ଆଧୁନିକ ନିର୍ମାଣରେ ଇସ୍ପାତ (ଷ୍ଟିଲ୍)ର ଅତ୍ୟାବଶ୍ୟକ ବ୍ୟବହାର

ନିର୍ମାଣ କାର୍ଯ୍ୟରେ ଇସ୍ପାତର ଅନ୍ୟତମ ପ୍ରାଥମିକ ଉପଯୋଗ ଢାଞ୍ଚାଗତ ବା ଷ୍ଟ୍ରକ୍ଚରାଲ୍ ସେକ୍ସନରେ ହୋଇଥାଏ, ଯେପରିକି - ଆଇ-ବିମ୍, ଏଚ୍-ବିମ୍ ଏବଂ ଟି-ବିମ୍ । ଏହି ସେକ୍ସନଗୁଡ଼ିକ ଅନେକ ବିଲଡିଂ ଏବଂ ସେତୁର ମେରୁଦଣ୍ଡ ସାଜିଥାଏ ଏବଂ ଭାରି ଭାର ତଥା ବିଭିନ୍ନ ପରିବେଶୀୟ ପରିସ୍ଥିତିକୁ ସହିବା ପାଇଁ ଆବଶ୍ୟକୀୟ ସମର୍ଥନ ଏବଂ ସ୍ଥିରତା ଯୋଗାଇଥାଏ ।

୨. ରିଇନଫୋର୍ସିଂ ବାର୍

ନିର୍ମାଣରେ ଇସ୍ପାତର ଆଉ ଏକ ପ୍ରମୁଖ ଉପଯୋଗ ହେଉଛି ରିଇନଫୋର୍ସିଂ ବାର୍ ବା ରିବାର୍ (ଷ୍ଟିଲ୍ ଛଡ଼) ଭାବେ ବ୍ୟବହୃତ ହେବା । ରିବାର୍ କଂକ୍ରିଟ୍ କୁ ଅତିରିକ୍ତ ଶକ୍ତି ଯୋଗାଇଥାଏ । ଅନ୍ୟଥା ଭଙ୍ଗୁର କଂକ୍ରିଟ୍ କୁ ଏହା ପ୍ରସାରଣକ୍ଷମ ଶକ୍ତି ଯୋଡ଼ିଥାଏ । ଫାଉଣ୍ଡେସନ, ଚଟାଣ ଏବଂ କାନ୍ଥଗୁଡ଼ିକର ନିର୍ମାଣରେ ଏହା ଗୁରୁତ୍ୱପୂର୍ଣ୍ଣ ହୋଇଥାଏ ଏବଂ କଂକ୍ରିଟ୍ ଉପାଦାନଗୁଡ଼ିକର ଢାଞ୍ଚାଗତ ଅଖଣ୍ଡତା ସୁନିଶ୍ଚିତ କରିଥାଏ ।

୩. ଚାଦର ଉତ୍ପାଦ

ଷ୍ଟିଲ୍ ଚାଦର ବା ଶିଟ୍ ଉତ୍ପାଦ, ଯଥା- କରୁଗେଟେଡ୍ ଶିଟ୍ ଏବଂ ଷ୍ଟିଲ୍ ପ୍ଲେଟ୍ ଆଦିକୁ ଛାତ, କ୍ଲାଡିଂ ଏବଂ ଫ୍ଲୋରିଂ କାର୍ଯ୍ୟରେ ବ୍ୟବହାର କରାଯାଇଥାଏ । ଏହି ଚାଦରଗୁଡ଼ିକ ପାଣିପାଗ ପ୍ରତିରୋଧୀ ହେବା ସହ କୋଠାଗୁଡ଼ିକର ସାମଗ୍ରିକ ସୌନ୍ଦର୍ଯ୍ୟକୁ ବଢ଼ାଇଥାଏ । ଏହା ଇସ୍ପାତର ଆଉ ଏକ ମହତ୍ତ୍ୱପୂର୍ଣ୍ଣ ଉପଯୋଗ ଅଟେ ।

୪. ପାଇପ୍ ଏବଂ ଟ୍ୟୁବ୍

କୋଠାଗୁଡ଼ିକରେ ପ୍ଲମ୍ବିଂ, ଗ୍ୟାସ୍ ଲାଇନ୍ ଏବଂ ଏଚ୍.ଭି.ଏ.ସି. ସିଷ୍ଟମ୍ ନିର୍ମାଣରେ ଇସ୍ପାତ ପାଇପ୍ ଏବଂ ଟ୍ୟୁବ୍ ଅତ୍ୟାବଶ୍ୟକ ଭାବେ ବ୍ୟବହୃତ ହୋଇଥାଏ ।
ତାହା ସ୍ଥାୟୀତ୍ୱ ପ୍ରଦାନ କରିବା ସହ ଉଚ୍ଚ ଚାପକୁ ସହ୍ୟ କରିପାରିଥାଏ, ଯାହା ସେଗୁଡ଼ିକୁ ପାଣି, ଗ୍ୟାସ ଏବଂ ଅନ୍ୟ ତରଳ ପଦାର୍ଥ ପରିବହନ ପାଇଁ ଆଦର୍ଶ କରିଥାଏ ।

୫. ଷ୍ଟିଲ୍ ଫ୍ରେମ୍

ସୁଉଚ୍ଚ ଅଟ୍ଟାଳିକା, ପଣ୍ୟାଗାର ଏବଂ ଶିଳ୍ପୀୟ ଭବନ ଆଦି ନିର୍ମାଣ ପାଇଁ ଷ୍ଟିଲ୍ ଫ୍ରେମ୍ ବ୍ୟାପକ ରୂପେ ବ୍ୟବହୃତ ହୋଇଥାଏ । ସେଗୁଡ଼ିକୁ ଶୀଘ୍ର ଓ ସହଜରେ ଆସେମ୍ଲି କରିହୁଏ, ତେଣୁ ସହଜରେ ପରିବର୍ତ୍ତନ କିମ୍ବା ସମ୍ପ୍ରସାରିତ କରିହେଉଥିବା ନମନୀୟ ଫ୍ରେମୱାର୍କ ପାଇଁ ତାହା ଅତି ଉପାଦେୟ ସାବ୍ୟସ୍ତ ହୋଇଥାଏ । ଏହା ଇସ୍ପାତର ଆଉ ଏକ ମହତ୍ତ୍ୱପୂର୍ଣ୍ଣ ଉପଯୋଗ ଅଟେ ।

୬. ଫାଷ୍ଟେନର୍

ବିଭିନ୍ନ ଢାଞ୍ଚାଗତ ଉପାଦାନଗୁଡ଼ିକୁ ସଂଯୁକ୍ତ ବା ସଂଲଗ୍ନ କରିବା ପାଇଁ ଷ୍ଟିଲ୍ ବୋଲ୍ଟ, ନଟ୍ ଏବଂ ସ୍କୃଗୁଡ଼ିକ ଜରୁରୀ ହୋଇଥାଏ, ଯାହା ସୁରକ୍ଷିତ ଏବଂ ସ୍ଥିର ସଂଯୋଗକୁ ସୁନିଶ୍ଚିତ କରିଥାଏ । ନିର୍ମାଣ କାର୍ଯ୍ୟରେ ଷ୍ଟିଲ୍ ର ଏହି ଉପଯୋଗ ସମଗ୍ର ଢାଞ୍ଚାର ନିରାପତ୍ତା ଏବଂ ସ୍ଥାୟିତ୍ୱ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହୋଇଥାଏ ।

