Share:
Share:
ಕಾಂಕ್ರೀಟಿನಲ್ಲಿ ತುಕ್ಕು ಉಂಟಾಗುವುದು ಆಂತರಿಕ ಮತ್ತು ಬಾಹ್ಯ ಎರಡೂ ಅಂಶಗಳಿಂದ ಪ್ರಭಾವಿತವಾಗುವ ಸಂಕೀರ್ಣ ಪ್ರಕ್ರಿಯೆಯೊಂದರ ಪರಿಣಾಮವಾಗಿ. ಪರಿಣಾಮಕಾರಿ ತುಕ್ಕು ನಿಗ್ರಹ ತಂತ್ರಗಳನ್ನು ಅಭಿವೃದ್ಧಿಪಡಿಸಲು ಈ ಕಾರಣಗಳನ್ನು ಅರ್ಥಮಾಡಿಕೊಳ್ಳುವುದು ಬಹಳ ಮುಖ್ಯ. ಕಾಂಕ್ರೀಟ್ ರಚನೆಗಳಲ್ಲಿ ತುಕ್ಕು ಉಂಟಾಗಲು ಕಾರಣವಾಗುವ ಕೆಲವು ಪ್ರಮುಖ ಅಂಶಗಳನ್ನು ನಾವು ಪರಿಶೀಲಿಸೋಣ:
ಕಾಂಕ್ರೀಟ್ನ ಸದೃಢತೆ ಮತ್ತು ತಾಳಿಕೆ ನಿರ್ಧರಿಸುವಲ್ಲಿ ಅದರಲ್ಲಿನ ನೀರು ಮತ್ತು ಸಿಮೆಂಟ್ ಗಳ ಅನುಪಾತವು ಪ್ರಮುಖ ಪಾತ್ರವನ್ನು ವಹಿಸುತ್ತದೆ. ಅತಿಯಾದ ನೀರು-ಸಿಮೆಂಟ್ ಅನುಪಾತವು ಕಾಂಕ್ರೀಟಿನಲ್ಲಿ ಮಾಮೂಲಿಗಿಂತ ಹೆಚ್ಚಿನ ಪ್ರವೇಶಸಾಧ್ಯತೆ ಉಂಟಾಗುವುದಕ್ಕೆ ಕಾರಣವಾಗಬಹುದು, ಅದರಿಂದಾಗಿ ನೀರಿನ ಒಳನುಸುಳುವಿಕೆ ಹೆಚ್ಚುತ್ತದೆ ಮತ್ತು ಹಾಗಾಗಿ ತುಕ್ಕಿನ ಸೋಂಕಿಗೆ ತುತ್ತಾಗುತ್ತದೆ. ಹೆಚ್ಚುವರಿ ನೀರು ರಿಇನ್ಫೋರ್ಸ್ಮೆಂಟ್‌ ಉಕ್ಕನ್ನು ತಲುಪಲು ಕ್ಲೋರೈಡ್ ಅಯಾನುಗಳಂತಹ ತುಕ್ಕು ಉಂಟುಮಾಡುವ ಏಜೆಂಟ್ಗಳಿಗೆ ಒಂದು ಪ್ರವೇಶ ಮಾದ್ಯಮವಾಗಿ ಕಾರ್ಯನಿರ್ವಹಿಸುತ್ತದೆ, ಇದು ತುಕ್ಕು ಹಿಡಿಯುವ ಪ್ರಕ್ರಿಯೆಯನ್ನು ತೀವ್ರಗೊಳಿಸುತ್ತದೆ. ತುಕ್ಕಿನ ಅಪಾಯವನ್ನು ಕಡಿಮೆ ಮಾಡಲು ಸೂಕ್ತವಾದ ನೀರು-ಸಿಮೆಂಟ್ ಅನುಪಾತವನ್ನು ಅನುಸರಿಸುವುದು ಅತ್ಯಗತ್ಯ.
