ଉତ୍ତମ ଘର ନିର୍ମାଣ: ଇଟାର ପ୍ରକାର ବିଷୟରେ ଏକ ବ୍ୟବହାରିକ ଗାଇଡ୍

ଇଟା କ’ଣ?

ଘର ତିଆରିରେ ଇଟା ହେଉଛି ସବୁଠାରୁ ଅଧିକ ବ୍ୟବହୃତ ସାମଗ୍ରୀ। ଏଗୁଡ଼ିକ ମାଟି, ବାଲି, ଚୂନ କିମ୍ବା କଂକ୍ରିଟରୁ ତିଆରି ହୋଇଥାଏ। ଇଟାର ଗୁଣ ଯେମିତି କି ସ୍ଥାୟୀତ୍ୱ, କଠିନତା ଏବଂ ଅଗ୍ନିରୋଧକ ଶକ୍ତି, ଆପଣଙ୍କ ଘରର ମଜବୁତିରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରେ।

ଉଦ୍ଦେଶ୍ୟ ଅନୁସାରେ, ଇଟାର ମୋଟେଇ ଏବଂ ଏହାର ଆକାର ଭିନ୍ନ ହୋଇପାରେ। ଭାରତରେ ଇଟାର ସାଧାରଣ ଆକାର ପ୍ରାୟ 190 mm × 90 mm × 90 mm, କିନ୍ତୁ ଗାଠନିକ ଆବଶ୍ୟକତା ଅନୁଯାୟୀ କଷ୍ଟମ୍ ସାଇଜ୍ ମଧ୍ୟ ଉପଲବ୍ଧ।

ଆପଣ କେଉଁ ପ୍ରକାରର ସଂରଚନା ତିଆରି କରୁଛନ୍ତି ସେ ବିଷୟରେ ନିଶ୍ଚିତ ନାହାଁନ୍ତି କି? ସଠିକ୍ ପଥରେ ଆରମ୍ଭ କରିବା ପାଇଁ ଆମର 'ନିର୍ମାଣରେ କାନ୍ଥର ପ୍ରକାର' ଗାଇଡ୍ ଦେଖନ୍ତୁ।

ବିଭିନ୍ନ ପ୍ରକାରର ଇଟା

ଏଠାରେ କିଛି ବିଭିନ୍ନ ପ୍ରକାରର ଇଟା ବିଷୟରେ ଦିଆଯାଇଛି:

1. ଖରାଶୁଖିଲା ଇଟା

ଏଗୁଡ଼ିକ ସବୁଠାରୁ ପୁରୁଣା ପ୍ରକାରର ଇଟା, ଯାହା ନଡ଼ା/କୁଟା ମିଶ୍ରିତ ଓଦା ମାଟିକୁ ଖରାରେ ଶୁଖାଇ ପ୍ରସ୍ତୁତ କରାଯାଏ। ଏଗୁଡ଼ିକ ଶସ୍ତା କିନ୍ତୁ କମ୍ ସ୍ଥାୟୀ ଏବଂ ମୁଖ୍ୟତଃ ଅସ୍ଥାୟୀ କିମ୍ବା ଗ୍ରାମୀଣ ସଂରଚନା ପାଇଁ ବ୍ୟବହୃତ ହୁଏ।

2. ପୋଡ଼ା ମାଟି ଇଟା

ଘରୋଇ ନିର୍ମାଣରେ ପୋଡ଼ା ମାଟି ଇଟା ସବୁଠାରୁ ଅଧିକ ବ୍ୟବହୃତ ହୁଏ। ଉଚ୍ଚ ତାପମାତ୍ରାରେ ମାଟିକୁ ପୋଡ଼ି ଏହା ତିଆରି କରାଯାଏ; ଏହି ଇଟାଗୁଡ଼ିକ ଶକ୍ତ, ସମାନ ଏବଂ ତାପ ଓ ଚାପ ପ୍ରତିରୋଧକ। ଏଗୁଡ଼ିକ ଭାର ସମ୍ଭାଳୁଥିବା କାନ୍ଥ ଏବଂ ସାଧାରଣ ନିର୍ମାଣ କାମ ପାଇଁ ଆଦର୍ଶ।

