ಹೊರಗಿನ ಗೋಡೆಗೆ ಬಣ್ಣವನ್ನು ಆಯ್ಕೆ ಮಾಡುವುದು ಹೇಗೆ?

ನಿಮ್ಮ ಮನೆ ನಿರ್ಮಾಣದ ಪಯಣದಲ್ಲಿ ಅತ್ಯಂತ ರೋಚಕ ಹಂತವೆಂದರೆ ನಿಮ್ಮ ಮನೆಯ ಬಣ್ಣಗಳು. ಮತ್ತು ನೀವು ಆಯ್ಕೆ ಮಾಡುವ ಬಣ್ಣಗಳು ನಿಮ್ಮ ಮನೆಯ ದೃಶ್ಯಾತ್ಮಕ ಅನುಭವವನ್ನು ನಿರ್ಧರಿಸುತ್ತವೆ. ಮನೆಯ ಹೊರ ಗೋಡೆಯ ಆಯ್ಕೆ ಮತ್ತು ಗ್ರಹಿಕೆಯ ಮೇಲೆ ಹಲವಾರು ಅಂಶಗಳು ಪರಿಣಾಮ ಬೀರುತ್ತವೆ. ಆದ್ದರಿಂದ ಗಮನದಲ್ಲಿಟ್ಟುಕೊಳ್ಳಲು ನಾವು ನಿಮಗೆ ಕೆಲವು ಸಂಗತಿಗಳನ್ಉನ ತಿಳಿಸುತ್ತಿದ್ದೇವೆ, ಇದರಿಂದ ನೀವು ಸರಿಯಾದ ಬಣ್ಣಗಳನ್ನು ಆಯ್ಕೆ ಮಾಡಬಹುದು :

• 1. ಸಂಯೋಜನೆಗಳು: ಕಡಿಮೆ ಅಂದರೆ ಹೆಚ್ಚು :
  ಬಹಳಷ್ಟು ಬಣ್ಣಗಳನ್ನು ಬಳಸಿದರೆ ಗೋಜಲಾಗಬಹುದು ಎನ್ನುವುದನ್ನು ನೆನಪಿಡಿ. ಸರಳತೆಗೆ ಒತ್ತು ನೀಡಿ, ನಿಮ್ಮ ಮನೆಗೆ ಒಂದು ಅಥವಾ ಎರಡು ಹೊರಾಂಗಣ ಬಣ್ಣಗಳನ್ನು ಆಯ್ಕೆ ಮಾಡುವುದು ಸೂಕ್ತ. ಏಕತಾನತೆ ಉಂಟಾಗುತ್ತಿದೆ ಎಂದು ನೀವು ಭಾವಿಸಿದರೆ ಒಂದೇ ಬಣ್ಣದ ಹಲವು ಛಾಯೆಗಳನ್ನು ನೀವು ಆಯ್ಕೆ ಮಾಡಬಹುದು.
  
  
• 2. ಬಣ್ಣಗಳ ಆಯ್ಕೆ :
  ಬಣ್ಣಗಳ ಆಯ್ಕೆಯ ವಿಷಯದಲ್ಲಿ, ನೀವು ಆದರ್ಶವಾಗಿ ಹಲವು ಆಯ್ಕೆಗಳನ್ನು ಅನ್ವೇಷಿಸಬೇಕು. ನಿಮಗೆ ಯಾವ ಬಣ್ಣಗಳು ಇಷ್ಟ ಎಂದು ನೀವು ಆಯ್ಕೆ ಮಾಡುತ್ತಿರುವ ಸಂದರ್ಭ, ಸ್ಫೂರ್ತಿ ಮತ್ತು ಉಲ್ಲೇಖಗಳಿಗಾಗಿ ಹುಡುಕಿ ಮತ್ತು ನಂತರ ಅವುಗಳ ಸಂಯೋಜನೆಗಳನ್ನು ಅಂತಿಮಗೊಳಿಸಿ. ಸುಲಭವಾಗಿ ಧೂಳು ಹಿಡಿಯುವ ಕಪ್ಪು ಮತ್ತು ಗಾಢ ಬಣ್ಣಗಳನ್ನು ಬಳಸಬೇಡಿ.
  
  
• 3. ಬೆಳಕಿನ ಅಂಶ :
  ಕಾಗದದ ಮೇಲೆ ಮುದ್ರಿಸಿರುವ ಬಣ್ಣಗಳು ನಿಮ್ಮ ಮನೆಯ ಹೊರಗಿನ ಗೋಡೆಗೆ ಹಚ್ಚಿದಾಗ, ಗೋಡೆಯ ಮೇಲೆ ಬೀಳುವ ಬೆಳಕಿನ ಗುಣಮಟ್ಟ ಮತ್ತು ವಿಧವನ್ನು ಆಧರಿಸಿ ಭಿನ್ನವಾಗಿ ಕಾಣಿಸಬಹುದು. ಹಾಗಾಗಿ ಮೊದಲು ಕೆಲವು ಬಣ್ಣಗಳನ್ನು ಗೋಡೆಯ ಮೇಲೆ ಸ್ವಲ್ಪ ಹಚ್ಚಿ ನೋಡುವುದರಿಂದ ಅದು ಹೇಗೆ ಕಾಣಿಸುತ್ತದೆ ಎಂದು ಸ್ಪಷ್ಟವಾಗಿ ತಿಳಿದುಕೊಳ್ಳಬಹುದು.
  
