Share:
Share:
ବିଭିନ୍ନ ପ୍ରକାର ମିକ୍ସର୍ ଉପଲବ୍ଧ ଅଛି । ମିଶ୍ରଣ କରାଯାଉଥିବା ସାମଗ୍ରୀ ଏବଂ ବାଞ୍ଛିତ କାର୍ଯ୍ୟର ପ୍ରକୃତି ଉପରେ ନିର୍ଭର କରି ପ୍ରତ୍ୟେକ ମିକ୍ସର୍ ଯନ୍ତ୍ରକୁ ପ୍ରସ୍ତୁତ କରାଯାଇଥାଏ । କଂକ୍ରିଟ୍ ମିକ୍ସର୍ ମେଶିନ୍ଗୁଡ଼ିକୁ ସାଧାରଣ ଭାବେ ଦୁଇଟି ବର୍ଗରେ ବିଭକ୍ତ କରାଯାଇପାରିବ, କଂକ୍ରିଟ୍ ବ୍ୟାଚ୍ ମିକ୍ସର୍ସ, ଏବଂ କଣ୍ଟିନ୍ୟୁଅସ୍ ମିକ୍ସର୍ସ । ଆମେ ଏହି ଉଭୟ ପ୍ରକାର ମିକ୍ସର୍ ସମ୍ପର୍କରେ ବିଶଦ ଭାବେ ଆଲୋଚନା କରିବୁ ।
କଂକ୍ରିଟ୍ ବ୍ୟାଚ୍ ମିକ୍ସର୍ ହେଉଛି ନିର୍ମାଣ ଉଦ୍ୟୋଗରେ ବ୍ୟବହୃତ ହେଉଥିବା ଏକ ପ୍ରକାର ମିକ୍ସର୍, ଯାହାକୁ ଗୋଟିଏ ସମୟରେ ଏକ ନିର୍ଦ୍ଦିଷ୍ଟ ପରିମାଣର କଂକ୍ରିଟ୍ ମିଶ୍ରଣ କରିବା ପାଇଁ ବ୍ୟବହାର କରାଯାଇଥାଏ । କଂକ୍ରିଟ୍ର ଆବଶ୍ୟକତା ବହୁତ ଅଧିକ ନ ଥିବା ଛୋଟରୁ ମଧ୍ୟମ ଧରଣର ନିର୍ମାଣ ପ୍ରକଳ୍ପଗୁଡ଼ିକ ପାଇଁ ଏହି ଉପଯୁକ୍ତ ହୋଇଥାଏ । କଂକ୍ରିଟ୍ ବ୍ୟାଚ୍ ମିକ୍ସର୍ରେ ଏକ ଡ୍ରମ୍ ବା ପାତ୍ର ରହିଥାଏ । ପୂର୍ବ-ନିର୍ଦ୍ଧାରିତ ମାପ ଓ ଅନୁପାତରେ ସମସ୍ତ ଉପାଦାନଗୁଡ଼ିକୁ ସେଥିରେ ପକାଯାଇଥାଏ । ସାଧାରଣ ଉପାଦାନଗୁଡ଼ିକ ହେଉଛି - ସିମେଣ୍ଟ, ବାଲି, ପାଣି ଏବଂ ଗୋଡ଼ି ବା ବଜୁରି । ଏହି ମିକ୍ସର ବିଭିନ୍ନ ଆକାରର ହୋଇଥାଏ । ପ୍ରସ୍ତୁତ କରାଯିବାକୁ ଥିବା କଂକ୍ରିଟ୍ର ପରିମାଣକୁ ଆଧାର କରି ମିକ୍ସରର ଆକାର ଚୟନ କରାଯାଇଥାଏ । ଛୋଟ ଆକାରର ବ୍ୟାଚ୍ ମିକ୍ସରରେ ୧ କ୍ୟୁବିକ୍ ୟାର୍ଡ ପର୍ଯ୍ୟନ୍ତ କଂକ୍ରିଟ୍ ରହିପାରୁଥିବା ବେଳେ, ବଡ଼ ମିକ୍ସର୍ଗୁଡ଼ିକରେ ୬ କ୍ୟୁବିକ୍ ୟାର୍ଡ କିମ୍ବା ତା’ଠାରୁ ଅଧିକ ପରିମାଣର କଂକ୍ରିଟ୍ ପ୍ରସ୍ତୁତ କରାଯାଇପାରିଥାଏ ।