3. ଫ୍ଲାଏ ଆଶ୍ ଇଟା

ଫ୍ଲାଏ ଆଶ୍, ସିମେଣ୍ଟ ଏବଂ ପାଣିରୁ ନିର୍ମିତ ଫ୍ଲାଏ ଆଶ୍ ଇଟା ଏକ ପରିବେଶ-ଅନୁକୂଳ ବିକଳ୍ପ। ଏଗୁଡ଼ିକ ହାଲୁକା, ଶସ୍ତା ଏବଂ କମ୍ ଓଜନ ହେତୁ ବହୁତଲା ବିଶିଷ୍ଟ କୋଠା ପାଇଁ ଉପଯୁକ୍ତ। ଏହି ଇଟା ଜଳ ପ୍ରବେଶ ଏବଂ ଫାଟ ସୃଷ୍ଟି ହେବା ପ୍ରତିରୋଧ କରିଥାଏ।

4. କଂକ୍ରିଟ୍ ଇଟା

ଏଗୁଡ଼ିକ ସିମେଣ୍ଟ, ବାଲି ଏବଂ ଜଳ ମିଶ୍ରିତ କରି ମିଶ୍ରଣଟିକୁ ଛାଞ୍ଚରେ ଢାଳି ପ୍ରସ୍ତୁତ କରାଯାଏ। ଏଗୁଡ଼ିକ ଶକ୍ତ, ସ୍ଥାୟୀ ଏବଂ ଅଗ୍ନି ଓ ପାଣିପାଗ ପ୍ରତିରୋଧକ। ଏହି ଇଟା ଭାର ସମ୍ଭାଳୁଥିବା ସଂରଚନା ଏବଂ ପେଭିଂ ବ୍ଲକ୍ ଭାବରେ ବ୍ୟବହୃତ ହୁଏ।

5. ଇଞ୍ଜିନିୟରିଂ ଇଟା

ଏଗୁଡ଼ିକ ଗାଠନିକ ବ୍ୟବହାର ପାଇଁ ଡିଜାଇନ୍ କରାଯାଇଛି। ଭଲ ମାନର ମାଟିକୁ ଉଚ୍ଚ ତାପମାତ୍ରାରେ ପୋଡ଼ି ଏହା ପ୍ରସ୍ତୁତ କରାଯାଏ, ଯାହା ଏହାକୁ ଶକ୍ତ, ଘନ ଏବଂ ଜଳ ଓ ରାସାୟନିକ ପ୍ରତିରୋଧକ କରିଥାଏ। ଏହି ପ୍ରକାରର ଇଟା ସାଧାରଣତଃ ସେହି ସ୍ଥାନରେ ବ୍ୟବହୃତ ହୁଏ ଯେଉଁଠାରେ ଅଧିକ ଭାର ପଡ଼ିବାର ସମ୍ଭାବନା ଥାଏ କିମ୍ବା ଜଳ ପ୍ରତିରୋଧର ଆବଶ୍ୟକତା ଥାଏ।

6. କ୍ୟାଲସିୟମ ସିଲିକେଟ୍ ଇଟା

ଏଗୁଡ଼ିକ ବାଲି ଏବଂ ଚୂନରୁ ପ୍ରସ୍ତୁତ ଏବଂ ଏଗୁଡ଼ିକ ନିଜର ଶକ୍ତି, ସ୍ଥାୟୀତ୍ୱ ଏବଂ ଅଗ୍ନି ପ୍ରତିରୋଧ ଗୁଣ ପାଇଁ ଜଣାଶୁଣା। କ୍ୟାଲସିୟମ ସିଲିକେଟ୍ ଇଟା ହାଲୁକା ଏବଂ ଏହାର ଉତ୍ତମ ଇନସୁଲେସନ୍ ଗୁଣ ରହିଛି, ଯାହା ଏହାକୁ ବହୁତଲା କୋଠା କିମ୍ବା ଯେଉଁଠାରେ ତାପଜ ଇନସୁଲେସନ୍ ଗୁରୁତ୍ୱପୂର୍ଣ୍ଣ ସେଠାରେ ବ୍ୟବହାର ପାଇଁ ଉପଯୁକ୍ତ କରିଥାଏ।

