ:
ಸಮಾಪ್ತಿಯಾಗಬೇಕಾದ ಕಾಲ: ನಿಮ್ಮ ಮನೆ ಯಾವಾಗ ಸಂಪೂರ್ಣವಾಗಬೇಕು?
ಬಜೆಟ್: ಯೋಜನೆಗೆ ನಿಮ್ಮ ಹಣಕಾಸು ಪರಿಮಿತಿ ಏನು?
ಗುಣಮಟ್ಟದ ಪ್ರಮಾಣ: ನೀವು ನಿರ್ದಿಷ್ಟವಾಗಿ ಬಯಸುವ ಲಕ್ಷಣಗಳು ಅಥವಾ ಫಿನಿಶಿಂಗ್ಗಳು ಯಾವುದಾದರೂ ಇವೆಯೇ?
ನಿಮ್ಮ ಇಡೀ ಯೋಜನೆಯನ್ನು ಸಣ್ಣ ಸಣ್ಣ ನಿರ್ದಿಷ್ಟ ಕಾರ್ಯಗಳಾಗಿ ವಿಂಗಡಿಸಿಕೊಳ್ಳಿ. ಒಬ್ಬ ಉತ್ತಮ ಗುತ್ತಿಗೆದಾರ ನಿಮಗೆ ಯಾವ ಹಂತದಲ್ಲಿ ಯಾವ ಕೆಲಸಗಳು ಆಗಬೇಕು ಎಂಬುದನ್ನು ಗುರುತಿಸುವ ಮತ್ತು ಜವಾಬ್ಧಾರಿಗಳನ್ನು ಹಂಚುವ ವಿಷಯದಲ್ಲಿ ಮಾರ್ಗದರ್ಶನ ನೀಡುತ್ತಾನೆ. ಉದಾಹರಣೆಗೆ:
ನಿವೇಶನವನ್ನು ಸ್ವಚ್ಛಗೊಳಿಸಿ ಸಿದ್ದಪಡಿಸುವುದು.
ಅಡಿಪಾಯ ಹಾಕುವುದು
ಗೋಡೆ ಮತ್ತು ಛಾವಣಿಯನ್ನು ನಿರ್ಮಿಸುವುದು.
ನಿಮ್ಮ ಗುತ್ತಿಗೆದಾರರ ಜೊತೆ ನಿರ್ಮಾಣ ಸ್ಥಳಕ್ಕೆ ಭೇಟಿ ನೀಡಿ ಅದರ ನಿರ್ದಿಷ್ಟ ಗುಣಲಕ್ಷಣಗಳು ಮತ್ತು ಸವಾಲುಗಳ ಮೌಲ್ಯಮಾಪನ ಮಾಡಿ. ಅವರ ಪರಿಣತಿಯು ಪ್ರಮುಖ ಸವಾಲುಗಳನ್ನು ಎದುರಿಸಲು ಸಹಾಯ ಮಾಡುತ್ತದೆ:
ನಿವೇಶನಕ್ಕೆ ಕಟ್ಟಡ ನಿರ್ಮಾಣ ಯಂತ್ರಗಳ ಪ್ರವೇಶದ ಅನುಕೂಲತೆ
ಅಸಮವಾದ ನೆಲ ಅಥವಾ ಹತ್ತಿರದಲ್ಲಿರುವ ಅಡೆತಡೆಗಳಂತಹ ಸವಾಲುಗಳು
ಸ್ಥಳೀಯ ಆಡಳಿತದಿಂದ ಪಡೆಯಬೇಕಾದ ಅನುಮತಿ ಅಥವಾ ಅನುಮೋದನೆಗಳು
ನಿರ್ಮಾಣದ ಪ್ರತೀ ಭಾಗವು ಎಷ್ಟು ಸಮಯವನ್ನು ತೆಗೆದುಕೊಳ್ಳುವುದೆಂದು ನಿರ್ಧರಿಸಿ. ಉದಾಹರಣೆಗೆ, ಅಡಿಪಾಯ ಹಾಕುವುದು ಎರಡು ವಾರ ತೆಗೆದುಕೊಂಡರೆ ಗೋಡೆಗಳ ನಿರ್ಮಾಣಕ್ಕೆ ಒಂದು ತಿಂಗಳು ಹಿಡಿಯಬಹುದು. ಈ ಕಾಲಮಿತಿಗಳನ್ನು ಅನುಕ್ರಮವಾಗ ಬರೆದಿಡುವ ಮೂಲಕ ಕಾಮಗಾರಿ ಸಾಗಿದಂತೆ ಅದರ ಪ್ರಗತಿಯನ್ನು ಗಮನಿಸಬಹುದು.
