ଏମ୍୭.୫ କଂକ୍ରିଟ୍ ଅନୁପାତର ନିର୍ଦ୍ଧାରଣ କେମିତି କରିବେ

ନିର୍ମାଣରେ ଏମ୍୭.୫ କଂକ୍ରିଟ୍ ମିଶ୍ରଣ ଏପରି ଏକ ପ୍ରକାରର ପତଳା କଂକ୍ରିଟ୍ ହୋଇଥାଏ ଯାହାକୁ ଅତ୍ୟଧିକ ସୁଦୃଢ଼ତା ଆବଶ୍ୟକ ହୋଇ ନ ଥିବା ସ୍ଥାନରେ ବ୍ୟବହାର କରାଯାଇଥାଏ । ଏମ୍୭.୫ ରେ ‘‘ଏମ୍’’ର ଅର୍ଥ ହେଉଛି ମିଶ୍ରଣ ବା ‘‘ମିକ୍ସ’’ ଏବଂ ୭.୫ ହେଉଛି ୨୮ ଦିନ ପରେ କଂକ୍ରିଟ୍ ପାଉଥିବା ଶକ୍ତି, ଯାହା ଏନ୍/ମିମି2 ରେ ମପାଯାଇଥାଏ । ଏହି ଅନୁପାତ ପ୍ରାୟତଃ ମେଜିଆ ବିଛାଇବା, ମାଟି ସମତଳ କରିବା କିମ୍ବା ବେସ୍ ଲେୟାର ସୃଷ୍ଟି କରିବା ଭଳି କାର୍ଯ୍ୟ ପାଇଁ ବ୍ୟବହୃତ ହୁଏ ଯେଉଁଠାରେ କଂକ୍ରିଟ୍ କୁ ଭାରୀ ଭାର ସମ୍ଭାଳିବାର ଆବଶ୍ୟକତା ନ ଥାଏ ।

ସରଳ ଭାଷାରେ, ଏମ୍୭.୫ କଂକ୍ରିଟ ଅନୁପାତ ଆପଣଙ୍କୁ କହିଥାଏ ଯେ ଆପଣଙ୍କୁ କେତେ ସିମେଣ୍ଟ, ବାଲି ଏବଂ ଗୋଡ଼ି (ଏଗ୍ରିଗେଟ୍) ମିଶ୍ରଣ କରିବାକୁ ପଡିବ । କଂକ୍ରିଟ୍ ଯଥେଷ୍ଟ ଶକ୍ତିଶାଳୀ ଏବଂ କାମ କରିବାକୁ ସହଜ ବୋଲି ସୁନିଶ୍ଚିତ କରିବା ପାଇଁ ଏହି ମିଶ୍ରଣକୁ ସଠିକ୍ କରିବା ଗୁରୁତ୍ୱପୂର୍ଣ୍ଣ । ଏକ ବୃହତ ପ୍ରକଳ୍ପରେ କାର୍ଯ୍ୟ କରିବା ସମୟରେ, ମିଶ୍ରଣର ଗାଢ଼ତା ଏବଂ ଉଚ୍ଚ ଗୁଣବତ୍ତା ସୁନିଶ୍ଚିତ କରିବା ପାଇଁ ୧ ଘନ ମିଟର ନିମନ୍ତେ ଏମ୍୭.୫ କଂକ୍ରିଟ ଅନୁପାତ ଗଣନା କରିବା ବିଶେଷ ଭାବରେ ଗୁରୁତ୍ୱପୂର୍ଣ୍ଣ ।

ଏମ୍୭.୫ କଂକ୍ରିଟ୍ ଗ୍ରେଡ୍ ର ମୌଳିକ ଉପାଦାନଗୁଡ଼ିକ କ’ଣ?

ଏମ୍୭.୫ କଂକ୍ରିଟ୍ ମିଶ୍ରଣ ତିନିଟି ମୁଖ୍ୟ ଉପାଦାନରେ ନିର୍ମିତ ହୋଇଥାଏ: ସିମେଣ୍ଟ, ବାଲି ଏବଂ ଗୋଡ଼ି ପ୍ରତ୍ୟେକର କାର୍ଯ୍ୟ ତଳେ ଦିଆଗଲା:

୧. ସିମେଣ୍ଟ ଏକ ଅଠା ଭଳି କାମ କରେ ଏବଂ ସବୁ ଉପାଦାନକୁ ଏକାଠି ଧରି ରଖେ ଏବଂ କଂକ୍ରିଟ୍ କୁ ତାହାର ଶକ୍ତି ପ୍ରଦାନ କରିଥାଏ ।