7. ଇକୋ ବ୍ରିକ୍ସ

ଏହି ପ୍ରକାରର ଇଟା ପ୍ଲାଷ୍ଟିକ୍ ବୋତଲ, କାଗଜ ଏବଂ ଅନ୍ୟାନ୍ୟ ବର୍ଜ୍ୟବସ୍ତୁ ଭଳି ପୁନଃ ବ୍ୟବହୃତ ସାମଗ୍ରୀରୁ ତିଆରି। ଏହା ଏକ ପରିବେଶ-ଅନୁକୂଳ ବିକଳ୍ପ ଏବଂ ଏହାର ସ୍ଥାୟୀତ୍ୱ ହେତୁ ଏହା ଲୋକପ୍ରିୟତା ହାସଲ କରୁଛି। ଏଗୁଡ଼ିକ ସାଧାରଣତଃ ଅଣ-ଗାଠନିକ ଉଦ୍ଦେଶ୍ୟ ଯେମିତି କି ବଗିଚା କାନ୍ଥ, ଲ୍ୟାଣ୍ଡସ୍କେପିଂ କିମ୍ବା ସଜାଇବା କାମ ପାଇଁ ବ୍ୟବହୃତ ହୁଏ।

ଗୁଣବତ୍ତା ଆଧାରରେ ଇଟାର ପ୍ରକାରଗୁଡ଼ିକ କ’ଣ?

ଇଟାଗୁଡ଼ିକ ସେମାନଙ୍କର ଶକ୍ତି, ସ୍ଥାୟୀତ୍ୱ ଏବଂ ରୂପ ଆଧାରରେ ବିଭିନ୍ନ ଗ୍ରେଡରେ ଆସିଥାଏ। ମୋଟାମୋଟି ଭାବରେ, ଇଟାଗୁଡ଼ିକୁ ପ୍ରଥମ ଶ୍ରେଣୀ, ଦ୍ୱିତୀୟ ଶ୍ରେଣୀ, ତୃତୀୟ ଶ୍ରେଣୀ ଏବଂ ଚତୁର୍ଥ ଶ୍ରେଣୀ ପ୍ରକାରରେ ଶ୍ରେଣୀଭୁକ୍ତ କରାଯାଇଛି।

1. ପ୍ରଥମ ଶ୍ରେଣୀ ଇଟା ଉଚ୍ଚ-ଗୁଣବତ୍ତା ସମ୍ପନ୍ନ, ଆକାରରେ ସମାନ ଏବଂ ଗୁରୁତ୍ୱପୂର୍ଣ୍ଣ ଗାଠନିକ କାର୍ଯ୍ୟ ପାଇଁ ବ୍ୟବହୃତ ହୁଏ।

2. ଦ୍ୱିତୀୟ ଶ୍ରେଣୀ ଇଟା ସାମାନ୍ୟ ଅମସୃଣ ଏବଂ ଏହା ସେଠାରେ ବ୍ୟବହୃତ ହୁଏ ଯେଉଁଠାରେ ଫିନିସିଂ ଅଧିକ ଜରୁରୀ ନୁହେଁ।

3. ତୃତୀୟ ଶ୍ରେଣୀ ଇଟା ଶସ୍ତା, କମ୍ ସ୍ଥାୟୀ ଏବଂ ଅସ୍ଥାୟୀ ସଂରଚନା ପାଇଁ ସର୍ବୋତ୍ତମ।

4. ଚତୁର୍ଥ ଶ୍ରେଣୀ ଇଟାଗୁଡ଼ିକ ଭଙ୍ଗା କିମ୍ବା ଅଧିକ ପୋଡ଼ି ଯାଇଥିବା ଇଟା, ଯାହାକୁ ପ୍ରାୟତଃ ରାସ୍ତା ଭିତ୍ତିଭୂମିରେ କିମ୍ବା ଫିଲର୍ ମ୍ୟାଟେରିଆଲ୍ ଭାବରେ ବ୍ୟବହୃତ ହୁଏ।

ବିଭିନ୍ନ ପ୍ରକାରର ଇଟାର ପ୍ରୟୋଗ/ବ୍ୟବହାର

ନିର୍ମାଣରେ ବିଭିନ୍ନ ପ୍ରକାରର ଇଟା ଭିନ୍ନ ଭିନ୍ନ ଉଦ୍ଦେଶ୍ୟ ପୂରଣ କରେ। ପ୍ରତ୍ୟେକ ପ୍ରକାରର ଇଟା କେଉଁଠି ଏବଂ କିପରି ବ୍ୟବହାର କରିବେ ଜାଣିଲେ ଆପଣ ସର୍ବୋତ୍ତମ ଫଳାଫଳ ପାଇପାରିବେ।

