ପରମିଟ୍ ଏବଂ ନିୟାମକ ମଞ୍ଜୁରୀ ପାଇଁ ମୂଲ୍ୟ ଆକଳନକୁ ବୁଝନ୍ତୁ

ସୋପାନ ୧: ଆବେଦନ ଫର୍ମ ହାସଲ କରିବା

ପ୍ରଥମ ପଦକ୍ଷେପ ହେଉଛି ନିର୍ମାଣ ଅନୁମତି ଏବଂ ନିୟାମକ ମଞ୍ଜୁରୀ ପାଇଁ ଆବଶ୍ୟକ ଆବେଦନ ଫର୍ମ ହାସଲ କରିବା । ଏହି ଫର୍ମଗୁଡିକ ସ୍ଥାନୀୟ ମ୍ୟୁନିସିପାଲିଟି କିମ୍ବା ବିଲଡିଂ କର୍ତ୍ତୃପକ୍ଷଙ୍କଠାରୁ ପ୍ରାପ୍ତ କରାଯାଇପାରିବ । ଆପଣଙ୍କ ଅବସ୍ଥାନ ଉପରେ ନିର୍ଭର କରି, ଆପଣଙ୍କୁ ଜୋନିଂ, ପରିବେଶ କ୍ଲିୟରାନ୍ସ, ସୁରକ୍ଷା ଯାଞ୍ଚ ଏବଂ ନିର୍ମାଣ ଅନୁମତି ପାଇଁ ଫର୍ମ ପୂରଣ କରିବାକୁ ପଡିପାରେ । ଅନୁମୋଦନ ପ୍ରକ୍ରିୟାରେ ବିଳମ୍ବକୁ ଏଡାଇବା ପାଇଁ ସମସ୍ତ ଆବଶ୍ୟକୀୟ ଦସ୍ତାବିଜ ଆଗୁଆ ସଂଗ୍ରହ କରିବା ଜରୁରୀ ଅଟେ ।

ସୋପାନ ୨: ଫର୍ମ ପୂରଣ କରିବା ଏବଂ ଡକ୍ୟୁମେଣ୍ଟ ଦାଖଲ କରିବା

ଆବେଦନ ଫର୍ମ ହାସଲ କରିବା ପରେ, ପରବର୍ତ୍ତୀ ପଦକ୍ଷେପ ହେଉଛି ସେଗୁଡ଼ିକୁ ପୁଙ୍ଖାନୁପୁଙ୍ଖ ଭାବରେ ପୂରଣ କରିବା । ନିଶ୍ଚିତ କରନ୍ତୁ ଯେ ସେଥିରେ ଆପଣଙ୍କ ପ୍ରୋଜେକ୍ଟ ବିଷୟରେ ସମସ୍ତ ଆବଶ୍ୟକୀୟ ବିବରଣୀ ଅନ୍ତର୍ଭୂକ୍ତ ହୋଇଛି । କୌଣସି ସୂଚନାକୁ ଛାଡ଼ିବା କିମ୍ବା ଭୁଲ୍ ସୂଚନା ଦେବା ବିଳମ୍ବର କାରଣ ସାଜିପାରେ । ଫର୍ମ ସହିତ, ଆପଣଙ୍କୁ ସ୍ଥାପତ୍ୟ ଯୋଜନା, ଜମି ମାଲିକାନା ରେକର୍ଡ, ପରିବେଶ ମଞ୍ଜୁରି ପ୍ରମାଣପତ୍ର, କିମ୍ବା ଠିକାଦାରଙ୍କ ପରିଚୟପତ୍ରର ପ୍ରମାଣ ଭଳି ଅତିରିକ୍ତ ଦସ୍ତାବିଜ ଦାଖଲ କରିବାକୁ ପଡ଼ିପାରେ । ନିଶ୍ଚିତ କରନ୍ତୁ ଯେ ଦାଖଲ ପ୍ରକ୍ରିୟାକୁ ଶୃଙ୍ଖଳିତ କରିବା ପାଇଁ ଆପଣଙ୍କ ପାଖରେ ସମସ୍ତ ଆବଶ୍ୟକୀୟ ଡକ୍ୟୁମେଣ୍ଟ ଅଛି ।