ಕಾಂಕ್ರೀಟ್ ಅನ್ನು ಕ್ಯೂರ್ ಮಾಡಿದಂತೆ, ಅದರಲ್ಲಿನ ನೀರು ಆವಿಯಾಗುವಿಕೆಯಿಂದಾಗಿ ಅದು ಕುಗ್ಗುವಿಕೆಯ ಪ್ರಕ್ರಿಯೆಗೆ ಒಳಗಾಗುತ್ತದೆ. ಈ ಕುಗ್ಗುವಿಕೆಯು ಕಾಂಕ್ರೀಟ್ನಲ್ಲಿ ಬಿರುಕುಗಳು ಉತ್ಪತ್ತಿಯಾಗುವುದಕ್ಕೆ ಕಾರಣವಾಗಬಹುದು ಮತ್ತು ಅವು ರಿಇನ್ಫೋರ್ಸ್ಮೆಂಟ್‌ ಸ್ಟೀಲನ್ನು ತಲುಪುವ ತುಕ್ಕು ಉಂಟುಮಾಡುವ ಏಜೆಂಟ್ಗಳಿಗೆ ಮಾರ್ಗಗಳನ್ನು ಒದಗಿಸುತ್ತವೆ. ಬಿರುಕುಗಳು ಕಟ್ಟಡದ ರಚನಾತ್ಮಕ ಸಮಗ್ರತೆಯನ್ನು ಕುಂದಿಸುವುದಲ್ಲದೆ ಕಟ್ಟಡದ ರಚನೆಯನ್ನು ದುರ್ಬಲಗೊಳಿಸುತ್ತದೆ ಕೂಡ ಮತ್ತು ಹಾಗಾಗಿ ತುಕ್ಕು ಪ್ರಾರಂಭಿಸಲು ಮತ್ತು ಹರಡಲು ಸುಲಭವಾಗುತ್ತದೆ
ಕಾಂಕ್ರೀಟ್ ನಿರ್ಮಾಣಗಳಲ್ಲಿ ಬಳಸುವ ವಸ್ತುಗಳ ಗುಣಮಟ್ಟವು ತುಕ್ಕು ಪ್ರಕ್ರಿಯೆಯ ಪ್ರತಿ ಅವುಗಳ ಪ್ರತಿರೋಧಗಳ ಮೇಲೆ ನೇರವಾಗಿ ಪರಿಣಾಮ ಬೀರುತ್ತದೆ. ಕಳಪೆ-ಗುಣಮಟ್ಟದ ಅಗ್ರಿಗೇಟ್‌ಗಳು ಅಥವಾ ತುಕ್ಕು ನಿರೋಧಕತೆಯ ಅಭಾವವುಳ್ಳ ಸ್ಟೀಲ್ ರಿಇನ್ಫೋರ್ಸ್ಮೆಂಟ್‌ ತುಕ್ಕಿನ ಆಕ್ರಮಣವನ್ನು ತೀವ್ರಗೊಳಿಸುತ್ತದೆ. ಉತ್ತಮ ಗುಣಮಟ್ಟದ ವಸ್ತುಗಳಲ್ಲಿ ಹೂಡಿಕೆ ಮಾಡುವುದರಿಂದ ಕಾಂಕ್ರೀಟ್ ರಚನೆಗಳ ದೀರ್ಘಾಯುಷ್ಯವನ್ನು ಗಣನೀಯವಾಗಿ ಹೆಚ್ಚಿಸಬಹುದು.