ಸಾಮಗ್ರಿಗಳ ವ್ಯವಸ್ಥೆಯನ್ನುನೀವೇ ಸ್ವತಃ ಮಾಡುವುದೋ ಅಥವಾ ನಿಮ್ಮ ಕಂಟ್ರ್ಯಾಕ್ಟರ್ ಮಾಡುವುದೋ ಎಂಬುದನ್ನು ಖಚಿತಗೊಳಿಸಿಕೊಳ್ಳಿ. ಪ್ರತೀ ಕಾರ್ಯಕ್ಕೆ ಏನೇನು ಬೇಕು ಎಂಬ ಬಗ್ಗೆ ಆಲೋಚಿಸಿ:
ಕೆಲಸಗಾರರ ವಿಧ ಮತ್ತು ಸಂಖ್ಯೆ (ಇಟ್ಟಿಗೆ ಕಟ್ಟುವವರು. ಬಡಗಿಗಳು ಇತ್ಯಾದಿ)
ಸಾಮಗ್ರಿಗಳು (ಸಿಮೆಂಟು, ಇಟ್ಟಿಗೆ, ಟೈಲ್ಸ್) ಮತ್ತು ಅವುಗಳ ಸರಬರಾಜುದಾರರು
ಅಗತ್ಯ ಉಪಕರಣಗಳಾದ ಮಿಕ್ಸರ್ ಅಥವಾ ಸ್ಕ್ಯಾಫೋಲ್ಡಿಂಗ್(ತಾತ್ಕಾಲಿಕ ಅಟ್ಟಣೆ)
ಉತ್ತಮ ಸಂವಹನ ಅತಿಮುಖ್ಯ! ಗುತ್ತಿಗೆದಾರರು, ಕಾರ್ಮಿಕರು ಮತ್ತು ಸರಬರಾಜುದಾರರು ಸೇರಿದಂತೆ ಕಾಮಗಾರಿಗೆ ಸಂಬಂಧಿಸಿದ ಎಲ್ಲರೂ ತಮ್ಮ ತಮ್ಮ ಪಾತ್ರ ಮತ್ತು ಜವಾಬ್ಧಾರಿಯನ್ನು ಅರಿತಿರುವರೆಂಬುದನ್ನು ಖಾತ್ರಿಪಡಿಸಿಕೊಳ್ಳಿ. ನಿಯಮಿತ ಭೇಟಿ ಅಥವಾ ಕರೆಗಳ ಮುಖಾಂತರ ಕೆಲಸದ ಪ್ರಗತಿಯನ್ನು ಪರಿಶೀಲಿಸಿ ಮತ್ತು ಯಾವುದೇ ಸಮಸ್ಯೆ ಎದುರಾದಲ್ಲಿ ತಕ್ಷಣ ಬಗೆಹರಿಸಿ.
ನಿಮ್ಮ ನಿರ್ಮಾಣ ಸ್ಥಳದಲ್ಲಿ ಸುರಕ್ಷತೆಗೆ ಸದಾ ಮೊದಲ ಆದ್ಯತೆಯಿರಲಿ. ಇದು ಪ್ರತಿಯೊಬ್ಬರನ್ನೂ ರಕ್ಷಿಸುವುದಲ್ಲದೆ ಅವಗಢಗಳಿಂದಾಗಿ ಕಾಮಗಾರಿ ವಿಳಂಬವಾಗುವುದನ್ನು ತಡೆಯುತ್ತದೆ.
