ନିଜର ଘର ନିର୍ମାଣ ଯୋଜନା ଡିଜାଇନ୍ କରିବା ପାଇଁ ଟିପ୍ସ

ହାଉସ୍ ଫ୍ଲୋର୍ ପ୍ଲାନ୍ ହେଉଛି ସ୍କେଲ୍ ସାହାଯ୍ୟରେ ଅଙ୍କନ କରାଯାଇଥିବା ଏକ ରେଖାଚିତ୍ର, ଯାହା କୋଠରୀଗୁଡ଼ିକର ଲେ’ଆଉଟ୍ ଏବଂ ଘରର ଭୌତିକ ବୈଶିଷ୍ଟ୍ୟାବଳୀର ଏକ ବିହଙ୍ଗ ଦୃଷ୍ଟି ଦେଇଥାଏ । ଏଥିରେ ମାପ, ଫର୍ନିଚର୍, ଉପକରଣ ଏବଂ ଅନ୍ୟାନ୍ୟ ଅତ୍ୟାବଶ୍ୟକ ଉପାଦାନଗୁଡ଼ିକର ଅବସ୍ଥିତି ରହିଥାଏ ଏବଂ ଆପଣଙ୍କ ଘରର ନିର୍ମାଣ ଓ ଡିଜାଇନରେ ଏହା ଏକ ବ୍ଲୁ-ପ୍ରିଣ୍ଟ ଭାବେ କାମ କରିଥାଏ । ଏକ ବ୍ୟାବହାରିକ ବିଲଡିଂ ପ୍ଲାନ୍ ଡ୍ରଇଂ ବିଲ୍ଡରମାନଙ୍କୁ ମାର୍ଗଦର୍ଶନ ଦେଇଥାଏ ଏବଂ ସମସ୍ତ ଡିଜାଇନ ଉପାଦାନଗୁଡ଼ିକ ଯେପରି ସୁରୁଖୁରୁରେ ଖାପ ଖାଏ ତାହା ସୁନିଶ୍ଚିତ କରିଥାଏ ।

ନିଜର ଘର ପ୍ଲାନ୍ ତିଆରି କରିବାର ମହତ୍ତ୍ୱ

ଏକ ସବିସ୍ତୃତ ଗୃହ ନିର୍ମାଣ ଯୋଜନା ତିଆରି କରିବା ଅନେକ କାରଣ ପାଇଁ ଗୁରୁତ୍ୱପୂର୍ଣ୍ଣ ହୋଇଥାଏ । ଆପଣଙ୍କର କଳ୍ପନାକୁ ଯେପରି ବିଲ୍ଡରମାନେ ଠିକ୍ ଭାବେ ବୁଝିପାରନ୍ତି ଏହା ସୁନିଶ୍ଚିତ କରିଥାଏ ଓ ତ୍ରୁଟି ତଥା ଭୁଲ୍ ବୁଝାମଣାକୁ ହ୍ରାସ କରିଥାଏ । ଏକ ବିସ୍ତୃତ ଯୋଜନା ମଧ୍ୟ ଉତ୍ତମ ବଜେଟ୍ ପରିଚାଳନା ପାଇଁ ଅନୁମତି ଦେଇଥାଏ, କାରଣ ଆପଣ ସମୟ ପୂର୍ବରୁ ସାମଗ୍ରୀ, ଶ୍ରମ ଏବଂ ଅନ୍ୟାନ୍ୟ ଖର୍ଚ୍ଚର ହିସାବ କରିପାରିଥାନ୍ତି । ଏହା ବ୍ୟତୀତ, ଏହା ଆବଶ୍ୟକୀୟ ପରମିଟ୍ ହାସଲ କରିବା ଏବଂ ସ୍ଥାନୀୟ ବିଲ୍ଡିଂ କୋଡ୍ ର ଅନୁପାଳନ କରିବାରେ ମଧ୍ୟ ସାହାଯ୍ୟ କରେ ।