୨. ବାଲି ବଡ଼ ପଥର (ଗୋଡ଼ି) ମଧ୍ୟରେ ରହିଥିବା ଫାଙ୍କଗୁଡ଼ିକୁ ଭରିଥାଏ ଏବଂ କଂକ୍ରିଟକୁ ଅଧିକ ମସୃଣ ଓ କାମ କରିବାରେ ଅଧିକ ସହଜ କରିଥାଏ ।

୩. କ୍ରଶଡ୍ ପଥର ବା ଗୋଡ଼ି ଭଳି ଏଗ୍ରିଗେଟ୍ କଂକ୍ରିଟ୍ କୁ ସ୍ଥୂଳତା ଏବଂ ଶକ୍ତି ଯୋଗାଇଥାଏ ।

ସାଧାରଣ ଏମ୍୭.୫ ମିଶ୍ରଣ ଅନୁପାତରେ ୧ ଭାଗ ସିମେଣ୍ଟ, ୪ ଭାଗ ବାଲି ଏବଂ ୮ ଭାଗ ଏଗ୍ରିଗେଟ୍ ରହିଥାଏ । ୧ ଘନ ମିଟର ପାଇଁ ସଠିକ୍ ମିଶ୍ରଣ ପାଇବା ପାଇଁ ଆପଣଙ୍କୁ ସେହି ଅନୁପାତରେ ଉପାଦାନଗୁଡ଼ିକୁ ବୃଦ୍ଧି କରିବାକୁ ପଡ଼ିବ । ଆପଣଙ୍କର ପ୍ରକଳ୍ପର ଆବଶ୍ୟକତା, ବିଶେଷ କରି ଅଣ-ଢାଞ୍ଚାଗତ ବ୍ୟବହାର ପାଇଁ ଯେପରି କଂକ୍ରିଟ୍ ମିଶ୍ରଣ ଉପଯୁକ୍ତ ହୁଏ ତାହା ସୁନିଶ୍ଚିତ କରିବାରେ ଏହା ସାହାଯ୍ୟ କରିଥାଏ ।

ଏମ୍୭.୫ କଂକ୍ରିଟ୍ ର ଉଦ୍ଦେଶ୍ୟ ଏବଂ ପ୍ରୟୋଗ

ଏମ୍୭.୫ କଂକ୍ରିଟ ହେଉଛି ଏକ ପ୍ରକାର ଲିନ୍ କଂକ୍ରିଟ୍ ଅଟେ, ଯାହାକୁ ଏପରି ଜାଗାରେ ବ୍ୟବହାର କରାଯାଏ ଯେଉଁଠାରେ ଉଚ୍ଚ ଶକ୍ତିର ଆବଶ୍ୟକତା ନାହିଁ କିନ୍ତୁ ଯେଉଁଠାରେ ଏକ ଦୃଢ଼, ସ୍ଥିର ଭିତ୍ତିଭୂମି ଗୁରୁତ୍ୱପୂର୍ଣ୍ଣ ଅଟେ । ଏହାକୁ ସାଧାରଣତଃ ନିମ୍ନଲିଖିତ ଉଦ୍ଦେଶ୍ୟ ପାଇଁ ବ୍ୟବହାର କରାଯାଇଥାଏ:

୧. ପେଭିଂ ଓ ମେଜିଆ କାମ
ଚଲାପଥ ଏବଂ ମେଜିଆରେ ଏକ ମଜବୁତ ଆଧାର ସ୍ତର ତିଆରି କରିବା ପାଇଁ ଏମ୍୭.୫ ଅନୁପାତ ବହୁତ ଭଲ କାମ କରିଥାଏ । ବହୁତ ମଜବୁତ ହେବାର ଆବଶ୍ୟକତା ବିନା ଏହା ଉପରିସ୍ଥ ସ୍ତରଗୁଡ଼ିକୁ ସମର୍ଥନ ଯୋଗାଇଥାଏ ।

୨. ସମତଳକରଣ
ଫାଉଣ୍ଡେସନ୍ ଭଳି ଜିନିଷ ନିର୍ମାଣ କରିବା ପୂର୍ବରୁ ଜମିକୁ ସମତଳ କରିବା ପାଇଁ ମଧ୍ୟ ଏହି ମିଶ୍ରଣ ଭଲ ହୋଇଥାଏ । ଏହା ଏକ ସମତଳ ପୃଷ୍ଠଭାଗ ତିଆରି କରିବାରେ ସାହାଯ୍ୟ କରେ ଯାହା ପରବର୍ତ୍ତୀ ନିର୍ମାଣ କାର୍ଯ୍ୟ ପାଇଁ ପ୍ରସ୍ତୁତ ହୋଇଥାଏ ।