ସୋପାନ ୩: ଦେୟ ପରିଶୋଧ

ଥରେ ଫର୍ମ ପୂରଣ ହୋଇଗଲେ ଏବଂ ଦସ୍ତାବିଜ ଦାଖଲ ହୋଇଗଲେ, ଆପଣଙ୍କୁ ସାଧାରଣତଃ ଆପଣଙ୍କ ପରମିଟ୍ ଆବେଦନ ପାଇଁ କିଛି ଶୁଳ୍କ ଦେବାକୁ ପଡ଼ିବ । ଆପଣ କେଉଁ ପ୍ରକାର କ୍ଲିୟରାନ୍ସ ଆବଶ୍ୟକ କରୁଛନ୍ତି ଏବଂ ପ୍ରକଳ୍ପର ମାପକାଠି ଉପରେ ନିର୍ଭର କରି ଏହି ଶୁଳ୍କ ଭିନ୍ନ ହୋଇଥାଏ । ପରବର୍ତ୍ତୀ ସମୟରେ କୌଣସି ଅପ୍ରତ୍ୟାଶିତ ଘଟଣା ନହେବା ସୁନିଶ୍ଚିତ କରିବା ପାଇଁ ଏହି ଖର୍ଚ୍ଚଗୁଡ଼ିକ ପାଇଁ ବଜେଟ୍ କରିବା ଜରୁରୀ । ଆପଣଙ୍କ ପ୍ରକଳ୍ପର ସ୍ଥାନ, କୋଠାର ପ୍ରକାର ଏବଂ ଜଟିଳତା ଉପରେ ଆଧାର କରି ବିଭିନ୍ନ ପରମିଟ୍ ପାଇଁ ଭିନ୍ନ ଭିନ୍ନ ଶୁଳ୍କ ରହିପାରେ ।

ଆପଣଙ୍କ ନିର୍ମାଣର ପ୍ରକୃତି ଉପରେ ନିର୍ଭର କରି ପରମିଟ୍ ବ୍ୟାପକ ଭାବରେ ଭିନ୍ନ ହୋଇପାରେ । ସାଧାରଣ ପ୍ରକାରର ପରମିଟ୍ ମଧ୍ୟରେ ଜୋନିଂ ପରମିଟ୍, ବିଲ୍ଡିଂ ପରମିଟ୍, ସୁରକ୍ଷା ଯାଞ୍ଚ ଏବଂ ପରିବେଶ କ୍ଲିୟରାନ୍ସ ଅନୁମତି ଅନ୍ତର୍ଭୁକ୍ତ । ଏଗୁଡ଼ିକ ମଧ୍ୟରୁ ପ୍ରତ୍ୟେକର ଏହାର ସମ୍ବନ୍ଧିତ ଶୁଳ୍କ ରହିଛି, ଏବଂ ଆପଣଙ୍କ ଅବସ୍ଥାନ ଏବଂ ଆପଣଙ୍କ ପ୍ରକଳ୍ପର ନିର୍ଦ୍ଦିଷ୍ଟତା ଉପରେ ଆଧାର କରି ଖର୍ଚ୍ଚ ଭିନ୍ନ ହୋଇପାରେ । ଉଦାହରଣ ସ୍ୱରୂପ, ଆବାସିକ ନିର୍ମାଣ ପାଇଁ ବାଣିଜ୍ୟିକ ପ୍ରକଳ୍ପ ଅପେକ୍ଷା କମ୍ ଅନୁମତି ଆବଶ୍ୟକ ହୋଇପାରେ, କିନ୍ତୁ ପ୍ରତ୍ୟେକ ସହିତ ଜଡିତ ଶୁଳ୍କ ଯଥେଷ୍ଟ ଭିନ୍ନ ହୋଇପାରେ । ଏହି ପ୍ରକାରର ଅନୁମତିଗୁଡ଼ିକୁ ବୁଝିବା ଆପଣଙ୍କୁ ଆପଣଙ୍କ ନିର୍ମାଣ ପ୍ରକଳ୍ପର ଖର୍ଚ୍ଚକୁ ଭଲ ଭାବରେ ଆକଳନ କରିବାକୁ ଅନୁମତି ଦେବ ।