1. ମାଟି ଇଟା ଏହାର ଉତ୍ତମ ଇନସୁଲେସନ୍ ଏବଂ କ୍ଲାସିକ୍ ଲୁକ୍ ଯୋଗୁଁ ଘରର କାନ୍ଥ ପାଇଁ ବ୍ୟବହୃତ ହୁଏ।

2. ଫ୍ଲାଏ ଆଶ୍ ଇଟା ପରିବେଶ ଅନୁକୂଳ ଏବଂ ହାଲୁକା, ଯାହା ବହୁତଲା କୋଠା ପାଇଁ ଆଦର୍ଶ।

3. କଂକ୍ରିଟ୍ ଇଟା ଅଧିକ ଶକ୍ତି ପ୍ରଦାନ କରେ ଏବଂ ଭାର ସମ୍ଭାଳୁଥିବା କାନ୍ଥ କିମ୍ବା ଶିଳ୍ପାଞ୍ଚଳରେ ବ୍ୟବହୃତ ହୁଏ।

4. ଇଞ୍ଜିନିୟରିଂ ଇଟା ଏହାର ଅଧିକ ଶକ୍ତି ଏବଂ ଜଳ ପ୍ରତିରୋଧକ ଗୁଣ ପାଇଁ ବେସମେଣ୍ଟ କିମ୍ବା ସନ୍ତସନ୍ତିଆ ସ୍ଥାନ ପାଇଁ ଉପଯୁକ୍ତ।

ଇଟାର ପରିମାଣ କିପରି ଗଣନା କରିବେ

ଇଟାର ପରିମାଣ ଗଣନା କରିବା ଜାଣିଲେ ବିଳମ୍ବ ଏବଂ ଅତିରିକ୍ତ ଖର୍ଚ୍ଚରୁ ବଞ୍ଚିହେବ। ଏହି ଫର୍ମୁଲା ବ୍ୟବହାର କରନ୍ତୁ:

ଇଟା ସଂଖ୍ୟା = (କାନ୍ଥର କ୍ଷେତ୍ରଫଳ / ଇଟାର କ୍ଷେତ୍ରଫଳ) × ଆଡଜଷ୍ଟମେଣ୍ଟ ଫ୍ୟାକ୍ଟର

1. ପ୍ରଥମେ, ବର୍ଗ ଫୁଟ କିମ୍ବା ମିଟରରେ କାନ୍ଥର କ୍ଷେତ୍ରଫଳ ଗଣନା କରନ୍ତୁ।

2. ତା’ପରେ, ଗୋଟିଏ ଇଟାର ଆକାର ଜାଣନ୍ତୁ (ସାଧାରଣ ଆକାର ହେଉଛି 190 mm × 90 mm × 90 mm କିମ୍ବା 7.5 in × 3.5 in × 3.5 in) ।

3. ଭାଙ୍ଗିବା ଏବଂ ଅପଚୟ ପାଇଁ ପ୍ରାୟ 5-10% ଅତିରିକ୍ତ ଯୋଡ଼ନ୍ତୁ। 

ଉଦ୍ହରଣ ସ୍ୱରୂପ, ଏକ 10 ft × 10 ft କାନ୍ଥ ପାଇଁ, ଇଟାର ଆକାର ଏବଂ ମୋର୍ଟାର୍ (ମସଲା) ବ୍ୟବଧାନ ଅନୁଯାୟୀ ଆପଣଙ୍କୁ ପ୍ରାୟ 500-550 ଇଟା ଦରକାର ହେବ। ଏହି ସହଜ ଗଣନା ଆପଣଙ୍କୁ ସଠିକ୍ ପରିମାଣ ଅର୍ଡର କରିବାରେ ଏବଂ ପ୍ରୋଜେକ୍ଟ ବିଳମ୍ବକୁ ଏଡ଼ାଇବାରେ ସାହାଯ୍ୟ କରେ। 

ଇଟା କିପରି ଚିହ୍ନିବେ?