ಕೆಲಸ ಹೇಗೆ ನಡೆಯುತ್ತಿದೆ ಎಂಬುದನ್ನು ತಿಳಿಯಲು ಆಗಾಗ್ಗೆ ನಿರ್ಮಾಣ ಸ್ಥಳಕ್ಕೆ ಭೇಟಿ ನೀಡುತ್ತಿರಿ. ನೀವು ಅಂದುಕೊಂಡ ರೀತಿಯಲ್ಲಿ ಮತ್ತು ಬಜೆಟ್ನ ಪರಿಮಿತಿಯಲ್ಲಿ ಕೆಲಸವು ಸಾಗುತ್ತಿದೆಯೇ ಎಂಬುದನ್ನು ಪರಿಶೀಲಿಸಿ. ವಿಳಂಬ ಅಥವಾ ಅಧಿಕ ವೆಚ್ಚದಂತಹ ವ್ಯತ್ಯಯಗಳು ಕಂಡುಬಂದರೆ ತಕ್ಷಣ ನಿಮ್ಮ ಕಾಂಟ್ರ್ಯಾಕ್ಟರ್ ಜೊತೆ ಮಾತನಾಡಿ ಅದನ್ನು ಸರಿಪಡಿಸಿ.
ಗೃಹನಿರ್ಮಾಣದ ಸಂದರ್ಭದಲ್ಲಿ ಅಗತ್ಯ ವಸ್ತುಗಳ ಕೊರತೆ ಅಥವಾ ಹವಾಮಾನ ವೈಪರಿತ್ಯದಂತಹ ಸನ್ನಿವೇಶಗಳು ದಿಡೀರನೆ ಎದುರಾಗಬಹುದು. ಅವಶ್ಯಕತೆ ಬಿದ್ದಾಗ ನಿಮ್ಮ ಯೋಜನೆಯನ್ನು ಸನ್ನಿವೇಶಕ್ಕೆ ತಕ್ಕಂತೆ ಬದಲಾಯಿಸಿಕೊಳ್ಳಲು ಸಿದ್ದರಾಗಿರಿ. ತುರ್ತು ಪರಿಸ್ಥಿತಿಗಳಿಗಾಗಿ ಒಂದಿಷ್ಟು ಹೆಚ್ಚಿಗೆ ಹಣವನ್ನು ನಿಮ್ಮ ಬಜೆಟ್ನಲ್ಲಿ ಇರಿಸಿಕೊಳ್ಳುವುದು ಸಹಾಯಕವಾಗುತ್ತದೆ.
ನಿರ್ಮಾಣ ಕಾರ್ಯ ಮುಗಿಯುವ ಹಂತಕ್ಕೆ ಬಂದಾಗ:
ನಿಮ್ಮ ಗುತ್ತಿಗೆದಾರರೊಂದಿಗೆ ನಿರ್ಮಾಣ ಸ್ಥಳಕ್ಕೆ ಭೇಟಿ ನೀಡಿ ಎಲ್ಲಾ ಕೆಲಸಗಳು ನಿರೀಕ್ಷೆಗೆ ತಕ್ಕಂತೆ ನಡೆದಿದೆ ಎಂಬುದನ್ನು ಖಚಿತಪಡಿಸಿಕೊಳ್ಳಿ.
ಅಗತ್ಯ ದಾಖಲೆಗಳಾದ ವಾರಂಟಿ, ಅನುಮತಿಗಳು ಮತ್ತು ತಪಾಸಣಾ ವರದಿಗಳನ್ನು ಸಂಗ್ರಹಿಸಿಟ್ಟುಕೊಳ್ಳಿ.
ನಿರ್ಮಾಣ ಸ್ಥಳದ ನಿರ್ವಹಣೆ ಎಂದರೆ ಏನೆಂದು ಅರಿತ ನಂತರ ಈಗ ಮೊದಲ ಬಾರಿ ಮನೆ ಕಟ್ಟುವವರು ಯಾವುದೇ ಗೊಂದಲಗಳಿಲ್ಲದೆ ಪರಿಣಾಮಕಾರಿಯಾಗಿ ನಿರ್ಮಾಣ ಸ್ಥಳ ನಿರ್ವಹಣೆಯನ್ನು ಮಾಡಲು ಕೆಲವು ಅಂಶಗಳನ್ನು ತಿಳಿದುಕೊಳ್ಳುವ ಸಮಯ. ಕೆಲವು ಅಗತ್ಯ ಸಲಹೆಗಳನ್ನು ಈ ಕೆಳಗೆ ವಿವರಿಸಲಾಗಿದೆ:
೧. ಸ್ಪಷ್ಟವಾದ ಯೋಜನೆ ರೂಪಿಸಿ: ಮೊದಲಿಗೆ ಕಾಮಗಾರಿಯ ಎಲ್ಲಾ ಆಶಯಗಳನ್ನು ಒಳಗೊಂಡ ಒಂದು ವಿಸ್ಕೃತವಾದ ನಿರ್ಮಾಣ ಸ್ಥಳ ನಿರ್ವಹಣಾ ಯೋಜನೆಯನ್ನು ಸಿದ್ದಪಡಿಸಿಟ್ಟುಕೊಳ್ಳಿ. ಇದು ಎಲ್ಲರೂ ಸಂಘಟಿತರಾಗಿ ಯೋಜನೆಯ ಮೇಲೆ ಗಮನ ಕೇಂದ್ರೀಕರಿಸುವಂತೆ ಮಾಡಲು ಸಹಕಾರಿಯಾಗಿದೆ.
೨. ನುರಿತ ವೃತ್ತಿಪರರನ್ನು ನೇಮಿಸಿಕೊಳ್ಳಿ: ನಿಮ್ಮ ಕಾಂಟ್ರ್ಯಾಕ್ಟರ್ ಆಯ್ಕೆಯ ವಿಷಯ ಬಂದಾಗ ಎಂದಿಗೂ ರಾಜಿಯಾಗಬೇಡಿ. ನಿಮ್ಮ ಕಟ್ಟಡದ ಗುಣಮಟ್ಟ ಅವರ ಪರಿಣತಿಯ ಮೇಲೆ ಅವಲಂಬಿತವಾಗಿದೆ. ನುರಿತ ಮತ್ತು ಅನುಭವಿ ಗುತ್ತಿಗೆದಾರರು ನಿರ್ಮಾಣ ಸ್ಥಳದ ಸಂಕೀರ್ಣತೆಗಳನ್ನು ನಿಭಾಯಿಸುವ ಚಾತುರ್ಯ ಹೊಂದಿರುತ್ತಾರೆ, ಹಾಗಾಗಿ ಕಾಮಗಾರಿಯ ಎಲ್ಲ ಆಶಯಗಳೂ ಯೋಜನೆಯ ಅನುಸಾರ ಯಾವುದೇ ಅಡೆತಡೆಗಳಿಲ್ಲದೇ ಕಾರ್ಯಗತವಾಗುವುದನ್ನು ಖಾತ್ರಿಗೊಳಿಸುತ್ತಾರೆ. ಕಾಮಗಾರಿಯ ನಡುವಿನಲ್ಲಿ ಕಾಂಟ್ರ್ಯಾಕ್ಟರ್ರನ್ನು ಬದಲಿಸುವುದು ಅಸ್ಥಿರತೆಗೆ ಕಾರಣವಾಗಿ ಅಂತಿಮ ಫಲಿತಾಂಶದ ಮೇಲೂ ಪರಿಣಾಮ ಬೀರಬಹುದು.
೩. ಪ್ರಗತಿಯನ್ನು ಗಮನಿಸಿ: ಯೋಜನೆಯು ನಿಮ್ಮ ಬಜೆಟ್ ಮತ್ತು ಕಾಲಮಿತಿಗೆ ಅನುಗುಣವಾಗಿ ನಡೆಯುತ್ತಿದೆ ಎಂಬುದನ್ನು ಖಚಿತಪಡಿಸಿಕೊಳ್ಳಲು ಕಾಮಗಾರಿಯ ಪ್ರಗತಿಯನ್ನು ನಿಯಮಿತವಾಗಿ ಗಮನಿಸುತ್ತಿರಿ.
೪. ಸುರಕ್ಷತೆಗೆ ಆದ್ಯತೆ ನೀಡಿ: ನಿಮ್ಮ ನಿರ್ಮಾಣ ಸ್ಥಳದಲ್ಲಿ ಸುರಕ್ಷತೆಗೆ ಆದ್ಯತೆ ಇರಲಿ. ಎಲ್ಲಾ ಕಾರ್ಮಿಕರೂ ಸುರಕ್ಷತಾ ಪ್ರೊಟೊಕಾಲ್ನ ತರಬೇತಿ ಹೊಂದಿದ್ದಾರೆ ಮತ್ತು ಅಗತ್ಯವಿರುವ ಉಪಕರಣಗಳನ್ನು ಹೊಂದಿದ್ದಾರೆಂಬುದನ್ನು ಖಚಿತಪಡಿಸಿಕೊಳ್ಳಿ.