ସୋପାନ ୪: ସାଇଟର ଯାଞ୍ଚ ଓ ତଦାରଖ

ଆପଣଙ୍କର ଆବେଦନ ଦାଖଲ କରିବା ଏବଂ ଆବଶ୍ୟକ ଶୁଳ୍କ ପୈଠ କରିବା ପରେ, ଆପଣଙ୍କର ଆବେଦନ କର୍ତ୍ତୃପକ୍ଷଙ୍କ ଦ୍ୱାରା ଯାଞ୍ଚ କରାଯିବ । ଆପଣଙ୍କର ପ୍ରସ୍ତାବିତ କୋଠା ସମସ୍ତ ନିୟମାବଳୀ ଏବଂ ସଂହିତା (କୋଡ୍) ପାଳନ କରୁଛି କି ନାହିଁ ଯାଞ୍ଚ କରିବା ପାଇଁ ସାଇଟର ଯାଞ୍ଚ ଲାଗି ଏକ ସମୟ ଧାର୍ଯ୍ୟ କରାଯାଇପାରେ । ନିରୀକ୍ଷକମାନେ ସ୍ଥାନ, ଆପଣଙ୍କ ନିର୍ମାଣର ପରିବେଶ ପ୍ରଭାବ ଏବଂ ପ୍ରସ୍ତାବିତ ଯୋଜନାଗୁଡ଼ିକର ସାମଗ୍ରିକ ନିରାପତ୍ତା ଯାଞ୍ଚ କରିବେ । ତଦାରଖରେ ଉତ୍ତୀର୍ଣ୍ଣ ହେବା ପାଇଁ ଆପଣଙ୍କ ସାଇଟ୍ ସମସ୍ତ ଆବଶ୍ୟକୀୟ ମାନଦଣ୍ଡ ପୂରଣ କରୁଛି କି ନାହିଁ ତାହା ନିଶ୍ଚିତ କରିବା ଗୁରୁତ୍ୱପୂର୍ଣ୍ଣ ।

ସୋପାନ ୫: ଆନୁମାନିକ ସମୟସୀମା

ଯାଞ୍ଚ ସମାପ୍ତ ହେବା ପରେ, କର୍ତ୍ତୃପକ୍ଷ ଆବଶ୍ୟକ ଅନୁମୋଦନ ପ୍ରଦାନ କରିବା ପୂର୍ବରୁ ସମସ୍ତ ଦସ୍ତାବିଜର ସମୀକ୍ଷା ଏବଂ ମୂଲ୍ୟାୟନ କରିବେ । ଆପଣଙ୍କ ପ୍ରକଳ୍ପର ଜଟିଳତା ଏବଂ ଅନୁମୋଦିତ ଏଜେନ୍ସିର କାର୍ଯ୍ୟଭାର ଉପରେ ନିର୍ଭର କରି, ଏହି ପ୍ରକ୍ରିୟା ଅନେକ ସପ୍ତାହ ନେଇପାରେ । ଆପଣଙ୍କ ଅନୁମୋଦନଗୁଡିକ ପ୍ରାପ୍ତ କରିବା ପାଇଁ ଆପଣଙ୍କୁ ଏକ ଆନୁମାନିକ ସମୟ ସୀମା ପ୍ରଦାନ କରାଯିବ। କୌଣସି ଅନାବଶ୍ୟକ ବିଳମ୍ବକୁ ଏଡାଇବା ପାଇଁ ସମୟସୀମା ଉପରେ ନଜର ରଖନ୍ତୁ ଏବଂ ଏଜେନ୍ସି ସହିତ ନିୟମିତ ଯୋଗାଯୋଗରେ ରୁହନ୍ତୁ ।

ଅନୁମତି ଏବଂ ନିୟାମକ ମଞ୍ଜୁରୀ ପାଇଁ ମୂଲ୍ୟ ଆକଳନ: ଏହା କାହିଁକି ଗୁରୁତ୍ୱପୂର୍ଣ୍ଣ?

ଅନୁମତି ଏବଂ ନିୟାମକ ମଞ୍ଜୁରୀ ପାଇଁ ମୂଲ୍ୟ ଆକଳନ ହେଉଛି ଆପଣଙ୍କର ସାମଗ୍ରିକ ନିର୍ମାଣ ବଜେଟର ଏକ ଅବିଚ୍ଛେଦ୍ୟ ଅଙ୍ଗ । ଯଦିଓ ପ୍ରକୃତ ନିର୍ମାଣ ଖର୍ଚ୍ଚ ଆପଣଙ୍କର ପ୍ରାଥମିକ ଧ୍ୟାନ ହୋଇପାରେ, ଅନୁମତି ଏବଂ କ୍ଲିୟରାନ୍ସ ପାଇବା ସହିତ ଜଡିତ ଖର୍ଚ୍ଚ ଆପଣଙ୍କ ପ୍ରକଳ୍ପର ଆର୍ଥିକ ସ୍ଥିତିକୁ ଯଥେଷ୍ଟ ପ୍ରଭାବିତ କରିପାରେ । ଏହି ଖର୍ଚ୍ଚଗୁଡ଼ିକ ବିଭିନ୍ନ କାରଣ ଉପରେ ନିର୍ଭରଶୀଳ ହୋଇଥାଏ, ଯେପରିକି - ଆପଣଙ୍କ କୋଠାର ଆକାର ଏବଂ ଜଟିଳତା, ଆପଣଙ୍କ ପ୍ରକଳ୍ପର ଅବସ୍ଥାନ ଏବଂ ଆବଶ୍ୟକ ଅନୁମତିର ପ୍ରକାର ।