  
• 4. ನೆರೆಹೊರೆಯ ಪರಿಸರ ಮುಖ್ಯ :
  ನಿಮ್ಮ ಮನೆಯ ಹೊರಗಿನ ಬಣ್ಣಗಳನ್ನು ಆಯ್ಕೆ ಮಾಡುವಾಗ ನಿಮ್ಮ ಮನೆ ಇರುವ ಸ್ಥಳ ಮತ್ತು ಅದರ ಸುತ್ತಮುತ್ತ ಇರುವುದನ್ನು ಪರಿಗಣಿಸುವುದು ಮುಖ್ಯವಾಗಿದೆ. ನಿಮ್ಮ ಮನೆ ಎದ್ದು ಕಾಣಬೇಕು ಎಂದು ನೀವು ಬಯಸುವುದರಲ್ಲಿ ತಪ್ಪಿಲ್ಲ, ಆದರೆ ನಿಮ್ಮ ಸುತ್ತಮುತ್ತಲು ಮತ್ತು ಹಿನ್ನೆಲೆಯೊಂದಿಗೆ ಹೊಂದಾಣಿಕೆಯಾಗುವ ರೀತಿಯಲ್ಲಿ ಬಣ್ಣಗಳನ್ನು ಆಯ್ಕೆ ಮಾಡುವುದನ್ನು ಖಚಿತಪಡಿಸಿಕೊಳ್ಳಿ.
  
  
•  5. ಬಣ್ಣಗಳಿಂದಾಚೆ ಯೋಚನೆ ಮಾಡಿ :
  ಬಾಗಿಲು ಮತ್ತು ಕಿಟಕಿಗಳ ಹೊರತಾಗಿ ನಿಮ್ಮ ಮನೆಯ ಹೊರಾಂಗಣ ಪೀಠೋಪಕರಣ, ಕಲಾಕೃತಿಗಳು ಮತ್ತು ಗಿಡಗಳಿಂದ ತಾಜಾ ನೋಟವನ್ನು ಹೊಂದಬಹುದು. ಸರಿಯಾದ ಸಾಮಗ್ರಿ ಮತ್ತು ಬೆಳಕನ್ನು ಆಯ್ಕೆ ಮಾಡಿ, ಇದರಿಂದ ನಿಮ್ಮ ಹೊರಾಂಗಣ ಬಣ್ಣಗಳು ಸೂಕ್ತವಾಗಿ ಹೊಂದಾಣಿಕೆಯಾಗುತ್ತವೆ. ಜೊತೆಗೆ, ಟ್ರಿಮ್‌ಗಳು ಮತ್ತು ಆಸೆಂಟ್‌ಗಳಿಗೆ ಉತ್ತಮ ಬಣ್ಣದ ಸಂಯೋಜನೆಯನ್ನು ಆಯ್ಕೆ ಮಾಡಿ.
  
  
• 6. ಬಾಳಿಕೆ :
  ನಿಮ್ಮ ಮನೆಯ ಹೊರಾಂಗಣ ಪೇಂಟ್ ಅನ್ನು ನಿರ್ವಹಿಸುವುದು ಕೂಡ ಅಷ್ಟೇ ಮುಖ್ಯವಾಗಿದೆ. ಬಣ್ಣಗಳ ಪರಿಗಣನೆಯಿಲ್ಲದೆ, ಪೇಂಟ್ ಆಯ್ಕೆ ಮಾಡುವ ಸಂದರ್ಭ ಬಾಳಿಕೆ ಬರುವ ಮತ್ತು ಕಡಿಮೆ ನಿರ್ವಹಣೆ ಅಗತ್ಯವಿರುವ ಪೇಂಟ್‌ಗಳನ್ನು ಆಯ್ಕೆ ಮಾಡಿ. ಸಾಮಾನ್ಯವಾಗಿ "ಸ್ಯಾಟಿನ್" ಮತ್ತು "ಎಗ್‌ಶೆಲ್" ಪೇಂಟ್‌ಗಳು ಸುದೀರ್ಘ ಬಾಳಿಕೆ ಬರುತ್ತದೆ ಮತ್ತು ಸ್ವಚ್ಛಗೊಳಿಸಲು ಸುಲಭವಾಗಿವೆ. ಅವು ನಿಮ್ಮ ಬಣ್ಣಗಳಿಗೆ ನಯವಾದ ಫಿನಿಶ್ ಅನ್ನೂ ಸಹ ಒದಗಿಸುತ್ತವೆ.
  