ಪ್ರವೇಶಸಾಧ್ಯತೆ ಅಂದರೆ ಕಾಂಕ್ರೀಟ್ ಮೂಲಕ ಹಾದುಹೋಗಲು ನೀರು ಮತ್ತು ಇತರ ವಸ್ತುಗಳು ಹೊಂದಿರುವ ಸಾಮರ್ಥ್ಯವನ್ನು ಸೂಚಿಸುತ್ತದೆ. ಅತೀವ ಪ್ರವೇಶಸಾಧ್ಯತೆ ಹೊಂದಿರುವ ಕಾಂಕ್ರೀಟ್ ತುಕ್ಕು ಉಂಟುಮಾಡುವ ಏಜೆಂಟ್ಗಳಿಗೆ ಒಳನುಸುಳಿ ರಿಇನ್ಫೋರ್ಸ್ಮೆಂಟ್‌ ಉಕ್ಕನ್ನು ತಲುಪಲು ಅನುವು ಮಾಡಿಕೊಡುತ್ತದೆ, ಇದು ಕ್ಷಿಪ್ರಗತಿಯ ತುಕ್ಕಿಗೆ ಕಾರಣವಾಗುತ್ತದೆ. ಸೂಕ್ತವಾದ ಮಿಶ್ರಣ ವಿನ್ಯಾಸ ಮತ್ತು ಸರಿಯಾದ ಮಿಶ್ರಣಾಂಶಗಳ ಬಳಕೆಯು ಕಾಂಕ್ರೀಟ್ನ ಪ್ರವೇಶಸಾಧ್ಯತೆಯನ್ನು ಕಡಿಮೆ ಮಾಡಲು ಮತ್ತು ಅದರ ಬಾಳಿಕೆ ಹೆಚ್ಚಿಸಲು ಸಹಾಯ ಮಾಡುತ್ತವೆ.
ತುಕ್ಕು ಹಿಡಿಯುವಿಕೆಯ ಪ್ರಕ್ರಿಯೆಯಲ್ಲಿ ತೇವಾಂಶವು ಒಂದು ಅತ್ಯಂತ ನಿರ್ಣಾಯಕ ಅಂಶವಾಗಿದೆ. ಹೆಚ್ಚಿನ ಆರ್ದ್ರತೆ ಅಥವಾ ನೀರಿಗೆ ನಿರಂತರವಾಗಿ ತೆರೆದುಕೊಳ್ಳುವಿಕೆಯ ಸ್ಥಿತಿಯನ್ನು ಹೊಂದಿರುವ ಪ್ರದೇಶಗಳು ವಿಶೇಷವಾಗಿ ತುಕ್ಕಿಗೆ ಗುರಿಯಾಗುತ್ತವೆ. ತೇವಾಂಶವು, ತುಕ್ಕು ಉಂಟುಮಾಡುವ ಏಜೆಂಟ್‌ಗಳು ರಿಇನ್ಫೋರ್ಸ್ಮೆಂಟ್‌ ಉಕ್ಕಿನೊಂದಿಗೆ ಪ್ರತಿಕ್ರಿಯಿಸಲು ಅನುಕೂಲಕರ ವಾತಾವರಣವನ್ನು ಸೃಷ್ಟಿಸುತ್ತದೆ, ಹೀಗೆ ಕಾಲಾನಂತರದಲ್ಲಿ ತುಕ್ಕು ಪ್ರಾರಂಭವಾಗುತ್ತದೆ.
ಕಾಂಕ್ರೀಟ್ ಮೂಲತಃ ಅಂತಸ್ಸಿದ್ಧವಾಗಿಯೇ ಪ್ರಬಲವಾಗಿದ್ದರೂ, ಕಳಪೆ ವಿನ್ಯಾಸ, ಅಸಮರ್ಪಕ ಮಿಶ್ರಣ ಅನುಪಾತಗಳು, ಸರಿಯಾಗಿ ಕ್ಯೂರಿಂಗ್ ಮಾಡದೇ ಇರುವುದು ಮತ್ತು ದೋಷಪೂರಿತ ಸ್ಥಾಪನೆಗಳಂತಹ ಅಂಶಗಳು ದೃಢತೆಯ ಮೇಲೆ ಋಣಾತ್ಮಕವಾಗಿ ಪರಿಣಾಮ ಬೀರುತ್ತವೆ. ದುರ್ಬಲ ಕಾಂಕ್ರೀಟು ಹಾನಿ, ಬಿರುಕುಗಳು ಮತ್ತು ಅಂತಿಮವಾಗಿ ತುಕ್ಕಿಗೆ ತುತ್ತಾಗುವ ಸಾಧ್ಯತೆ ಹೊಂದಿರುತ್ತದೆ.