ପରମିଟ୍ ଏବଂ ନିୟାମକ କ୍ଲିୟରାନ୍ସ ପାଇଁ ମୂଲ୍ୟକୁ ସଠିକ୍ ଭାବରେ ଆକଳନ କରିବାରେ ଆବଶ୍ୟକ ଶୁଳ୍କ, କୌଣସି ଯାଞ୍ଚ ଏବଂ ସମ୍ଭାବ୍ୟ ପ୍ରଶାସନିକ ଖର୍ଚ୍ଚ ବୁଝିବା ଭଳି ଦିଗ ଅନ୍ତର୍ଭୁକ୍ତ ହୋଇପାରେ । ଆପଣଙ୍କ ଅବସ୍ଥାନ ଉପରେ ନିର୍ଭର କରି, ମୂଲ୍ୟ ବ୍ୟାପକ ଭାବରେ ଭିନ୍ନ ହୋଇପାରେ ।  

ଖର୍ଚ୍ଚ ବିଷୟରେ ଆଗୁଆ ଜାଣିବା ଆପଣଙ୍କୁ ଭଲ ଯୋଜନା କରିବାକୁ ଏବଂ ଅପ୍ରତ୍ୟାଶିତ ଖର୍ଚ୍ଚକୁ ଏଡାଇବା ପାଇଁ ଅନୁମତି ଦେଇଥାଏ । ଏହାର ଅର୍ଥ ହେଉଛି ଆପଣଙ୍କ ପ୍ରୋଜେକ୍ଟ ସମୟରେ କୌଣସି ବ୍ୟାଘାତ ଘଟିବ ନାହିଁ, ଏହା ସୁନିଶ୍ଚିତ କରିଥାଏ ଯେ ଆପଣଙ୍କର ନିର୍ମାଣ ସୁରୁଖୁରୁରେ ଚାଲିବ ଏବଂ ବଜେଟ୍ ମଧ୍ୟରେ ରହିବ । ଅନ୍ୟ ଅର୍ଥରେ କହିବାକୁ ଗଲେ, ଯେପରି ଆପଣ ନିଜ ଘରର ମୂଳଦୁଆ ସାମଗ୍ରୀ ଉପରେ କେବେ ମଧ୍ୟ ସାଲିସ କରିବେ ନାହିଁ, ସେହିପରି ପରମିଟ୍ ଏବଂ କ୍ଲିୟରାନ୍ସ ପାଇଁ ମଧ୍ୟ ଆପଣ ନିଜ ବଜେଟରେ ସାଲିସ କରିବା ଉଚିତ୍ ନୁହେଁ ।  