೫. ಬದಲಾವಣೆಗಳಿಗೆ ಸಿದ್ದರಾಗಿರಿ: ನಿರ್ಮಾಣ ಪ್ರಕ್ರಿಯೆಯಲ್ಲಿ ಸಾಮಾನ್ಯವಾಗಿ ಅನಿರೀಕ್ಷಿತ ಸವಾಲುಗಳು ಎದುರಾಗುತ್ತವೆ. ಹೊಂದಿಕೊಳ್ಳುವಿಕೆ ಮತ್ತು ನಿಮ್ಮ ಯೋಜನೆಯನ್ನು ಸನ್ನಿವೇಶಕ್ಕೆ ಅನುಗುಣವಾಗಿ ಮಾರ್ಪಾಟು ಮಾಡುವ ಗುಣ ನಿಮ್ಮಲ್ಲಿದ್ದರೆ ಈ ಸವಾಲುಗಳನ್ನು ಸುಲಭವಾಗಿ ದಾಟಿ ಮುಂದುವರೆಯಬಹುದು.
೬. ನಿಯಮಿತ ಸಂವಹನ ನಡೆಸಿ: ಕಾಮಗಾರಿಯಲ್ಲಿ ತೊಡಗಿರುವ ಎಲ್ಲರೊಂದಿಗೂ ಮುಕ್ತ ಸಂವಹನ ನಡೆಸುತ್ತಿರಿ. ಕಾಂಟ್ರ್ಯಾಕ್ಟರ್ ಮತ್ತು ಕಾರ್ಮಿಕರನ್ನು ಆಗಾಗ್ಗೆ ಭೇಟಿ ಮಾಡುವುದರಿಂದ ಯಾವುದೇ ಸಮಸ್ಯೆಯನ್ನು ತ್ವರಿತವಾಗಿ ಬಗೆಹರಿಸಬಹುದು.
೭. ವಿಸ್ಕೃತ ದಾಖಲೆಗಳನ್ನು ಇಟ್ಟುಕೊಳ್ಳಿ: ಯೋಜನೆಯಲ್ಲಿನ ಯಾವುದೇ ಬದಲಾವಣೆಗಳು ಮತ್ತು ಮಾತುಕತೆಗಳು ಸೇರಿದಂತೆ ನಿರ್ಮಾಣ ಸ್ಥಳದಲ್ಲಿನ ಎಲ್ಲ ಚಟುವಿಟೆಕೆಗಳ ದಾಖಲೆಯನ್ನು ಇಟ್ಟುಕೊಳ್ಳಿ. ಈ ದಾಖಲೆಗಳು ಭವಿಷ್ಯದ ನಿರ್ಣಯಗಳಿಗೆ ಸಹಕಾರಿಯಾಗುತ್ತವೆ.
ನಿಮ್ಮ ಮನೆಯನ್ನು ಕಟ್ಟಲು ನಿಮಗಿರುವುದು ಒಂದೇ ಅವಕಾಶ, ಹಾಗೂ ನಿರ್ಮಾಣ ಸ್ಥಳದ ಪರಿಣಾಮಕಾರಿ ನಿರ್ವಹಣೆಯು ಗೃಹನಿರ್ಮಾಣಕ್ಕೆ ಸಹಕಾರಿಯಾಗಿದೆ. ನಿರ್ಮಾಣ ಸ್ಥಳದ ನಿರ್ವಹಣೆಯ ಯೋಜನೆಯನ್ನು ಉತ್ಕೃಷ್ಟವಾಗಿ ರೂಪಿಸುವುದರೊಂದಿಗೆ, ಮುಕ್ತ ಸಂವಹನ, ಸುರಕ್ಷತೆಗೆ ಆದ್ಯತೆ ಮತ್ತು ಬದಲಾವಣೆಗಳಿಗೆ ಹೊಂದಿಕೊಳ್ಳುವ ಮೂಲಕ ನಿರ್ಮಾಣ ಪ್ರಕ್ರಿಯೆಯನ್ನು ನೀವು ಯಶಸ್ವಿಯಾಗಿ ಮುಗಿಸಬಹುದು.