୩. ଅଣ-ଢାଞ୍ଚାଗତ ଉପାଦାନ
ଭାରୀ ଭାର ସମ୍ଭାଳିବାର ଆବଶ୍ୟକତା ନ ଥିବା କାନ୍ଥ ଏବଂ ଅନ୍ୟାନ୍ୟ ଅଂଶଗୁଡ଼ିକୁ ନିର୍ମାଣ କରିବା ପାଇଁ ଏମ୍୭.୫ କଂକ୍ରିଟ୍ ଭଲ କାମ କରିଥାଏ ।

୪. ଅସ୍ଥାୟୀ ଢାଞ୍ଚା
ଏହା ବହୁତ ମଜବୁତ ହୋଇ ନ ଥିବାରୁ, ଦୀର୍ଘସ୍ଥାୟିତା ଆବଶ୍ୟକ କରୁ ନ ଥିବା ଅସ୍ଥାୟୀ ଢାଞ୍ଚା କିମ୍ବା ଫର୍ମୱାର୍କ ପାଇଁ ମଧ୍ୟ ଏମ୍୭.୫ ଅନୁପାତ ଭଲ କାମ କରିଥାଏ ।

ବଡ଼ ବଡ଼ ପ୍ରକଳ୍ପ ପାଇଁ, କଂକ୍ରିଟ୍ ର ସମଗ୍ର ବ୍ୟାଚ୍ ଯେପରି ସମାନ ଗୁଣମାନର ଏବଂ ସମାନ ଶକ୍ତିର ହୁଏ ତାହା ସୁନିଶ୍ଚିତ କରିବା ପାଇଁ ୧ ଘନ ମିଟର ପାଇଁ ଏମ୍୭.୫ କଂକ୍ରିଟ୍ ଅନୁପାତକୁ ଜାଣିରଖିବା ଗୁରୁତ୍ୱପୂର୍ଣ୍ଣ ।

ଏମ୍୭.୫ କଂକ୍ରିଟ୍ କେତେକ ମଜବୁତ ଓ ସ୍ଥାୟୀ ଅଟେ?

• ଏମ୍୭.୫ କଂକ୍ରିଟ୍ ଏପରି ପରିସ୍ଥିତିଗୁଡ଼ିକ ପାଇଁ ନିର୍ମିତ ହୋଇଥାଏ ଯେଉଁଠାରେ ଆପଣ ବହୁତ ଶକ୍ତି ଆବଶ୍ୟକ କରି ନ ଥାନ୍ତି । ଏହାର କମ୍ପ୍ରେସିଭ୍ ଶକ୍ତି ହେଉଛି ୭.୫ ଏନ୍/ମିମି2, ଯାହାର ଅର୍ଥ ହେଉଛି ଏହା ବିମ୍ କିମ୍ବା ଭାର ବହନକାରୀ କାନ୍ଥ ଭଳି ମଜବୁତ ଅଂଶ ନିର୍ମାଣ ପାଇଁ ଭଲ ନୁହେଁ । କିନ୍ତୁ ମେଜିଆ, ଲେଭଲିଂ ଏବଂ ଅନ୍ୟାନ୍ୟ ଅଣ-ଢାଞ୍ଚାଗତ ଅଂଶଗୁଡ଼ିକ ପାଇଁ ଏହା ଭଲ କାମ ଦେଇଥାଏ ।

   

• ଏମ୍୭.୫ କଂକ୍ରିଟ୍ ଦୀର୍ଘସ୍ଥାୟୀ ଅଟେ ଏବଂ ଏହା ହାଲୁକା ପରିବେଶ ପରିସ୍ଥିତି ଏବଂ ବ୍ୟବହାରଜନିତ ଅବକ୍ଷୟ ଭଳି ସ୍ୱାଭାବିକ ପରିସ୍ଥିତିକୁ ସହିପାରିଥାଏ । ଅତ୍ୟଧିକ କଠୋର ପାଣିପାଗ କିମ୍ବା ଭାରି ଭାର ବିଶିଷ୍ଟ ଅଞ୍ଚଳ ପାଇଁ ଏହା ସର୍ବୋତ୍ତମ ପସନ୍ଦ ହୋଇ ନ ପାରେ ।

   

• ଏମ୍୭.୫ କଂକ୍ରିଟଠାରୁ ସର୍ବୋତ୍ତମ କାମ ହାସଲ କରାଇବା ପାଇଁ, ତାହାକୁ ଉପଯୁକ୍ତ ଭାବେ କିଓର୍ କରାଯିବା ଏବଂ ତାହାର ଯତ୍ନ ନିଆଯିବା ଗୁରୁତ୍ୱପୂର୍ଣ୍ଣ ହୋଇଥାଏ । ଏହାଦ୍ୱାରା ଏହା ନିଜର ଲକ୍ଷ୍ୟିତ ବ୍ୟବହାର ପାଇଁ ଯଥାସମ୍ଭବ ଦୀର୍ଘସ୍ଥାୟୀ ହୋଇପାରିଥାଏ ।