ଗୋଟିଏ ସମୟରେ ଏକ ନିର୍ଦ୍ଦିଷ୍ଟ ପରିମାଣର କଂକ୍ରିଟ୍ ମିଶ୍ରଣ ପ୍ରସ୍ତୁତ କରିବା ଆବଶ୍ୟକ ହେଉଥିବା ଛୋଟରୁ ମଧ୍ୟମ ଆକାରର ନିର୍ମାଣ ପ୍ରକଳ୍ପଗୁଡ଼ିକ ପାଇଁ କଂକ୍ରିଟ୍ ବ୍ୟାଚ୍ ମିକ୍ସର୍ ଏକ ଭରସାଯୋଗ୍ୟ ଏବଂ ଫଳପ୍ରଦ ବିକଳ୍ପ ସାବ୍ୟସ୍ତ ହୋଇଥାଏ ।
ଆଉ ଏକ ପ୍ରକାର ମିକ୍ସର୍ ହେଲା ଡ୍ରମ୍ ମିକ୍ସର୍, ଯାହା ବ୍ୟାରେଲ୍ ମିକ୍ସର୍ ନାମରେ ମଧ୍ୟ ପରିଚିତ । ଏହାକୁ ନିର୍ମାଣ ଉଦ୍ୟୋଗରେ ବହୁ ପରିମାଣର କଂକ୍ରିଟ୍ କିମ୍ବା ସିମେଣ୍ଟ ମିଶ୍ରଣ କରିବା ପାଇଁ ବ୍ୟବହାର କରାଯାଇଥାଏ । ଏଥିରେ ଅଖରେ ଘୁରୁଥିବା ଏକ ଡ୍ରମ୍ ବା ବ୍ୟାରେଲ୍ ରହିଥାଏ । ଡ୍ରମ୍ ଭିତରେ ବ୍ଲେଡ୍ ବା ଡେଣା ଖଞ୍ଜାଯାଇଥାଏ । ଡ୍ରମ୍ ଘୁରିବା ସମୟରେ ଏହି ବ୍ଲେଡ୍ କଂକ୍ରିଟ୍ ମିଶ୍ରଣ ପ୍ରସ୍ତୁତ କରିବାରେ ସାହାଯ୍ୟ କରିଥାଏ । ଏପରି ମିକ୍ସରର ଫାଇଦା ହେଉଛି କି, ଏଥିରେ ବହୁ ପରିମାଣର କଂକ୍ରିଟ୍କୁ ଦକ୍ଷ ଭାବେ ମିଶାଇବାର ସାମର୍ଥ୍ୟ ରହିଛି । ଏଗୁଡ଼ିକୁ ପରିଚାଳନା କରିବା ସହଜ ହୋଇଥାଏ ଏବଂ ଅନ୍ୟାନ୍ୟ ମିକ୍ସର୍ ତୁଳନାରେ କମ ଶ୍ରମ ଆବଶ୍ୟକ କରିଥାଏ । ଉଭୟ ଛୋଟ ଓ ବଡ଼ ନିର୍ମାଣ କାର୍ଯ୍ୟ ପାଇଁ ଏହି ମିକ୍ସର ଉପଯୁକ୍ତ ହୋଇଥାଏ ଏବଂ ଏହାକୁ କଂକ୍ରିଟ୍, ମୋର୍ଟାର୍ କିମ୍ବା ଅନ୍ୟ ଯେକୌଣସି ନିର୍ମାଣ ସାମଗ୍ରୀର ମିଶ୍ରଣ ପାଇଁ ବ୍ୟବହାର କରାଯାଇପାରିବ ।
ଡ୍ରମ୍ ମିକ୍ସରକୁ ପୁନଶ୍ଚ ତିନିଟି ବର୍ଗରେ ବିଭକ୍ତ କରାଯାଇପାରିବ: ଟିଲ୍ଟିଂ ଡ୍ରମ୍ ମିକ୍ସର୍ସ, ନନ୍-ଟିଲ୍ଟିଂ ଡ୍ରମ୍ ମିକ୍ସର୍ସ ଏବଂ ରିଭର୍ସିଂ ଡ୍ରମ୍ ମିକ୍ସର୍ସ ।