ಕಾಂಕ್ರೀಟಿನಲ್ಲಿ ತುಕ್ಕವನ್ನು ತಡೆಗಟ್ಟುವುದು ಉತ್ತಮ ನಿರ್ಮಾಣ ಅಭ್ಯಾಸಗಳು, ವಸ್ತುಗಳ ಆಯ್ಕೆಯಲ್ಲಿ ಚತುರತೆ ಮತ್ತು ನಿರಂತರ ಉತ್ತಮ ನಿರ್ವಹಣೆಗಳ ಸಂಯೋಜನೆಯನ್ನು ಒಳಗೊಂಡಿರುತ್ತದೆ. ಸಕ್ರಿಯ ಕ್ರಮಗಳನ್ನು ತೆಗೆದುಕೊಳ್ಳುವ ಮೂಲಕ, ನಾವು ನಮ್ಮ ಕಾಂಕ್ರೀಟ್ ರಚನೆಗಳನ್ನು ತುಕ್ಕಿನ ಹಾನಿಕಾರಕ ಪರಿಣಾಮಗಳಿಂದ ರಕ್ಷಿಸಬಹುದು. ಕಾಂಕ್ರೀಟ್ನಲ್ಲಿ ತುಕ್ಕನ್ನು ತಡೆಗಟ್ಟಲು ಕೆಲವು ಪರಿಣಾಮಕಾರಿ ನಿಗ್ರಹ ತಂತ್ರಗಳನ್ನು ಅನ್ವೇಷಿಸೋಣ ಬನ್ನಿ:
ತುಕ್ಕು ನಿಗ್ರಹದ ಅಡಿಪಾಯವು ಉತ್ತಮ ಗುಣಮಟ್ಟದ ಕಾಂಕ್ರೀಟ್ ಅನ್ನು ಬಳಸುವುದರೊಂದಿಗೆ ಆರಂಭಿಸುತ್ತದೆ. ಸರಿಯಾದ ಮಿಶ್ರಣ ವಿನ್ಯಾಸ, ಸರಿಯಾದ ಕ್ಯೂರಿಂಗ್ ತಂತ್ರಗಳು ಮತ್ತು ಸೂಕ್ತವಾದ ಅಗ್ರಿಗೇಟ್‌ಗಳನ್ನು ಬಳಸುವುದು ಕಾಂಕ್ರೀಟ್ನ ಬಾಳಿಕೆ ಮತ್ತು ತುಕ್ಕು ನಿರೋಧಕತೆಯನ್ನು ಹೆಚ್ಚಿಸುತ್ತದೆ. ಒಂದು ಉತ್ತಮವಾಗಿ ನಿರ್ಮಿಸಲಾದ ಕಾಂಕ್ರೀಟ್ ರಚನೆಯು ತುಕ್ಕಿನ ವಿರುದ್ಧ ರಕ್ಷಣೆಯ ಮೊದಲ ಸಾಲಿನ ರಕ್ಷೆಯಾಗಿರುತ್ತದೆ.
ಎಪಾಕ್ಸಿ ಕೋಟಿಂಗ್‌ಗಳು ಕಾಂಕ್ರೀಟ್ ಮೇಲ್ಮೈಗಳಿಗೆ ಒಂದು ಅತ್ಯುತ್ತಮ ರಕ್ಷಣಾತ್ಮಕ ಪದರವನ್ನು ನೀಡುತ್ತವೆ. ಈ ಕೋಟಿಂಗ್‌ಗಳು, ತುಕ್ಕು ಉಂಟುಮಾಡುವ ಅಂಶಗಳಿಗೆ ಒಡ್ಡಿಕೊಳ್ಳುವುದರಿಂದ ಕಾಂಕ್ರೀಟ್ ಅನ್ನು ರಕ್ಷಿಸುತ್ತ ತಡೆಗೋಡೆಗಳಾಗಿ ಕಾರ್ಯನಿರ್ವಹಿಸುತ್ತವೆ. ಎಪಾಕ್ಸಿ ಕೋಟಿಂಗ್‌ಗಳು ತುಕ್ಕನ್ನು ತಡೆಗಟ್ಟುವುದು ಮಾತ್ರವಲ್ಲದೆ ಸುಧಾರಿತ ರಾಸಾಯನಿಕ ಪ್ರತಿರೋಧ ಮತ್ತು ಸುಂದರ ಅಲಂಕಾರದಂತಹ ಹೆಚ್ಚುವರಿ ಪ್ರಯೋಜನಗಳನ್ನು ಒದಗಿಸುತ್ತದೆ. ಹೆಚ್ಚುವರಿಯಾಗಿ, ಹಾನಿಗೊಳಗಾದ ಕಾಂಕ್ರೀಟ್ ಅನ್ನು ಸರಿಪಡಿಸಲು ಮತ್ತು ಬಲಪಡಿಸಲು ಮತ್ತು ಆಮೂಲಕ ಅದರ ಜೀವಿತಾವಧಿಯನ್ನು ವಿಸ್ತರಿಸಲು ಎಪಾಕ್ಸಿ ಗ್ರೌಟ್ ಅನ್ನು ಬಳಸಬಹುದು.