ଆପଣ କାହିଁକି ଆପଣଙ୍କର ଅନୁମତି ଛାଡିବା କିମ୍ବା ବିଳମ୍ବ କରିବା ଉଚିତ୍ ନୁହେଁ

ଆବଶ୍ୟକ ଅନୁମତି ହାସଲ କରିବାରେ ବିଫଳ ହେବା କିମ୍ବା ପ୍ରକ୍ରିୟାରେ ବିଳମ୍ବ କରିବାର ପରିଣତି ଗମ୍ଭୀର ହୋଇପାରେ । ଯଦି ଆପଣ ଅତ୍ୟାବଶ୍ୟକ ଅନୁମତି ହାସଲ କରନ୍ତି ନାହିଁ କିମ୍ବା ସମୟସୀମାରେ ତାହା ପ୍ରାପ୍ତ କରିବା ହାତଛଡ଼ା କରନ୍ତି, ତେବେ ଆପଣଙ୍କୁ ମୋଟା ଅଙ୍କର ଜରିମାନା, ବିଳମ୍ବର ସମ୍ମୁଖୀନ ହେବାକୁ ପଡ଼ିପାରେ ନ ହେଲେ ହୁଏତ ଆପଣଙ୍କ ନିର୍ମାଣ କାର୍ଯ୍ୟକୁ ଭାଙ୍ଗିବାକୁ ପଡ଼ିପାରେ । କେତେକ କ୍ଷେତ୍ରରେ, ଆପଣ ନିୟାମକ ଆବଶ୍ୟକତା ପାଳନ ନକରିବା ପର୍ଯ୍ୟନ୍ତ ଆପଣଙ୍କ ପ୍ରକଳ୍ପକୁ ସ୍ଥଗିତ ରଖାଯାଇପାରେ । ଏହି ମହଙ୍ଗା ପ୍ରତିକ୍ରିୟାକୁ ଏଡାଇବା ପାଇଁ, ପରମିଟ୍ ଆବେଦନକୁ ଅଗ୍ରାଧିକାର ଦେବା ଏବଂ ସମସ୍ତ କାଗଜପତ୍ର ଦାଖଲ ଏବଂ ଠିକ୍ ସମୟରେ ଅନୁମୋଦିତ ହେବା ନିଶ୍ଚିତ କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ।  

ପରମିଟ୍ ଏବଂ ନିୟାମକ କ୍ଲିୟରାନ୍ସ ପାଇଁ ଖର୍ଚ୍ଚ ଗଣନା ସମୟରେ ନିମ୍ନଲିଖିତ ତ୍ରୁଟିଗୁଡ଼ିକୁ ଏଡ଼ାନ୍ତୁ

ପରମିଟ୍ ଏବଂ ନିୟାମକ କ୍ଲିୟରାନ୍ସ ପାଇଁ ଖର୍ଚ୍ଚ ଗଣନା କଷ୍ଟସାଧ୍ୟ ହୋଇଚ୍ଚ ଏବଂ ତ୍ରୁଟି ଅନାବଶ୍ୟକ ବିଳମ୍ବ ଏବଂ ଖର୍ଚ୍ଚର କାରଣ ହୋଇପାରେ । ଏହି ଖର୍ଚ୍ଚର ଆକଳନ କରିବା ସମୟରେ ଆପଣ ନିମ୍ନଲିଖିତ ଭୁଲତ୍ରୁଟିଗୁଡ଼ିକୁ ଏଡ଼ାଇବା ବାଞ୍ଛନୀୟ:

୧. ଲୁକ୍କାୟିତ ଦେୟଗୁଡ଼ିକୁ ଅଣଦେଖା କରିବା

ଅନେକ ଲୋକ ଛୋଟ ଶୁଳ୍କକୁ ଅଣଦେଖା କରନ୍ତି, ଯାହା ଆଖି ପିଛୁଳାକେ ଯୋଡ଼ି ହୋଇ ବଡ଼ ଆକାରର ଖର୍ଚ୍ଚରେ ପରିଣତ ହୋଇପାରେ । ଉଦାହରଣ ସ୍ୱରୂପ, ପ୍ରାରମ୍ଭିକ ଗଣନା ସମୟରେ ଯାଞ୍ଚ ଶୁଳ୍କ, ବିଳମ୍ବିତ ଦେୟ ଜରିମାନା, କିମ୍ବା ଅଧିକ ଜଟିଳ ଅନୁମତି ପାଇଁ ଅତିରିକ୍ତ ଖର୍ଚ୍ଚ ସହଜରେ ଅଲକ୍ଷ୍ୟରେ ରହିଯାଇପାରେ ।  