୭. ଅସ୍ଥାୟୀ ଢାଞ୍ଚା

କୋଠା ନିର୍ମାଣ ପ୍ରକ୍ରିୟା ପାଇଁ ଜରୁରୀ ହୋଇଥିବା ସ୍କାଫୋଲଡିଂ ଏବଂ ଫର୍ମୱାର୍କ ଭଳି ଅସ୍ଥାୟୀ ଢାଞ୍ଚାଗୁଡ଼ିକର ନିର୍ମାଣ ପାଇଁ ମଧ୍ୟ ଇସ୍ପାତର ବ୍ୟବହାର କରାଯାଏ । ଏହି ଅସ୍ଥାୟୀ ଢାଞ୍ଚାଗୁଡ଼ିକ ଶ୍ରମିକ ଏବଂ ସାମଗ୍ରୀକୁ ସମର୍ଥନ ଏବଂ ସୁରକ୍ଷା ଯୋଗାଇଥାଏ । ଏହା ଇସ୍ପାତର ଆଉ ଏକ ବ୍ୟାବହାରିକ ଉପଯୋଗ ଅଟେ ।

୮. ସାଜସଜ୍ଜାମୂଳକ ଉପାଦାନ

ରେଲିଂ, ଫାଟକ ଏବଂ ଫସାଡ଼ ଭଳି ସାଜସଜ୍ଜାମୂଳକ ଉପାଦାନରେ ମଧ୍ୟ ଇସ୍ପାତର ବ୍ୟବହାର କରାଯାଇଥାଏ । ଏହି ଉପାଦାନଗୁଡ଼ିକ ଭବନର ସୌନ୍ଦର୍ଯ୍ୟଗତ ଆକର୍ଷଣକୁ ଉନ୍ନତ କରିବା ସହ ଅତିରିକ୍ତ କାର୍ଯ୍ୟକ୍ଷମତା ଏବଂ ସୁରକ୍ଷା ଯୋଗାଇଥାଏ । ଏହା ଇସ୍ପାତର ବହୁମୁଖୀ ଉପଯୋଗର ପରିଚାୟକ ଅଟେ ।

୯. ଚିରପୋଷଣକ୍ଷମ ପଦକ୍ଷେପ

ପୋଷଣୀୟ ନିର୍ମାଣ ପଦ୍ଧତିରେ ଇସ୍ପାତ ଏକ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥାଏ । ଏହା ପୁନଃଚକ୍ରଣଯୋଗ୍ୟ ହୋଇଥାଏ ଏବଂ ନିର୍ମାଣ ପ୍ରକଳ୍ପଗୁଡ଼ିକରେ ଇସ୍ପାତର ବ୍ୟବହାର ଦ୍ୱାରା କଞ୍ଚା ସାମଗ୍ରୀର ଆବଶ୍ୟକତା ହ୍ରାସ ହୁଏ, ପରିବେଶ ଉପରେ ପ୍ରଭାବ ନ୍ୟୂନତମ ହୋଇଥାଏ । ଆଜିର ପରିବେଶ-ସଚେତନ ପୃଥିବୀ ପାଇଁ ଏହାକୁ ସମ୍ବଳର ଏକ ଦାୟିତ୍ୱପୂର୍ଣ୍ଣ ଉପଯୋଗ କୁହାଯାଇପାରିବ ।

ନିର୍ମାଣରେ ଇସ୍ପାତ ବ୍ୟବହାର କରାଯିବାର ଲାଭ

ନିର୍ମାଣରେ ଇସ୍ପାତ ବ୍ୟବହାର କରାଯିବାର ଅଗଣିତ ଲାଭ ରହିଛି । ଅନେକ ପ୍ରକଳ୍ପ ପାଇଁ ଏହା ଏକ ପସନ୍ଦଯୋଗ୍ୟ ସାମଗ୍ରୀ ସାବ୍ୟସ୍ତ ହୋଇଥାଏ ।

• ଏହାର ଉଚ୍ଚ ଶକ୍ତି-ରୁ-ଓଜନ ଅନୁପାତ କାରଣରୁ ସ୍ଥିରତା ସହ ସାଲିସ୍ ବିନା ହାଲୁକା ଢାଞ୍ଚାଗୁଡ଼ିକର ନିର୍ମାଣ ସମ୍ଭବପର ହୋଇପାରିଥାଏ ।

   