ಕಾಂಕ್ರೀಟ್ ಮಿಶ್ರಣದಲ್ಲಿ ಪಾಲಿಮರಿಕ್ ಫೈಬರ್ಗಳನ್ನು ಸೇರಿಸುವುದು ಕುಗ್ಗುವಿಕೆ ಇಂದಾಗುವ ಬಿರುಕು ಬಿಡುವಿಕೆಯನ್ನು ನಿಯಂತ್ರಿಸಲು ಸಹಾಯ ಮಾಡುತ್ತದೆ, ಇದು ತುಕ್ಕು ಉಂಟುಮಾಡುವ ಏಜೆಂಟ್ಗಳಿಗೆ ಕಾಂಕ್ರೀಟ್‌ನೊಳಗೆ ನುಸುಳುವುದಕ್ಕಿರುವ ಒಂದು ಸಾಮಾನ್ಯ ಮಾರ್ಗವಾಗಿದೆ. ಈ ಫೈಬರ್ಗಳು ಕಾಂಕ್ರೀಟ್ನ ಒಟ್ಟಾರೆ ಕಠಿಣತೆಯನ್ನು ಮತ್ತು ಬಾಳಿಕೆಗಳನ್ನು ಹೆಚ್ಚಿಸಿ ತುಕ್ಕು ಪ್ರಾರಂಭವಾಗುವ ಅಪಾಯವನ್ನು ಕಡಿಮೆ ಮಾಡುತ್ತವೆ.
ನುರಿತ ಮತ್ತು ಜಾಗರೂಕ ನಿರ್ಮಾಣ ಅಭ್ಯಾಸಗಳು ತುಕ್ಕು ನಿಗ್ರಹದಲ್ಲಿ ಪ್ರಮುಖ ಪಾತ್ರವನ್ನು ವಹಿಸುತ್ತವೆ, ವಿಶೇಷವಾಗಿ ಕಾಂಕ್ರೀಟ್‌ನಲ್ಲಾಗುವ ಸ್ಟೀಲಿನ ತುಕ್ಕನ್ನು ತಡೆಯುವಲ್ಲಿ ಅದು ನಿರ್ಣಾಯಕವಾಗಿದೆ. ಸರಿಯಾದ ಸಂಕುಚಿತಗೊಳಿಸುವಿಕೆ, ರಿಇನ್ಫೋರ್ಸ್ಮೆಂಟ್‌‌ಗೆ ತಕ್ಕ ರಕ್ಷೆ ಮತ್ತು ನಿರ್ಮಾಣದ ಸಮಯದಲ್ಲಿ ವಿವರಗಳಿಗೆ ಗಮನ ಕೊಡುವುದು ತುಕ್ಕು-ಸಂಬಂಧಿತ ಅಭದ್ರತೆಗೆ ಕಾರಣವಾಗುವ ದೋಷಗಳು ಮತ್ತು ಬಿರುಕುಗಳ ಸಾಧ್ಯತೆಯನ್ನು ಕಡಿಮೆ ಮಾಡುತ್ತವೆ.