ನಿರ್ಮಾಣ ಸ್ಥಳದ ನಿರ್ವಹಣೆ ಎಂದರೆ ಮನೆ ಕಟ್ಟುವ ಜಾಗದಲ್ಲಿ ನಡೆಯುವ ಎಲ್ಲಾ ಚಟುವಟಿಕೆಯನ್ನು ಗಮನಿಸುವ ಮೂಲಕ ಕಾಮಗಾರಿಯು ನಿರಾಳವಾಗಿ, ಸುರಕ್ಷಿತವಾಗಿ ಮತ್ತು ನಮ್ಮ ಬಜೆಟ್ಟಿನ ಪರಿಮಿತಿಯಲ್ಲಿ ನಡೆಯುವುದನ್ನು ಖಾತ್ರಿಗೊಳಿಸಿಕೊಳ್ಳುವುದು.
ಕಟ್ಟಡ ಕಾಮಗಾರಿಯ ಸ್ಥಳೀಯ ನಿರ್ವಹಣೆಯು ಕಾರ್ಮಿಕರನ್ನು, ಸಾಮಗ್ರಿಗಳನ್ನು ಮತ್ತು ವೇಳಾಪಟ್ಟಿಯನ್ನು ನಿಭಾಯಿಸುವುದು ಸೇರಿದಂತೆ ನಿರ್ಮಾಣ ಸ್ಥಳದ ದೈನಂದಿನ ಕಾರ್ಯಗಳ ನಿರ್ವಹಣೆಯ ಮೂಲಕ ಕಾಮಗಾರಿಯು ಗುರಿ ತಲುಪುವಂತೆ ನೋಡಿಕೊಳ್ಳುವುದಾಗಿದೆ.
ಸುರಕ್ಷತಾ ಕ್ರಮಗಳು, ಸಂಪನ್ಮೂಲದ ವಿತರಣೆ, ಕಾಲಮಿತಿ ಮತ್ತು ಸಂವಹನ ಸೇರಿದಂತೆ ನಿರ್ಮಾಣ ಕಾರ್ಯದ ಪ್ರಮುಖ ಆಶಯಗಳನ್ನು ಹೇಗೆ ನಿರ್ವಹಿಸಬೇಕೆಂಬ ರೂಪುರೇಷೆಯನ್ನು ನಿರ್ಮಾಣ ಸ್ಥಳದ ನಿರ್ವಹಣಾ ಯೋಜನೆ ಒಳಗೊಂಡಿದೆ.
ಸೈಟ್ ಪ್ಲಾನ್ ಸಿದ್ದಪಡಿಸಲು ಕಟ್ಟಡ, ಪ್ರವೇಶದ್ವಾರ, ಲ್ಯಾಂಡ್ಸ್ಕೇಪಿಂಗ್ ಅಂಶಗಳು, ಮೂಲಭೂತ ಸೌಲಭ್ಯಗಳು ಮತ್ತು ಸ್ಥಳೀಯ ಭೂ ವಿಭಜನೆಯ ನಿಯಮಗಳನ್ನು ಒಳಗೊಂಡಂತೆ ನಿಮ್ಮ ಸ್ವತ್ತಿನ ನೀಲನಕ್ಷೆಯನ್ನು ವಿನ್ಯಾಸಗೊಳಿಸಿ.
ಮನೆಯ ಸೈಟ್ ಪ್ಲಾನ್ ಸ್ವತ್ತಿನ ಆಸುಪಾಸಿಗೆ ಸಂಬಂಧಿಸಿದಂತೆ ಅದರ ವಿನ್ಯಾಸವನ್ನು ಪ್ರಸ್ತುತಪಡಿಸುತ್ತದೆ. ಇದು ಕಟ್ಟಡದ ಜಾಗ, ಪ್ರವೇಶದ್ವಾರ, ಲ್ಯಾಂಡ್ಸ್ಕೇಪಿಂಗ್ ಅಂಶಗಳು ಮತ್ತು ಮೂಲಭೂತ ಸೌಲಭ್ಯಗಳ ಸಂಪರ್ಕ ಮೊದಲಾದ ವಿವರಗಳನ್ನು ಒಳಗೊಂಡಿರುತ್ತದೆ.