ଗୃହ ଯୋଜନା ବା ହାଉସ୍ ପ୍ଲାନ୍ ତିଆରି କରିବା ପାଇଁ ୧୦ଟି ଟିପ୍ସ

୧) ଟିପ୍ ୧: ଏକ କଳ୍ପନା ସହିତ ଆରମ୍ଭ କରନ୍ତୁ

ନିଜର ଘରର ଯୋଜନା ଅଙ୍କନ ଆରମ୍ଭ କରିବା ପୂର୍ବରୁ, ଆପଣ କ’ଣ ଚାହୁଁଛନ୍ତି ତାହାର ଏକ ସ୍ପଷ୍ଟ କଳ୍ପନା ରଖନ୍ତୁ । ନିଜର ଜୀବନଶୈଳୀ, ଆବଶ୍ୟକତା ଏବଂ ପସନ୍ଦଗୁଡ଼ିକୁ ବିଚାରକୁ ନିଅନ୍ତୁ । କୋଠରୀଗୁଡ଼ିକର ସଂଖ୍ୟା, ସେଗୁଡ଼ିକର ଲେ’ଆଉଟ୍ ଏବଂ ଆପଣ ଚାହୁଁଥିବା କୌଣସି ସ୍ୱତନ୍ତ୍ର ବୈଶିଷ୍ଟ୍ୟ ସମ୍ପର୍କରେ ଚିନ୍ତା କରନ୍ତୁ ।

୨) ଟିପ୍ ୨: ଗବେଷଣା କରନ୍ତୁ ଓ ପ୍ରେରଣା ଲାଭ କରନ୍ତୁ

ପ୍ରେରଣା ପାଇଁ ବିଭିନ୍ନ ଗୃହ ଡିଜାଇନ୍ ଓ ଫ୍ଲୋର୍ ପ୍ଲାନ୍ ଗୁଡ଼ିକ ଉପରେ ନଜର ପକାନ୍ତୁ । ମଡେଲ୍ ଘର ପରିଦର୍ଶନ କରନ୍ତୁ, ଆର୍କିଟେକ୍ଚର୍ ମାଗାଜିନ୍ ଖେଳାଇ ଦେଖନ୍ତୁ ଏବଂ ଅନଲାଇନରେ ଉପଲବ୍ଧ ସମ୍ବଳଗୁଡ଼ିକୁ ଅନୁସନ୍ଧାନ କରନ୍ତୁ । ଆପଣଙ୍କର ଷ୍ଟାଇଲ୍ ଏବଂ କାର୍ଯ୍ୟଗତ ଆବଶ୍ୟକତାକୁ ସୁହାଉଥିବା ଭଳି ଧାରଣାଗୁଡ଼ିକୁ ସଂଗ୍ରହ କରନ୍ତୁ ।

୩) ଟିପ୍ ୩: ନିଜର ବଜେଟ୍ ନିରୂପଣ କରନ୍ତୁ

ଆରମ୍ଭରୁ ହିଁ ବଜେଟ ସମ୍ବନ୍ଧୀୟ ନିଷ୍ପତ୍ତି ନେବା ଦ୍ୱାରା ଆପଣଙ୍କ ଡିଜାଇନ ପସନ୍ଦଗୁଡ଼ିକୁ ମାର୍ଗଦର୍ଶନ ମିଳିଥାଏ । ନିର୍ମାଣ ବାବଦୀୟ ଖର୍ଚ୍ଚ, ସାମଗ୍ରୀ, ଶ୍ରମ ଏବଂ ଅନ୍ୟାନ୍ୟ ଅତିରିକ୍ତ ଖର୍ଚ୍ଚଗୁଡ଼ିକୁ ଧ୍ୟାନରେ ରଖନ୍ତୁ । ଏକ ସ୍ପଷ୍ଟ ବଜେଟ୍ ରହିଥିଲେ ଆପଣ ଆବଶ୍ୟକତାରୁ ଅଧିକ ଖର୍ଚ୍ଚାନ୍ତ ହୋଇ ନ ଥାନ୍ତି ଏବଂ କେବଳ ଅତ୍ୟାବଶ୍ୟକ ବୈଶିଷ୍ଟ୍ୟାବଳୀକୁ ପ୍ରାଥମିକତା ଦେବାରେ ସକ୍ଷମ ହୋଇଥାନ୍ତି ।