ଇଟାର ଆକାର, ରଙ୍ଗ, ଗଠନ ଏବଂ ତା’କୁ ଆଘାତ କଲେ ବାହାରୁଥିବା ଶବ୍ଦରୁ ଏହାକୁ ଚିହ୍ନଟ କରାଯାଇପାରିବ। ଏଠାରେ ଆପଣଙ୍କୁ ଇଟା ଚିହ୍ନିବାରେ ସାହାଯ୍ୟ କରିବାକୁ କିଛି ପଦକ୍ଷେପ ଦିଆଯାଇଛି:

1. ଆକାର

ଯଦି ଆପଣ ଇଟାର ଆକାର କ’ଣ ବୋଲି ଭାବୁଛନ୍ତି, ତେବେ ଜାଣି ରଖନ୍ତୁ ଯେ ଏହା ବିଭିନ୍ନ ଆକାରରେ ଆସେ, କିନ୍ତୁ ସାଧାରଣ ଆକାର ହେଉଛି 8.5 ଇଞ୍ଚ ଗୁଣନ 4.25 ଇଞ୍ଚ ଗୁଣନ 2.75 ଇଞ୍ଚ (215 mm x 102.5 mm x 65 mm) । ଆପଣ ଏହାର ଆକାର ନିର୍ଦ୍ଧାରଣ କରିବା ପାଇଁ ଇଟାକୁ ମାପିପାରିବେ।

2. ରଙ୍ଗ

ଇଟା ନାଲି, ବାଦାମୀ, ଧୂସର ଏବଂ କ୍ରିମ୍ ସମେତ ବିଭିନ୍ନ ରଙ୍ଗରେ ଉପଲବ୍ଧ। ଇଟା ପ୍ରସ୍ତୁତ କରିବାରେ ବ୍ୟବହୃତ ସାମଗ୍ରୀ, ପୋଡ଼ିବା ପ୍ରକ୍ରିୟା ଏବଂ ଉତ୍ପାଦନରେ ବ୍ୟବହୃତ ଅନ୍ୟାନ୍ୟ ମିଶ୍ରଣ ଉପରେ ରଙ୍ଗ ନିର୍ଭର କରେ।

3. ଗଠନ

ବ୍ୟବହାର ଅନୁଯାୟୀ ଇଟାର ଗଠନ ଭିନ୍ନ ହୋଇପାରେ। ଭାର ସମ୍ଭାଳୁଥିବା କାନ୍ଥ ପାଇଁ ବ୍ୟବହୃତ ଇଟାର ପୃଷ୍ଠ ମସୃଣ ଏବଂ ଧାର ତୀକ୍ଷ୍ଣ ହୋଇଥିବା ବେଳେ ସଜାଇବା ଉଦ୍ଦେଶ୍ୟରେ ବ୍ୟବହୃତ ଇଟା ଖସଖସିଆ କିମ୍ବା ନକ୍ସାଯୁକ୍ତ ହୋଇପାରେ।

4. ଶବ୍ଦ

ବାଡ଼େଇଲେ, ଏକ ଭଲ ମାନର ଇଟାରୁ ସ୍ପଷ୍ଟ ଝଙ୍କାର ଶବ୍ଦ ବାହାରିବା ଉଚିତ୍। ଯଦି ଇଟାରୁ ଗୁମ୍ ଗୁମ୍ ଶବ୍ଦ ଆସେ, ତେବେ ଏହା ନିମ୍ନ ମାନର କିମ୍ବା ନଷ୍ଟ ହୋଇଥାଇପାରେ।

ଇଟାର ଗୁଣଗୁଡ଼ିକ କ’ଣ?

1. କଠିନତା

ଯଦି ଇଟା ବାହାର ପାଣିପାଗ କିମ୍ବା ଅଧିକ ବ୍ୟବହାରର (ଯେପରିକି ଫୁଟପାଥ କିମ୍ବା ବାହାର କାନ୍ଥରେ) ସମ୍ମୁଖୀନ ହୁଏ, ତେବେ ଏହା କ୍ଷୟ ଏବଂ କ୍ଷତିରୁ ରକ୍ଷା ପାଇବା ଦରକାର। ଇଟା ଯେତେ ଶକ୍ତ ହେବ, ଏହା ସେତେ ଅଧିକ ଦିନ ତିଷ୍ଠିବ।
 