ರಿಇನ್ಫೋರ್ಸ್ಮೆಂಟ್‌ ಸ್ಟೀಲನ್ನು ಆಯ್ಕೆಮಾಡುವಾಗ, ಸ್ಟೇನ್ಲೆಸ್ ಸ್ಟೀಲ್ ಅಥವಾ ಎಪಾಕ್ಸಿ-ಲೇಪಿತ ಸ್ಟೀಲಿನಂತಹ ತುಕ್ಕು-ಹಿಡಿಯದ ಅಥವಾ ತುಕ್ಕು-ನಿರೋಧಕ ವಸ್ತುಗಳನ್ನು ಆಯ್ಕೆಮಾಡಿ. ಈ ವಸ್ತುಗಳನ್ನು ತುಕ್ಕು-ಪ್ರಚೋದಕ ಪರಿಸರವನ್ನು ವಿರೋಧಿಸಲು ವಿನ್ಯಾಸಗೊಳಿಸಲಾಗಿರುತ್ತದೆ ಮತ್ತು ಕಾಂಕ್ರೀಟ್ ರಚನೆಯ ಜೀವನವನ್ನು ಇವು ಗಣನೀಯವಾಗಿ ಹೆಚ್ಚಿಸಬಹುದು.
ಅಂತಿಮವಾಗಿ, ಕಾಂಕ್ರೀಟ್ ಕೋಟಿಂಗ್ ಅನ್ನು ಅನ್ವಯಿಸುವುದು ಬಾಹ್ಯ ಹಾನಿಕಾರಕ ಅಂಶಗಳ ವಿರುದ್ಧ ಹೆಚ್ಚುವರಿ ರಕ್ಷಣಾತ್ಮಕ ಪದರವನ್ನು ಒದಗಿಸುತ್ತದೆ. ಈ ಕೋಟಿಂಗ್‌ಗಳು ತುಕ್ಕು-ನಿರೋಧಕ ಬಣ್ಣಗಳಿಂದ ಹಿಡಿದು ನೀರು ಮತ್ತು ತುಕ್ಕು ಉಂಟುಮಾಡುವ ಏಜೆಂಟ್ಗಳನ್ನು ಕಾಂಕ್ರೀಟ್‌ನೊಳಗೆ ನುಸುಳುವುದರಿಂದ ತಡೆಯುವ ಸೀಲಾಂಟ್ಗಳವರೆಗೆ ಇರಬಹುದು. ಕಾಲಾನಂತರದಲ್ಲಿ ಅವುಗಳ ಪರಿಣಾಮಕಾರಿತ್ವವನ್ನು ಖಚಿತಪಡಿಸಿಕೊಳ್ಳಲು ಮತ್ತು ಕಾಂಕ್ರೀಟಿಗೆ ತುಕ್ಕು ಹಿಡಿಯದಂತೆ ತಡೆಯಲು ಈ ಕೋಟಿಂಗ್‌ಗಳ ನಿಯಮಿತ ತಪಾಸಣೆ ಮತ್ತು ನಿರ್ವಹಣೆ ಅತ್ಯಗತ್ಯ.
ಕಾಂಕ್ರೀಟ್ ರಚನೆಗಳಲ್ಲಿನ ಉಂಟಾಗುವ ತುಕ್ಕು ಒಂದು ಗಂಭೀರ ಆತಂಕವಾಗಿದ್ದು ಅದು ಕಾಲಾನಂತರದಲ್ಲಿ ಅವುಗಳ ಸಮಗ್ರತೆಗೆ ಕುಂದು ತರಬಹುದು. ನೀರು-ಸಿಮೆಂಟ್ ಅನುಪಾತ, ಕುಗ್ಗುವಿಕೆ ಮತ್ತು ವಸ್ತುಗಳ ಗುಣಮಟ್ಟದಂತಹ ಮುಂತಾದ ಮೂಲ ಕಾರಣಗಳನ್ನು ಅರ್ಥಮಾಡಿಕೊಳ್ಳುವ ಮೂಲಕ, ತುಕ್ಕು ತಡೆಯಲು ನಾವು ಪೂರ್ವಭಾವಿ ಕ್ರಮಗಳನ್ನು ತೆಗೆದುಕೊಳ್ಳಬಹುದು. ಎಪಾಕ್ಸಿ ಕೋಟಿಂಗ್‌ಗಳು, ಪಾಲಿಮರಿಕ್ ಫೈಬರ್ಗಳು ಮತ್ತು ಸರಿಯಾದ ಕೆಲಸಗಾರಿಕೆಗಳು ಪ್ರಮುಖ ನಿಗ್ರಹಕಾರಿ ಕ್ರಮಗಳಾಗಿವೆ. ನೆನಪಿಡಿ, ನಿಗ್ರಹಕಾರಿ ಕ್ರಮಗಳಲ್ಲಿ ಇಂದು ಮಾಡುವ ಹೂಡಿಕೆ ನಾಳೆಗೆ ಕಾಂಕ್ರೀಟ್ ನಿರ್ಮಾಣಗಳ ದೀರ್ಘಾಯುಷ್ಯ ಮತ್ತು ವಿಶ್ವಾಸಾರ್ಹತೆಯನ್ನು ಖಾತ್ರಿಗೊಳಿಸುತ್ತದೆ.