୪) ଟିପ୍ ୪: ସଠିକ୍ ପ୍ଲଟ୍ ଚୟନ କରନ୍ତୁ

ଗୃହ ନିର୍ମାଣ ଯୋଜନାରେ, ଆପଣଙ୍କ ପ୍ଲଟର ଅବସ୍ଥିତି ଏବଂ ଆକାର ଆପଣଙ୍କର ହାଉସ୍ ପ୍ଲାନକୁ ପ୍ରଭାବିତ କରିଥାଏ । ପ୍ଲଟ୍ ର କ୍ଷେତ୍ରଫଳ, ଅବସ୍ଥିତି ଏବଂ ଉପଯୋଗିତା (ବିଜୁଳି, ଜଳ, ସଡ଼କ ଆଦି) ପ୍ରତି ସୁଗମ୍ୟତାର ମୂଲ୍ୟାୟନ କରନ୍ତୁ । ପ୍ଲଟ୍ ର ଆକାର ଯେପରି ଆପଣ ଚାହୁଁଥିବା ଘରର ଆକାର ଏବଂ ଲେ’ଆଉଟର ସୁସଙ୍ଗତ ହୁଏ ତାହା ସୁନିଶ୍ଚିତ କରନ୍ତୁ ।

୫) ଟିପ୍ ୫: ପ୍ରାୟୋଗିକତାକୁ ଗୁରୁତ୍ୱ ଦିଅନ୍ତୁ

ଯଦିଓ ସୌନ୍ଦର୍ଯ୍ୟ ମହତ୍ତ୍ୱ ରଖିଥାଏ କିନ୍ତୁ ପ୍ରାୟୋଗିକତାକୁ ପ୍ରାଧାନ୍ୟତା ଦିଆଯିବା ଉଚିତ । ଜାଗାକୁ ଏପରି ଡିଜାଇନ୍ କରନ୍ତୁ ଯେପରିକି ତାହା ବ୍ୟାବହାରିକ ହୋଇଥିବା ଏବଂ ଆପଣଙ୍କର ନିତିଦିନିଆ ଆବଶ୍ୟକତାକୁ ପୂରଣ କରିପାରୁଥିବ । ନିଜର ଘର ପ୍ଲାନ୍ ତିଆରି କରିବା ସମୟରେ ଲେ’ଆଉଟ୍ ରେ ଷ୍ଟୋରେଜ୍ ଏବଂ ସୁଗମ୍ୟତା ଭଳି ଦିଗଗୁଡ଼ିକୁ ଧ୍ୟାନରେ ରଖନ୍ତୁ ।

୬) ଟିପ୍ ୬: ପେସାଦାରଙ୍କ ପରାମର୍ଶ ନିଅନ୍ତୁ

ଯଦିଓ ନିଜ ଘରର ଯୋଜନା ନିଜେ ତିଆରି କରିବା ଏକ ତୃପ୍ତିଦାୟକ ଅନୁଭୂତି ହୋଇଥାଏ, କିନ୍ତୁ ଆର୍କିଟେକ୍ଟ ଓ ଡିଜାଇନରଙ୍କ ସହ ପରାମର୍ଶ ଆପଣଙ୍କୁ ମୂଲ୍ୟବାନ୍ ଦୃଷ୍ଟିକୋଣ ପାଇବାରେ ସାହାଯ୍ୟ କରିପାରିବ । ପେସାଦାରମାନେ ଆପଣଙ୍କର ଧାରଣାକୁ ଆହୁରି ମାର୍ଜିତ କରିବା ଏବଂ ବିଲଡିଂ କୋଡ୍ ର ଅନୁପାଳନକୁ ସୁନିଶ୍ଚିତ କରିବାରେ ସାହାଯ୍ୟ କରିପାରିବେ ।