• ଇସ୍ପାତର ସ୍ଥାୟିତ୍ୱ କୋଠାଗୁଡ଼ିକୁ କଠୋର ପରିବେଶୀୟ ପରିସ୍ଥିତିକୁ ସହ୍ୟ କରିବା ଏବଂ ଦୀର୍ଘାୟୁ ହାସଲ କରିବାରେ ସକ୍ଷମ କରିଥାଏ । ଅତିରିକ୍ତ ଭାବେ, ଷ୍ଟିଲ୍ ଢାଞ୍ଚାଗୁଡ଼ିକୁ ସହଜରେ ପରିବର୍ତ୍ତିତ କିମ୍ବା ସମ୍ପ୍ରସାରିତ କରିହୋଇଥାଏ । ତେଣୁ, ଭବିଷ୍ୟତରେ ଢାଞ୍ଚାରେ ନମନୀୟ ଭାବେ ପରିବର୍ତ୍ତନ କରାଯିବା ସମ୍ଭବ ହୋଇଥାଏ ।

   

• ଇସ୍ପାତ ଏକ ପୋଷଣକ୍ଷମ ସାମଗ୍ରୀ ଅଟେ, କାରଣ ଏହା ୧୦୦% ପୁନଃଚକ୍ରଣଯୋଗ୍ୟ ଅଟେ । ନିର୍ମାଣ କାର୍ଯ୍ୟରେ ପୁନଃଚକ୍ରିତ (ରିସାଇକଲଡ୍) ଇସ୍ପାତର ବ୍ୟବହାର କରିବା ଦ୍ୱାରା କଞ୍ଚା ସାମଗ୍ରୀର ଚାହିଦା ହ୍ରାସ ପାଇଥାଏ ଏବଂ ବିଲଡିଂ ପ୍ରକଳ୍ପଗୁଡ଼ିକର କାର୍ବନ୍ ପଦଚିହ୍ନ କମିଥାଏ ।

   

• ଅଧିକନ୍ତୁ, ଇସ୍ପାତର ପ୍ରିଫାବ୍ରିକେଶନ୍ (ପୂର୍ବରୁ ତିଆରି ହୋଇପାରିବାର କ୍ଷମତା) ସାମର୍ଥ୍ୟ କାରଣରୁ ନିର୍ମାଣ ସମୟ ଦ୍ରୁତତର ହୋଇଥାଏ, ଶ୍ରମ ଖର୍ଚ୍ଚ ହ୍ରାସ ହେବା ସହ ନିର୍ମାଣ ସ୍ଥଳରେ ବ୍ୟାଘାତ ବିଭ୍ରାଟର ଘଟଣା ନ୍ୟୂନତମ ହୋଇଥାଏ ।

   

• ବିଲଡିଂ ନିର୍ମାଣରେ ଷ୍ଟେନଲେସ୍ ଷ୍ଟିଲ୍ ର ବ୍ୟବହାର
  
  

  • ଏହାର ଅନେକ ଲାଭ ରହିଛି, ଉଦାହରଣସ୍ୱରୂପ ଏହାର କଳଙ୍କି ନିରୋଧ କ୍ଷମତା କାରଣରୁ କଠୋର ପରିବେଶରେ ମଧ୍ୟ ଢାଞ୍ଚାଗତ ଅଖଣ୍ଡତାକୁ ବଜାୟ ରଖିବା ପାଇଁ ଏହା ଏକ ଅତ୍ୟାବଶ୍ୟକ ସାମଗ୍ରୀ ସାବ୍ୟସ୍ତ ହୋଇଥାଏ ।

     

  • ଷ୍ଟେନଲେସ୍ ଷ୍ଟିଲ୍ ର ସ୍ଥାୟିତ୍ୱ ଏବଂ ସୌନ୍ଦର୍ଯ୍ୟପୂର୍ଣ୍ଣ ଆକର୍ଷଣ ଏହାକୁ ଉଭୟ କାର୍ଯ୍ୟଦକ୍ଷତା ଏବଂ ସାଜସଜ୍ଜାମୂଳକ ପ୍ରୟୋଗ ପାଇଁ ଏକ ଲୋକପ୍ରିୟ ପସନ୍ଦରେ ପରିଣତ କରିଥାଏ ।