  
• 7. ಥೀಮ್ :
  ನಿಮ್ಮ ಮನೆಗೆ ಹೊರಾಂಗಣ ಪೇಂಟ್ ಅನ್ನು ಆಯ್ಕೆ ಮಾಡುವುದು ಹೇಗೆ ಎನ್ನುವ ಕುರಿತ ಗೊಂದಲ ನಿವಾರಿಸಲು, ನೀವು ಮೊದಲು ಥೀಮ್ ಸೆಟ್ ಮಾಡುವ ಕುರಿತು ಕಾರ್ಯನಿರ್ವಹಿಸಬೇಕು. ಮನೆಯ ಹೊರಗಿನ ಬಣ್ಣಕ್ಕಾಗಿ ಒಂದು ಥೀಮ್ ಆಯ್ಕೆ ಮಾಡಿಕೊಳ್ಳುವುದರಿಂದ ಕೇವಲ ನಿಮ್ಮ ಹೊರ ಗೋಡೆಗಳಿಗೆ ಸರಿಯಾದ ಬಣ್ಣ ಆಯ್ಕೆ ಮಾಡುವುದಕ್ಕೆ ನಿಮಗೆ ಸಹಾಯ ಮಾಡುವುದಷ್ಟೇ ಅಲ್ಲ, ಅದರ ಜೊತೆಗೆ ನಿಮ್ಮ ಮನೆ ಸುಂದರವಾಗಿಯೂ ಕಾಣುವಂತೆ ಮಾಡುತ್ತದೆ.
  
  
• 8. ಋತು :
  ಸರಿಯಾದ ಋತುವಿನಲ್ಲಿ ಪೇಂಟ್ ಮಾಡಿದರೆ ಹೊರಾಂಗಣ ಗೋಡೆಯ ಪೇಂಟಿಂಗ್ ಶ್ರಮರಹಿತ ಕೆಲಸವಾಗಬಹುದು. ಬೇಸಿಗೆ ಋತುವಿನಲ್ಲಿ ಪೇಂಟ್ ಮಾಡಿದರೆ ಹೊರಾಂಗಣ ಗೋಡೆಗಳ ಬಾಳಿಕೆ ಹೆಚ್ಚುತ್ತದೆ. ಬೇಸಿಗೆಯಲ್ಲಿ ಸೂಕ್ತ ತಾಪಮಾನದಲ್ಲಿ ಬಣ್ಣ ಸಮರ್ಪಕವಾಗಿ ಒಣಗುತ್ತದೆ. ಚಳಿಗಾಲ ಅಥವಾ ಮಳೆಗಾಲದಲ್ಲಿ ನೀವು ಹೊರಗಿನ ಗೋಡೆಗಳಿಗೆ ಪೇಂಟ್ ಮಾಡಿದರೆ, ನೀವು ಹೊರಗಿನ ಗೋಡೆಗೆ ಪದೇಪದೆ ಪೇಂಟ್ ಮಾಡಬೇಕಾಗುತ್ತದೆ.
  
  
• 9. ಪರೀಕ್ಷೆ :
  ಹೊರಗಿನ ಗೋಡೆಗಳಿಗೆ ನೀವು ಸರಿಯಾದ ಬಣ್ಣವನ್ನು ಆಯ್ಕೆ ಮಾಡಿದ ಬಳಿಕ, ಬಣ್ಣದ ಮಾದರಿಗಳನ್ನು ಪಡೆಯಿರಿ ಮತ್ತು ಹೊರಗಿನ ಗೋಡೆಯ ಮೇಲೆ ದೊಡ್ಡ ಜಾಗದಲ್ಲಿ ಬಣ್ಣವನ್ನು ಹಚ್ಚಿ. ದಿನದ ಭಿನ್ನ ಸಮಯಗಳಲ್ಲಿ ಈ ಬಣ್ಣಗಳನ್ನು ಗಮನಿಸಿ ನೋಡಿ. ಸೂರ್ಯನ ಬೆಳಕು ಮತ್ತು ನೆರಳಿನಲ್ಲಿ ಬಣ್ಣ ಹೇಗೆ ಕಾಣುತ್ತದೆ ಎಂದು ಗಮನಿಸಿ; ಇದು ನಿಮ್ಮ ಹೊರಗಿನ ಗೋಡೆಗೆ ಸರಿಯಾದ ಬಣ್ಣ ಆಯ್ಕೆ ಮಾಡಲು ನಿಮಗೆ ಸಹಾಯ ಮಾಡುತ್ತದೆ. ನೀವು ವೃತ್ತಿಪರ ವಿನ್ಯಾಸಕರಿಂದ ಸಹಾಯ ಕೇಳಬಹುದು ಅಥವಾ ಯಾವ ಬಗೆಯ ಹೊರಾಂಗಣ ಚೆನ್ನಾಗಿ ಕಾಣುತ್ತದೆ ಎನ್ನುವ ಕುರಿತು ಈಗಲೂ ಗೊಂದಲದಲ್ಲಿದ್ದರೆ ಆತ್ಮೀಯ ಸ್ನೇಹಿತರಿಂದ ಸಹಾಯ ಕೇಳಬಹುದು.