୭) ଟିପ୍ ୭: ଏକ ସବିସ୍ତୃତ ଫ୍ଲୋର୍ ପ୍ଲାନ୍ ତିଆରି କରନ୍ତୁ

ସବିସ୍ତୃତ ଫ୍ଲୋର୍ ପ୍ଲାନ୍ ତିଆରି କରିବା ପାଇଁ ଡିଜାଇନ୍ ସଫ୍ଟୱେୟାର୍ ବ୍ୟବହାର କରନ୍ତୁ କିମ୍ୱା ଜଣେ ପେସାଦାରଙ୍କ ସାହାଯ୍ୟ ନିଅନ୍ତୁ । ସେଥିରେ ସଠିକ ମାପ, ରୁମ୍ ଲେ’ଆଉଟ୍ ଏବଂ ଫିକ୍ସର୍ ତଥା ଆସବାବପତ୍ରର ସ୍ଥାପନା ଅନ୍ତର୍ଭୁକ୍ତ କରନ୍ତୁ । ଏକ ନିଖୁଣ ପ୍ଲାନ୍ ରହିବା ଜରୁରୀ ଅଟେ ଯାହାକୁ ବିଲ୍ଡରମାନେ ଅନୁସରଣ କରିପାରିବେ ।

୮) ଟିପ୍ ୮: ନମୁନା ହାସଲ କରନ୍ତୁ

ନିଜର ଡ୍ରଇଂଗୁଡ଼ିକୁ ଚୂଡ଼ାନ୍ତ କରିବା ପରେ, ପରବର୍ତ୍ତୀ ମୁଖ୍ୟ ପଦକ୍ଷେପ ହେଉଛି ନିଜର ଗୃହ ନିର୍ମାଣ ଯୋଜନାକୁ ଏକ ବାସ୍ତବତାର ରୂପ ଦେବା ପାଇଁ ସାମଗ୍ରୀଗୁଡ଼ିକୁ ସଂଗ୍ରହ କରବା । ନିଜ ବାସସ୍ଥାନରେ ଆପଣ ଯେଉଁସବୁ ଉତ୍ପାଦ ଚାହୁଁଛନ୍ତି ସେ ସମସ୍ତ ଉତ୍ପାଦର ନମୁନା ସଂଗ୍ରହ କରିବା ଓ ସେଗୁଡ଼ିକୁ ପରସ୍ପର ସହିତ କିପରି ଖାପ ଖାଉଛି ତାହା ଦେଖିନେବା ସର୍ବୋତ୍ତମ ହୋଇଥାଏ । ଉଦାହରଣ ସ୍ୱରୂପ, ଯଦି ଆପଣ ଏକ କୋଠରୀରେ ଏକ ନିର୍ଦ୍ଦିଷ୍ଟ ରଙ୍ଗ ଚାହୁଁଛନ୍ତି, ତେବେ, ସେହି କୋଠରୀରେ ପଡ଼ୁଥିବା ସୂର୍ଯ୍ୟକିରଣର ମାତ୍ରା ଓ ଦିଗ, କୋଠରୀର ଗୁଣ ଏବଂ ବିଦ୍ୟମାନ ରଙ୍ଗ ଭଳି ଦିଗଗୁଡ଼ିକୁ ବିଚାରକୁ ନିଅନ୍ତୁ ।

୯) ଟିପ୍ ୯: ଚୟନଗୁଡ଼ିକୁ ଚୂଡ଼ାନ୍ତ କରିବା

ସ୍ଥାୟିତ୍ୱ ଏବଂ ରକ୍ଷଣାବେକ୍ଷଣ ପାଇଁ ହାର୍ଡଉଡ୍, ଟାଇଲ୍, ପଥର କିମ୍ବା କଂକ୍ରିଟ୍ ଭଳି ସାମଗ୍ରୀଗୁଡ଼ିକୁ ବିଚାରକୁ ନିଅନ୍ତୁ । ଆପଣଙ୍କର ଥିମ୍ ଏବଂ ଟେକ୍ସର ସହିତ ମେଳ ଖାଉଥିବା ଏବଂ ଆକର୍ଷଣୀୟ ଲାଗୁଥିବା ରଙ୍ଗ ଚୟନ କରନ୍ତୁ । ନିଜର ଡିଜାଇନକୁ ଉନ୍ନତ କରିବା ପାଇଁ ଫିକ୍ସର୍, ହାର୍ଡୱେର୍ ଓ ଲାଇଟିଂ ଚୟନ କରନ୍ତୁ । ଫସେଟ୍ (ପିପା), କବାଟ ହ୍ୟାଣ୍ଡେଲ୍ ଏବଂ ଲାଇଟ୍ ସୁଇଚ୍ ଭଳି ସୂକ୍ଷ୍ମତା ପ୍ରତି ଧ୍ୟାନ ଦିଅନ୍ତୁ । ଆପଣ ଯାହାସବୁ ପସନ୍ଦ କରିଛନ୍ତି ସେଗୁଡ଼ିକ ଆପଣଙ୍କ କଳ୍ପନା ଏବଂ ବଜେଟ ଅନୁରୂପ କି ନୁହେଁ ତାହା ନିଶ୍ଚିତ କରିବା ପାଇଁ ଇଣ୍ଟେରିୟର୍ ଡିଜାଇନରଙ୍କ ସାହାଯ୍ୟ ନିଅନ୍ତୁ ।