୨. ନିୟାମକ ଆବଶ୍ୟକତାରେ ହୋଇଥିବା ପରିର୍ତ୍ତନଗୁଡ଼ିକୁ ଅଣଦେଖା କରିବା

ନିୟମାବଳୀ ବଦଳିପାରେ । ଆଇନ ଉପରେ ହୋଇଥିବା ଏପରି ସମସ୍ତ ପରିବର୍ତ୍ତନଗୁଡ଼ିକୁ ଜାଣିରଖିବା ଜରୁରୀ ଅଟେ ଯାହା ଆପଣଙ୍କ ମୂଲ୍ୟ ଆକଳନକୁ ପ୍ରଭାବିତ କରିପାରେ । ସ୍ଥାନୀୟ ଜୋନିଂ ଆଇନ କିମ୍ବା ବିଲ୍ଡିଂ କୋଡରେ ପରିବର୍ତ୍ତନ ଆପଣଙ୍କ ପ୍ରକଳ୍ପରେ ଅପ୍ରତ୍ୟାଶିତ ଖର୍ଚ୍ଚ ଯୋଗ କରିପାରେ । ଆପଣଙ୍କର ଆକଳନ ସାମ୍ପ୍ରତିକ ଆବଶ୍ୟକତା ସହିତ ସୁସଙ୍ଗତ ଅଛି କି ନାହିଁ ତାହା ନିଶ୍ଚିତ କରିବାକୁ ସର୍ବଦା ସ୍ଥାନୀୟ କର୍ତ୍ତୃପକ୍ଷଙ୍କଠାରୁ ବୁଝିନିଅନ୍ତୁ ।  

୩. ସମୟସୀମାକୁ ହେୟଜ୍ଞାନ କରିବା

ଅନେକ କ୍ଷେତ୍ରରେ, ଲୋକମାନେ ଅନୁମୋଦନ ପାଇବା ପାଇଁ ଆବଶ୍ୟକ ସମୟର ପରିମାଣକୁ କମ୍ ଆକଳନ କରନ୍ତି । ଅପ୍ରତ୍ୟାଶିତ ତଦାରଖ କିମ୍ବା ବର୍ଦ୍ଧିତ ଯାଞ୍ଚ ହେତୁ ବିଳମ୍ବ ହୋଇପାରେ । ସମ୍ଭାବ୍ୟ ବିଫଳତାକୁ ଧ୍ୟାନରେ ରଖି ଅତିରିକ୍ତ ସମୟ ନିର୍ମାଣ କରିବା ବୁଦ୍ଧିମାନର କାର୍ଯ୍ୟ, ବିଶେଷକରି ଯେତେବେଳେ ନିୟାମକ ସଂସ୍ଥା ବହୁଗୁଡ଼ିଏ ଆବେଦନର କାର୍ଯ୍ୟଭାର ସହ ଯୁଝୁଥିବ ।  

୪. ଠିକାଦାରଙ୍କ ଖର୍ଚ୍ଚକୁ ବିଚାରକୁ ନ ନେବା

ସଠିକ୍ କଣ୍ଟ୍ରାକ୍ଟରଙ୍କ ନିୟୋଜନ ବାବଦୀୟ ଖର୍ଚ୍ଚ ମଧ୍ୟ ଅନୁମୋଦନ ପାଇବାରେ ଏକ ଭୂମିକା ଗ୍ରହଣ କରିଥାଏ । ଜଣେ ଦକ୍ଷ କଣ୍ଟ୍ରାକ୍ଟର ଯିଏ ପରମିଟ୍ ଏବଂ ନିୟାମକ କ୍ଲିୟରାନ୍ସ ପାଇଁ ଆବଶ୍ୟକତା ବୁଝନ୍ତି, ସେ ପ୍ରକ୍ରିୟାକୁ ତ୍ୱରାନ୍ୱିତ କରିପାରିବେ, ଅନାବଶ୍ୟକ ସଂଶୋଧନ କିମ୍ବା ପୁନଃଦାଖଲ ପାଇଁ ଖର୍ଚ୍ଚ ଏବଂ ସମୟ ହ୍ରାସ କରିପାରିବେ ।  

ଏହି ସାଧାରଣ ଭୁଲଗୁଡ଼ିକୁ ଏଡାଇ ଆପଣ ଅନୁମତି ଏବଂ କ୍ଲିୟରାନ୍ସ ପାଇବାରେ ଜଡିତ ଖର୍ଚ୍ଚକୁ ଅଧିକ ସଠିକ୍ ଭାବରେ ଆକଳନ କରିବାକୁ ସମର୍ଥ ହେବେ । ଏହା କରିବା ଦ୍ୱାରା ଏହା ସୁନିଶ୍ଚିତ କରିବାରେ ସାହାଯ୍ୟ କରିବ ଯେ ଆପଣଙ୍କ ପ୍ରକଳ୍ପ ବ୍ୟୟବହୁଳ ବାଧା ବିନା ଆଗକୁ ବଢୁଛି ଏବଂ ଆପଣ ମଧ୍ୟ ଯେକୌଣସି ନିୟାମକ ଆବଶ୍ୟକତା ପାଇଁ ଭଲ ଭାବରେ ପ୍ରସ୍ତୁତ ରହିବେ ।