ನೀರು-ಸಿಮೆಂಟ್ ಅನುಪಾತ ದೊಡ್ಡದಾಗಿರುವ, ಕಳಪೆ ಗುಣಮಟ್ಟದ ವಸ್ತುಗಳನ್ನು ಹೊಂದಿರುವ, ಹೆಚ್ಚಿದ ಪ್ರವೇಶಸಾಧ್ಯತೆ ಮತ್ತು ಅಸಮರ್ಪಕ ಕ್ಯೂರಿಂಗ್ ಪ್ರಕ್ರಿಯೆಗೆ ಒಳಗಾದ ಕಾಂಕ್ರೀಟ್ ತುಕ್ಕು ಹಿಡಿಯುವಿಕೆಯ ಹೆಚ್ಚಿನ ಸಾಧ್ಯತೆ ಹೊಂದಿರುತ್ತದೆ. ಇದರ ಜೊತೆಗೆ, ಕ್ಲೋರೈಡ್, ಸಲ್ಫೇಟ್‌ಗಳು ಅಥವಾ ವಿಪರೀತ ಹವಾಮಾನ ಪರಿಸ್ಥಿತಿಗಳಂತಹ ತುಕ್ಕು ಉಂಟುಮಾಡುವ ಅಂಶಗಳಿಗೆ ಒಡ್ಡಿಕೊಳ್ಳುವ ರಚನೆಗಳು ಸಹ ಹೆಚ್ಚು ದುರ್ಬಲವಾಗಬಹುದು.
ರಿಇನ್ಫೋರ್ಸ್ಮೆಂಟ್‌ ಸಿಮೆಂಟ್ ಕಾಂಕ್ರೀಟ್ (RCC) ನಲ್ಲಿ ಉಂಟಾಗುವ ತುಕ್ಕು ಘನ ಗಾತ್ರದ ವಿಸ್ತರಣೆಗೆ ಕಾರಣವಾಗಬಹುದು, ಆಮೂಲಕ ಆಂತರಿಕ ಒತ್ತಡ ಮತ್ತು ಬಿರುಕುಗಳನ್ನು ಉಂಟುಮಾಡುತ್ತದೆ ಮತ್ತು ಇದು ಭಾರ-ತಡೆಯುವ ಸಾಮರ್ಥ್ಯ ಮತ್ತು ರಚನಾತ್ಮಕ ಸಮಗ್ರತೆ ಕುಸಿಯುವುದಕ್ಕೆ ಕಾರಣವಾಗುತ್ತದೆ. ಇದು ಪ್ರತಿಯಾಗಿ, ಕಡಿಮೆ ಭಾರ-ತಡೆಯುವ ಸಾಮರ್ಥ್ಯ, ಒತ್ತಡದ ಪರಿಸ್ಥಿತಿಯ ಅಡಿಯಲ್ಲಿ ಕಾರ್ಯಕ್ಷಮತೆ ಕಳಪೆಯಾಗುವುದು ಮತ್ತು ಅಂತಿಮವಾಗಿ ರಚನಾತ್ಮಕ ಸಮಗ್ರತೆಗೆ ಧಕ್ಕೆಯಾಗಬಹುದು.