୧୦) ଟିପ୍ ୧୦: ସମୀକ୍ଷା କରନ୍ତୁ

ନିଜର ଘର ନିର୍ମାଣ ଯୋଜନାକୁ ଚୂଡ଼ାନ୍ତ କରିବା ପୂର୍ବରୁ, ତାହାକୁ ଟିକିନିଖି ଭାବେ ସମୀକ୍ଷା କରନ୍ତୁ । ସେଥିରେ ଯେପରି କୌଣସି ତ୍ରୁଟିବିଚ୍ୟୁତି, ବ୍ୟତିକ୍ରମ କିମ୍ବା ଉପେକ୍ଷିତ ରହିଯାଇଥିବା ଜିନିଷ ନାହିଁ ସେ ସମ୍ପର୍କରେ ସୁନିଶ୍ଚିତ ହୁଅନ୍ତୁ । ପ୍ଲାନ୍ ଯେପରି ଆପଣଙ୍କର କଳ୍ପନା ଏବଂ ଆବଶ୍ୟକତା ସହ ଖାପ ଖାଏ ତାହା ସୁନିଶ୍ଚିତ କରିବା ପାଇଁ ଆବଶ୍ୟକୀୟ ସଂଶୋଧନ କରନ୍ତୁ ।

ଗୃହ ନିର୍ମାଣ ଯୋଜନା ଡିଜାଇନ୍ କରିବା ସମୟରେ କେଉଁ ତ୍ରୁଟିଗୁଡ଼ିକୁ ଏଡ଼ାଇବା ଉଚିତ

• ସଂରକ୍ଷଣ ବା ଷ୍ଟୋରେଜ୍ ପାଇଁ ଯୋଜନା କରିବାରେ ଅବହେଳା କରିବା, ପ୍ରାକୃତିକ ଆଲୋକର ମହତ୍ତ୍ୱକୁ ଅଣଦେଖା କରିବା ଏବଂ କୋଠରୀଗୁଡ଼ିକ ମଧ୍ୟରେ ପ୍ରବାହକୁ ଧ୍ୟାନକୁ ନେବାରେ ବିଫଳ ହେବା ଭଳି ସାଧାରଣ ଭୁଲ୍ ଗୁଡ଼ିକୁ ଏଡ଼ାନ୍ତୁ ।

• ତା’ ସହିତ, ବଜେଟ୍ କୁ କମ୍ କରି ଆକଳନ କରନ୍ତୁ ନାହିଁ, କାରଣ ଅପ୍ରତ୍ୟାଶିତ ଖର୍ଚ୍ଚଗୁଡ଼ିକୁ ହଠାତ୍ ବଢ଼ିଯାଇପାରେ ।

• ପେସାଦାରଙ୍କ ପରାମର୍ଶ ନ ନେବା ଏବଂ ସ୍ଥାନୀୟ ବିଲଡିଂ କୋଡ୍ କୁ ଅଣଦେଖା କରିବା କାରଣରୁ ମଧ୍ୟ ଆପଣଙ୍କୁ ତାହା ସୁଧାରିବା ପାଇଁ ଖର୍ଚ୍ଚାନ୍ତ ହେବା ଓ ବିଳମ୍ବର ସମ୍ମୁଖୀନ ହେବାକୁ ପଡ଼ିପାରେ ।