2. ସଙ୍କୋଚନ ଶକ୍ତି

ଭାର ସମ୍ଭାଳୁଥିବା କାନ୍ଥ କିମ୍ବା ସ୍ତମ୍ଭ ତିଆରି କରିବାକୁ ଚାହୁଁଛନ୍ତି କି? ଆପଣଙ୍କୁ ଓଜନ ସମ୍ଭାଳି ପାରୁଥିବା ଇଟା ଦରକାର। ଅଧିକ ସଙ୍କୋଚନ ଶକ୍ତି ଢାଞ୍ଚାଟି ସୁରକ୍ଷିତ ଏବଂ ସ୍ଥିର ରହିବା ସୁନିଶ୍ଚିତ କରେ।
 

3. ଶୋଷଣ

ବର୍ଷା କିମ୍ବା ଆର୍ଦ୍ରତା ଥିବା ଜାଗାରେ ଘର ତିଆରି କରୁଛନ୍ତି କି? କମ୍ ଜଳ ଶୋଷଣ କରୁଥିବା ଇଟା ଅଧିକ ଉପଯୁକ୍ತ, କାରଣ ସେଗୁଡ଼ିକରେ ଫାଟ ହେବା, ଶିଉଳି ଲାଗିବା କିମ୍ବା ସମୟକ୍ରମେ ଦୁର୍ବଳ ହେବାର ସମ୍ଭାବନା କମ୍ ଥାଏ।
 

4. ତାପଜ ପରିବାହିତା

ଇନସୁଲେସନ୍ ପାଇଁ ଇଟାର ତାପ ପରିବହନ କରିବାର କ୍ଷମତା ଗୁରୁତ୍ୱପୂର୍ଣ୍ଣ। ବାହାର କାନ୍ଥ ଏବଂ ପାଣିପାଗ ପ୍ରତି ସମ୍ବେଦନଶୀଳ ସ୍ଥାନ ପାଇଁ, କମ୍ ତାପଜ ପରିବାହିତା ଥିବା ଇଟା ଘର ଭିତରର ତାପମାତ୍ରାକୁ ବଜାಯ ରଖିବାରେ ସାହାଯ್ಯ କରେ, ଯାହା ଗ୍ରୀଷ୍ମ ଦିନେ ଥଣ୍ଡା ଏବଂ ଶୀତ ଦିନେ ଗରମ ରଖିଥାଏ।
 

5. ଲୁଣ ଅଂଶ ଜମିବା

ଆପଣ ବେଳେବେଳେ ଦେଖୁଥିବା ସେହି ଧଳା ଦାଗଗୁଡ଼ିକ ହେଉଛି ଏଫ୍ଲୋରେସେନ୍ସ , ଯାହା ଅଧିକ ଲୁଣର ସଂକେତ। ଏହା ଅଧିକ ହେଲେ ଇଟାର ଉପରିଭାଗ ନଷ୍ଟ କରିପାରେ ଏବଂ ଏହାର ସ୍ଥାୟୀତ୍ୱ କମାଇପାରେ, ବିଶେଷ କରି ଦୃଶ୍ୟମାନ କିମ୍ବା ଆର୍ଦ୍ରତା ପ୍ରବଣ ସ୍ଥାନରେ।
 

6. ଆଲକାଲି ପ୍ରତିରୋଧ

ଯେଉଁ ସ୍ଥାନରେ ଇଟା ସବୁବେଳେ ସିମେଣ୍ଟ, ପ୍ଲାସ୍ତର କିମ୍ବା କ୍ଷାରୀୟ ମାଟି (ଯେପରିକି ମୂଳଦୁଆ କିମ୍ବା କାନ୍ଥର ଯୋଡ଼େଇ) ସଂସ୍ପର୍ଶରେ ଆସିଥାଏ, ସେଠାରେ ଆଲକାଲି ପ୍ରତିରୋଧ ଗୁରୁତ୍ୱପୂର୍ଣ୍ଣ। ଏକ ଭଲ ଇଟା ଏହି ସାମଗ୍ରୀ ସଂସ୍ପର୍ଶରେ ଆସିଲେ ଦୁର୍ବଳ ହେବ ନାହିଁ, ଫାଟିବ ନାହିଁ କିମ୍ବା କୌଣସି ପ୍ରତିକ୍ରିୟା କରିବ ନାହିଁ।