ଟିଲ୍ଟିଂ ଡ୍ରମ୍ ମିକ୍ସର୍ଗୁଡ଼ିକୁ ଏକ ଢଳି ରହୁଥିବା ଡ୍ରମ୍ ସହିତ ଡିଜାଇନ୍ କରାଯାଇଥାଏ । ଢଳି ରହୁଥିବା ଏହି ଡ୍ରମ୍କୁ ବୁଲାଇଲେ କଂକ୍ରିଟ୍ ବା ସିମେଣ୍ଟ ସହଜରେ ଢାଳି ହୋଇପାରିଥାଏ । ତେଣୁ, ସାମଗ୍ରୀର ଦ୍ରୁତ ଖଲାସୀ ଆବଶ୍ୟକ କରୁଥିବା ନିର୍ମାଣ ପ୍ରକଳ୍ପଗୁଡ଼ିକରେ ଏପରି ମିକ୍ସର୍ଗୁଡ଼ିକର ଚାହିଦା ବେଶ୍ ଅଧିକ ହୋଇଥାଏ । ଏହି ମିକ୍ସରରେ ଲାଗିଥିବା ଡ୍ରମ୍ଟି ତାହାର ଅଖରେ ଢଳିପାରିଥାଏ, ଯାହା ଫଳରେ ମିଶ୍ରଣ ହୋଇଥିବା ସାମଗ୍ରୀକୁ ଉଦ୍ଦିଷ୍ଟ ଜାଗାରେ ଢଳାଯାଇପାରେ । ନନ୍-ଟିଲ୍ଟିଂ ଡ୍ରମ୍ ମିକ୍ସର୍ ତୁଳନାରେ ଏ ଧରଣର ମିକ୍ସର୍ଗୁଡ଼ିକର ଫାଇଦା ହେଉଛି ଏହା କମ୍ ଶ୍ରମବଳ ଆବଶ୍ୟକ କରିଥାଏ, କାରଣ ଡ୍ରମ୍କୁ ଢଳାଇ ମିଶ୍ରିତ ସାମଗ୍ରୀଗୁଡ଼ିକୁ ସହଜରେ ନିଷ୍କାସନ କରାଯାଇପାରିଥାଏ । ଛୋଟରୁ ମଧ୍ୟମ ଆକାର ନିର୍ମାଣ ପ୍ରକଳ୍ପରେ ଏହି ବିକଳ୍ପ ଅଧିକ ଲୋକପ୍ରିୟ ଅଟେ ।
ନନ୍-ଟିଲ୍ଟିଂ ଡ୍ରମ୍ ମିକ୍ସର୍ଗୁଡ଼ିକରେ ଟିଲ୍ଟିଂ ଡ୍ରମ୍ ମିକ୍ସର୍ ଭଳି ଢଳିରହୁଥିବା ଡ୍ରମ୍ର ବ୍ୟବସ୍ଥା ନ ଥାଏ । ତେଣୁ ଏଥିରୁ କଂକ୍ରିଟ୍ ବା ମିଶ୍ରିତ ସାମଗ୍ରୀ କାଢ଼ିବାର କାର୍ଯ୍ୟ ଲୋକ ବା ଶ୍ରମିକଙ୍କ ଦ୍ୱାରା କରାଯାଇଥାଏ । ଏହି କଂକ୍ରିଟ୍ ମିକ୍ସର୍ର ଫାଇଦା ହେଉଛି ଏହାର ସରଳ ଡିଜାଇନ୍ ଏବଂ ସହଜ ପରିଚାଳନା । ଏହି ଯନ୍ତ୍ରଗୁଡ଼ିକ ଛୋଟରୁ ମଧ୍ୟମ-ଆକାରର ନିର୍ମାଣ ପ୍ରକଳ୍ପ ପାଇଁ ଉପଯୁକ୍ତ ଏବଂ ତାହାକୁ ଓଦା କିମ୍ବା ଶୁଖିଲା ମିଶ୍ରଣ ପ୍ରସ୍ତୁତି ପାଇଁ ବ୍ୟବହାର