ತುಕ್ಕು ಕಾಂಕ್ರೀಟ್ನ ಪ್ರವೇಶಸಾಧ್ಯತೆಯನ್ನು ಹೆಚ್ಚಿಸುತ್ತದೆ, ಇದು ಬಿರುಕು ಬಿಡುವಿಕೆ, ಉಬ್ಬುವಿಕೆ ಮತ್ತು ಕಾಲಾಂತರದಲ್ಲಿ ಕಟ್ಟಡ ಕುಸಿಯುವುದಕ್ಕೆ ಕಾರಣವಾಗುತ್ತದೆ. ಈ ಅಂಶಗಳು ಕಾಂಕ್ರೀಟ್ ರಚನೆಗಳ ಬಾಳಿಕೆ ಮತ್ತು ಜೀವಿತಾವಧಿಯನ್ನು ಗಮನಾರ್ಹವಾಗಿ ಕಡಿಮೆ ಮಾಡುತ್ತವೆ ಮತ್ತು ಅತ್ಯಂತ ಆರಂಭದಲ್ಲೇ ರಿಪೇರಿ ಅಥವಾ ಬದಲಾವಣೆಗಳನ್ನು ಕೋರುವಂತ ದುಬಾರಿ ದುರಸ್ಥಿಗಳ ಅಗತ್ಯವನ್ನು ಹೆಚ್ಚಿಸುತ್ತವೆ.
ನಿಗ್ರಹಕಾರಿ ವಸ್ತುಗಳಲ್ಲಿ ಉತ್ತಮ ಗುಣಮಟ್ಟದ ಅಗ್ರಿಗೇಟ್‌ಗಳು ಮತ್ತು ಸಿಮೆಂಟ್, ಎಪಾಕ್ಸಿ ಗ್ರೌಟ್, ಪಾಲಿಮರಿಕ್ ಫೈಬರ್ಗಳು, ಸ್ಟೇನ್ಲೆಸ್ ಸ್ಟೀಲ್ನಂತಹ ತುಕ್ಕು-ಹಿಡಿಯದ ಲೋಹಗಳು ಮತ್ತು ರಕ್ಷಣಾತ್ಮಕ ಕಾಂಕ್ರೀಟ್ ಕೋಟಿಂಗ್‌ಗಳು ಸೇರಿವೆ. ನಿರ್ಮಾಣ ಹಂತದಲ್ಲೇ ಈ ಸಾಮಗ್ರಿಗಳು ಮತ್ತು ಸಾಧನಗಳನ್ನು ಅಳವಡಿಸಿಕೊಳ್ಳುವುದು ದೀರ್ಘಾವಧಿಯಲ್ಲಿ ತುಕ್ಕಿನ ವಿರುದ್ಧ ಉನ್ನತ ಮಟ್ಟದ ಪ್ರತಿರೋಧವನ್ನು ಖಾತ್ರಿಗೊಳಿಸುತ್ತದೆ.
ಸ್ಟೇನ್ಲೆಸ್ ಸ್ಟೀಲ್ ಮತ್ತು ಗ್ಯಾಲ್ವನೈಸ್ಡ್ ಸ್ಟೀಲಿನಂತಹ ಲೋಹಗಳು ಅವುಗಳ ಕಡಿಮೆ ಪ್ರಮಾಣದ ಪ್ರತಿಕ್ರಿಯಾತ್ಮಕತೆಯ ಮಟ್ಟಗಳಿಂದಾಗಿ ಕಾಂಕ್ರೀಟ್ನಲ್ಲಿ ತುಕ್ಕು ಹಿಡಿಯುವ ಕಡಿಮೆ ಸಾಧ್ಯತೆಯನ್ನು ಹೊಂದಿವೆ. ಅವುಗಳ ತುಕ್ಕು ನಿರೋಧಕತೆಯು ಅವುಗಳನ್ನು ದೀರ್ಘಾವಧಿಯ ತಾಳಿಕೆ ಮತ್ತು ನಿರ್ವಹಣೆ ಹಂತದಲ್ಲಿ ನೀಡುವ ಉಳಿತಾಯಕ್ಕಾಗಿ ಪರಿಣಾಮಕಾರಿ ಆಯ್ಕೆಗಳನ್ನಾಗಿ ಮಾಡುತ್ತದೆ.