କରାଯାଇପାରିବ । ଏହି ଯନ୍ତ୍ର ଅପେକ୍ଷାକୃତ କମ୍ ରକ୍ଷଣାବେକ୍ଷଣ ଆବଶ୍ୟକ କରିଥାଏ । କିନ୍ତୁ, ଏହି ଯନ୍ତ୍ରର ଗୋଟିଏ ଅସୁବିଧା ହେଲା ଏହା ମିଶ୍ରିତ ସାମଗ୍ରୀକୁ ଆପେ ଆପେ ଖଲାସ କରିବାରେ ସମର୍ଥ ହୋଇ ନ ଥାଏ । ମିଶ୍ରିତ ସାମଗ୍ରୀକୁ ଡ୍ରମ୍ରୁ କାଢ଼ିବା ପାଇଁ ଲୋକଙ୍କ ଆବଶ୍ୟକତା ପଡ଼ିଥାଏ, ତେଣୁ ବଡ଼ ଧରଣର ନିର୍ମାଣ ପ୍ରକଳ୍ପରେ ଏହାକୁ ବ୍ୟବହାର କରିବା ଏତେ କାର୍ଯ୍ୟଦକ୍ଷ ହୋଇ ନ ଥାଏ ।
ରିଭର୍ସିଂ ଡ୍ରମ୍ ମିକ୍ସରର ଡ୍ରମ୍ ଉଭୟ ଦିଗରେ ବୁଲିବାରେ ସକ୍ଷମ ହୋଇଥାଏ । ତେଣୁ, ଡ୍ରମ୍ ଭିତରେ ଲାଗିଥିବା ବ୍ଲେଡ୍ଗୁଡ଼ିକୁ ଫଳପ୍ରଦ ଭାବେ ସାମଗ୍ରୀକୁ ମିଶ୍ରଣ କରିପାରିଥାଏ । ସାମଗ୍ରୀକୁ ମିକ୍ସ ବା ମିଶ୍ରଣ କରିବା ପାଇଁ ଡ୍ରମ୍ ଭିତରେ ବ୍ଲେଡ୍ ବା ଡେଣା ଲାଗିଥାଏ । ଏ ପ୍ରକାର ମିକ୍ସରର ଗୋଟିଏ ଫାଇଦା ହେଉଛି, ଓଦା ହେଉ କି ଶୁଖିଲା ମିଶ୍ରଣ ଏହା ଉଚ୍ଚ ମାତ୍ରାରେ ସମରୂପୀ କଂକ୍ରିଟ୍ ମିଶ୍ରଣ ଦେବାରେ ସକ୍ଷମ ଅଟେ । ଏଗୁଡ଼ିକ ଛୋଟରୁ ମଧ୍ୟମ-ଆକାରର ନିର୍ମାଣ ପ୍ରକଳ୍ପ ପାଇଁ ଉପଯୁକ୍ତ ହୋଇଥାଏ ଏବଂ ସହଜରେ ସଫା ଓ ରକ୍ଷଣାବେକ୍ଷଣ କରାଯାଇପାରିଥାଏ । ହେଲେ, ଏହାର ଅପେକ୍ଷାକୃତ ଅଧିକ ମୂଲ୍ୟ କାରଣରୁ କେତେକ ନିର୍ମାଣ ପ୍ରକଳ୍ପ ପାଇଁ ଏଗୁଡ଼ିକ ଅନାକର୍ଷଣୀୟ ମନେ ହୋଇଥାଏ ।
ଏହାର ଗୋଲାକାର ମିଶ୍ରଣ ପାତ୍ର କାରଣରୁ ଏହା ସର୍କୁଲାର୍ ମିକ୍ସର୍ ବା ପ୍ୟାନ୍ ମିକ୍ସର୍ ଭାବେ ପରିଚିତ ଅଟେ । ଏହି କଂକ୍ରିଟ୍ ମିକ୍ସରରେ ଏକ ଗୋଲାକାର ମିଶ୍ରଣ ପାତ୍ର ରହିଥାଏ ଯାହାକୁ ଚକ ଥିବା ଫ୍ରେମ୍ ଉପରେ ଭୂସମାନ୍ତର ଭାବେ ଖଞ୍ଜାଯାଇଥାଏ । ଏପରି ମିକ୍ସର୍ର ଗୋଟିଏ ଫାଇଦା ହେଉଛି ଏହା ଅତି ସମରୂପୀ କଂକ୍ରିଟ୍ ମିଶ୍ରଣ ଉତ୍ପନ୍ନ କରିବାରେ ସମର୍ଥ ଅଟେ । ପ୍ୟାନ୍-ଟାଇପ୍ ମିକ୍ସର ବିଭିନ୍ନ ପ୍ରକାର କଂକ୍ରିଟ୍ ମିଶ୍ରଣ କରିବା ପାଇଁ ମଧ୍ୟ ଉପଯୁକ୍ତ ଅଟେ, ଯାହା ମଧ୍ୟରେ ଓଦା/ଶୁଖିଲା ମିଶ୍ରଣ, ମୋର୍ଟାର୍, ପ୍ଲାଷ୍ଟର ଏବଂ ରିଫ୍ରାକ୍ଟୋରି ସାମଗ୍ରୀ ଅନ୍ତର୍ଭୁକ୍ତ । ହେଲେ, ଏହାର ମୁଖ୍ୟ ଅସୁବିଧା ହେଉଛି ଅନ୍ୟାନ୍ୟ ମିକ୍ସର ତୁଳନାରେ ଏଥିରେ କମ୍ ପରିମାଣର କଂକ୍ରିଟ୍ ପ୍ରସ୍ତୁତ କରାଯାଇପାରିବ । ଉଚ୍ଚ କ୍ଷମତାବିଶିଷ୍ଟ ମିଶ୍ରଣ ଉପକରଣ ଆବଶ୍ୟକ କରୁଥିବା ବଡ଼ ଧରଣର ନିର୍ମାଣ କାର୍ଯ୍ୟ ପାଇଁ ଏହା ଉପଯୁକ୍ତ ନ ହୋଇପାରେ ।
କଣ୍ଟିନ୍ୟୁଅସ୍ ମିକ୍ସର୍ସ ବଂ କଣ୍ଟିନ୍ୟୁଅସ୍ ଫ୍ଲୋ ମିକ୍ସର୍ସ କଂକ୍ରିଟ୍ କିମ୍ବା ଅନ୍ୟାନ୍ୟ ନିର୍ମାଣ ସାମଗ୍ରୀର ମିଶ୍ରଣ ପାଇଁ ନିର୍ମାଣ ଉଦ୍ୟୋଗରେ ବ୍ୟବହୃତ ହେଉଥିବା ଏକ ପ୍ରକାର ମିକ୍ସର୍ ଅଟେ । ବ୍ୟାଚ୍ ମିକ୍ସର୍ସରେ ଗୋଟିଏ ସମୟରେ କେବଳ ଏକ ନିର୍ଦ୍ଦିଷ୍ଟ ପରିମାଣର ସାମଗ୍ରୀ ମିଶ୍ରଣ ହୋଇପାରିଥାଏ କିନ୍ତୁ କଣ୍ଟିନ୍ୟୁଅସ୍ ମିକ୍ସରର ମିକ୍ସିଂ ଚାମ୍ବରରେ ଅନବରତ ଭାବେ ମିଶ୍ରଣ କାର୍ଯ୍ୟ ଚାଲୁ ରହିପାରିବ । ଗୋଟିଏ ପାର୍ଶ୍ୱରେ ମିଶ୍ରଣ ଉପାଦାନଗୁଡ଼ିକୁ ଅନବରତ ଭାବେ ମିକ୍ସିଂ ଚାମ୍ବର ମଧ୍ୟରେ ଢଳାଯାଇଥାଏ ଓ ମିଶ୍ରଣ ହୋଇ ପ୍ରସ୍ତୁତ ହୋଇଥିବା ସାମଗ୍ରୀ ଅନ୍ୟ ପାର୍ଶ୍ୱରେ ଅନବରତ ଭାବେ ନିଷ୍କାସିତ ହୋଇଚାଲିଥାଏ । ଦ୍ରୁତ ଗତିରେ ଓ ଦକ୍ଷତାର ସହିତ ବହୁ ପରିମାଣର ସମରୂପୀ ସାମଗ୍ରୀ ଉତ୍ପନ୍ନ କରିବା ଏହାର ଏକ ଫାଇଦା ଅଟେ । ଏହି ଯନ୍ତ୍ରକୁ ବ୍ୟାପକ ବର୍ଗର ନିର୍ମାଣ ସାମଗ୍ରୀ, ଯଥା- କଂକ୍ରିଟ୍ (ଉଭୟ ଓଦା ଓ ଶୁଖିଲା ମିଶ୍ରଣ), ମୋର୍ଟାର୍ ଏବଂ ପିଚୁର ମିଶ୍ରଣ ପାଇଁ ବ୍ୟବହାର କରାଯାଇପାରିବ ।
ହେଲେ, ଏହାର ମୁଖ୍ୟ ଅସୁବିଧା ହେଉଛି ଏହାର ଅପେକ୍ଷାକୃତ ଅଧିକ ମୂଲ୍ୟ । ଏହାର ପରିଚାଳନା ପାଇଁ ମଧ୍ୟ ଅଧିକ ପରିମାଣର ଜାଗା ଆବଶ୍ୟକ ହୋଇଥାଏ । ତେଣୁ, ଛୋଟ ନିର୍ମାଣ କାର୍ଯ୍ୟରେ ବ୍ୟବହାର ହେବା ପାଇଁ ଏହା ସାଧାରଣତଃ ଅନୁପଯୁକ୍ତ ହୋଇଥାଏ ।
କଂକ୍ରିଟ୍ ଏବଂ ଅନ୍ୟାନ୍ୟ ନିର୍ମାଣ ସାମଗ୍ରୀର ମିଶ୍ରଣ ପାଇଁ ନିର୍ମାଣ ଉଦ୍ୟୋଗରେ ଅନେକ ପ୍ରକାର ମିକ୍ସର୍ ଏବଂ ମିଶ୍ରଣ ଯନ୍ତ୍ର ବ୍ୟବହୃତ ହୋଇଥାଏ । ସବୁଠାରୁ ସାଧାରଣ ମିକ୍ସରଗୁଡ଼ିକ ହେଲା: ବ୍ୟାଚ୍ ମିକ୍ସର୍, ଡ୍ରମ୍ ମିକ୍ସର୍, ପ୍ୟାନ୍-ଟାଇପ୍ ମିକ୍ସର୍, ଟିଲ୍ଟିଂ ଡ୍ରମ୍ ମିକ୍ସର୍, ନନ୍-ଟିଲ୍ଟିଂ ଡ୍ରମ୍ ମିକ୍ସର୍, ରିଭର୍ସିଂ ଡ୍ରମ୍ ମିକ୍ସର୍ସ ଏବଂ କଣ୍ଟିନ୍ୟୁଅସ୍ ମିକ୍ସର୍ସ । ବିଭିନ୍ନ ପ୍ରକାର ସିମେଣ୍ଟ ମିକ୍ସର୍ଗୁଡ଼ିକର ସଂକ୍ଷିପ୍ତ ସାରାଂଶ ତଳେ ଦିଆଗଲା:
ଅତଏବ, ପ୍ରତ୍ୟେକ କିସମର ମିକ୍ସରରେ ଫାଇଦା ଓ ଅସୁବିଧା ରହିଛି । ତେଣୁ ନିର୍ମାଣ ପ୍ରକଳ୍ପର ନିର୍ଦ୍ଦିଷ୍ଟ ଆବଶ୍ୟକତାକୁ ଦୃଷ୍ଟିରେ ରଖି ଉପଯୁକ୍ତ କିସମର ମିକ୍ସର ବଛାଯାଇପାରିବ । ନିର୍ମାଣ ପ୍ରକଳ୍ପ ପାଇଁ ଉପଯୁକ୍ତ ପ୍ରକାରର କଂକ୍ରିଟ୍ ମିକ୍ସର୍ ଚୟନ କରିବା ସମୟରେ ତାହାର ମିଶ୍ରଣ କ୍ଷମତା, ବେଗ, ଦକ୍ଷତା ଏବଂ ବହୁ ଉପଯୋଗିତା ଭଳି କାରକଗୁଡ଼ିକୁ ଧ୍ୟାନରେ ରଖିବା ଜରୁରୀ ହୋଇଥାଏ ।
